ທ່ານສີຈິ້ນຜິງພົບປະກັບສົມເດັດຊຸນຕານບຣູໄນ
ວັນທີ 19 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານຮາຈິ ຮາຊານານ ໂບເກຍ, ສົມເດັດຊຸນຕານບຣູໄນຢູ່ນະຄອນຫຼວງບານດາເຊຣີເບກາວັນປະເທດບຣູໄນ. ປະມຸກລັດສອງປະເທດຕີລາຄາຢ່າງສູງຕໍ່ທ່າອຽງພັດທະນາຢ່າງຕັ້ງໜ້າຂອງການພົວພັນລະຫວ່າງສອງປະເທດ, ແລະເປັນເອກະພາບກັນຕົກລົງສ້າງຕັ້ງສາຍພົວພັນຄູ່ຮ່ວມຍຸດທະສາດຈີນ-ບຣູໄນ, ເປັນຄູ່ຮ່ວມທີ່ດີທີ່ໄວ້ເນື້ອເຊື່ອໃຈດ້ານການເມືອງ, ຕ່າງຝ່າຍຕ່າງມີຜົນປະໂຫຍດດ້ານເສດຖະກິດ, ເຊື່ອມຈອດກັນດ້ານວັດທະນະທຳແລະຊ່ວຍເຫຼືອເຊິ່ງກັນແລະກັນໃນກິດຈະການຫຼາຍຝ່າຍ.
ທ່ານສີຈິ້ນຜິງ ຕີລາຄາສູງຕໍ່ທ່ານ ຮາຊານານ ທີ່ເອົາໃຈໃສ່ໃນລະດັບສູງຕໍ່ການພົວພັນລະຫວ່າງຈີນແລະບຣູໄນເປັນເວລາດົນນານ. ທ່ານເນັ້ນໜັກວ່າ, ຈີນແລະບຣູໄນແມ່ນປະເທດໃກ້ຄຽງທີ່ຢູ່ສອງຝັ່ງແຄມທະເລ, ແລະກໍເປັນເພື່ອນມິດແລະຄູ່ຮ່ວມທີ່ໄວ້ເນື້ອເຊື່ອໃຈດ້ານການເມືອງທີ່ດີ, ຕ່າງຝ່າຍຕ່າງມີຜົນປະໂຫຍດດ້ານເສດຖະກິດ, ເຊື່ອມຈອດກັນດ້ານວັດທະນະທຳແລະຊ່ວຍເຫຼືອເຊິ່ງກັນແລະກັນໃນກິດຈະການຫຼາຍຝ່າຍ, ເຮັດໃຫ້ໝາກຜົນການຮ່ວມມືສ້າງຄວາມຜາສຸກໃຫ້ແກ່ປະຊາຊົນສອງປະເທດຫຼາຍກວ່າເກົ່າ.
ທ່ານ ຮາຊານານ ກ່າວວ່າ, ຍິນດີຕ້ອນຮັບທ່ານສີຈິ້ນຜິງ ຢ້ຽມຢາມບຣູໄນເປັນຄັ້ງທຳອິດ, ການຢ້ຽມຢາມດັ່ງກ່າວໄດ້ເຮັດໃຫ້ການພົວພັນລະຫວ່າງສອງປະເທດໄດ້ຍົກສູງຂຶ້ນເປັນການພົວພັນຄູ່ຮ່ວມມືທາງຍຸດທະສາດ. ບຣູໄນຈະປະຕິບັດນະໂຍບາຍປະເທດຈີນດຽວຢ່າງເດັດດ່ຽວ, ຍິນດີຖືການຢ້ຽມຢາມຂອງທ່ານສີຈິ້ນຜິງຄັ້ງນີ້ເປັນໂອກາດທີ່ດີ, ເພີ່ມທະວີການແລກປ່ຽນແລະຮ່ວມມືລະຫວ່າງສອງຝ່າຍໃນຂົງເຂດການຄ້າ, ການລົງທຶນ, ກະສິກຳ, ການທ່ອງທ່ຽວ, ການສຶກສາ, ວັດທະນະທຳ, ການຊ່ວຍເຫຼືອດ້ານຍຸຕິທຳແລະອື່ນໆ, ສົ່ງເສີມຄວາມຜາສຸກໃຫ້ປະຊາຊົນສອງປະເທດ.