ຄ້າຍພຶດຕິກຳແລະຝຶກອົບຮົມສາກົນ “ສື່ມວນຊົນໃນອະນາຄົດ” ຂອງມະຫາວິທະຍາໄລຢູນນານ ໄດ້ຈັດຂຶ້ນຢູ່ນະຄອນຄຸນມິງໃນວັນທີ 26 ພະຈິກນີ້. ສຳມະນາກອນ 9 ຄົນຈາກວົງການສື່ມວນຊົນມຽນມາ ຈະຮ່ວມກັບອາຈານແລະນັກສຶກສາມະຫາວິທະຍາໄລຢູນນານ ດຳເນີນການຮຽນ, ການປະຕິບັດຕົວຈິງ, ການແລກປ່ຽນ ແລະການຖອດຖອນບົດຮຽນເປັນເວລາ 14 ມື້.
ຂ່າວແຈ້ງວ່າ, ໂຄງການພຶດຕິກຳແລະແລກປ່ຽນສາກົນ “ສື່ມວນຊົນໃນອະນາຄົດ” ແມ່ນໂຄງການຮ່ວມມືສາກົນແຜນທຳມະດາທີ່ຈັດໂດຍມະຫາວິທະຍາໄລຢູນນານ, ມີຈຸດປະສົງເພື່ອສ້າງເວທີສຳຜັດວັດທະນະທຳຈີນໂດຍຜ່ານວິດີໂອ, ເຮັດໃຫ້ຊາວໜຸ່ມຂອງປະເທດອາຊີໃຕ້ແລະອາຊີຕາເວັນອອກສຽງໃຕ້ມາຈີນເພື່ອຮັບຮູ້ ແລະສຳຜັດກັບຈີນ.
ໃນໄລຍະການຮຽນເປັນເວລາ 14 ມື້, ສຳມະນາກອນມຽນມາຈະຮ່ວມກັບອາສາສະໝັກທີ່ມາຈາກວິທະຍາໄລສື່ມວນຊົນມະຫາວິທະຍາໄລຢູນນານ ດຳເນີນການສຳພາດຂ່າວທາງວິດີໂອໂດຍປິ່ນອ້ອມຫົວຂໍ້ “ຢູນນານທີ່ພັດທະນາຢ່າງວ່ອງໄວ” ໂດຍຈະສຳພາດກ່ຽວກັບການຮ່ຳຮຽນຂອງນັກສຶກສາມຽນມາຢູ່ຈີນ, ການດຳເນີນໂຄງການຄົ້ນຄວ້າວິທະຍາສາດທີ່ຈີນ-ມຽນມາຮ່ວມມືກັນ, ຂະແໜງການດອກໄມ້ຂອງຢູນນານ, ຄວາມໄຝ່ຝັນປະກອບທຸລະກິດຂອງຊາວໜຸ່ມຈີນ, ການສ້າງທາງລົດໄຟຄວາມໄວສູງ ແລະອື່ນໆ. ໃນໄລຍະນີ້, ຍັງຈະຈັດໃຫ້ມີການຝຶກອົບຮົມການຖ່າຍແລະຕັດຕໍ່ວິດີໂອ ທັງໄປເອົາຂ່າວຢູ່ນະຄອນຄຸນມິງແລະຕ້າຫຼີ.
ຫຼັງຈາກຄ້າຍຝຶກອົບຮົມນີ້ສິ້ນສຸດລົງແລ້ວ, ຜົນງານຂອງສຳມະນາກອນທີ່ໄດ້ມາດຕະຖານ ຍັງຈະຖືກອອກອາກາດຢູ່ສື່ມວນຊົນອາຊີບ ທັງເຂົ້າຮ່ວມກິດຈະກຳຕ່າງໆ ເຊັ່ນ: ບຸນຮູບເງົາເລື່ອງສັ້ນອາຊີ ເປັນຕົ້ນ.