ທ່ານສີຈິ້ນຜິງເລີ່ມຢ້ຽມຢາມລາຊະອານາຈັກແອສປາຍທາງລັດຖະກິດ
ຕາມຂ່າວສານຊິນຮວາ: ວັນທີ 27 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ເດີນທາງໄປເຖິງນະຄອນຫຼວງມາດຣິດ ແລະ ເລີ່ມຢ້ຽມຢາມລາຊະອານາຈັກແອສປາຍທາງລັດຖະກິດ.
ທ່ານສີຈິ້ນຜິງໄດ້ຕາງໜ້າລັດຖະບານ ແລະ ປະຊາຊົນຈີນ, ສົ່ງຄວາມຢື້ຢາມຖາມຂ່າວຢ່າງຈິງໃຈ ແລະ ຄຳອວຍພອນອັນປະເສີດໄປຍັງລັດຖະບານ ແລະ ປະຊາຊົນແອສປາຍ ໂດຍກ່າວວ່າ, ປັດຈຸບັນ, ຈີນ ແລະ ແອສປາຍລ້ວນແຕ່ຢູ່ໃນໄລຍະປະຕິຮູບ ແລະ ພັດທະນາທີ່ສຳຄັນ, ຄວນລົງເລິກການພົວພັນລະຫວ່າງສອງປະເທດ, ປັບປຸງມິດຕະພາບທີ່ມີມູນເຊື້ອ, ເປີດກວ້າງການຮ່ວມມືຕົວຈິງ ແລະ ບັນລຸການພັດທະນາຮ່ວມກັນ, ສອດຄ່ອງກັບຜົນປະໂຫຍດຂອງສອງປະເທດ ແລະ ປະຊາຊົນສອງຊາດ ແລະ ກໍມີຜົນດີຕໍ່ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງໂລກ.
ທ່ານສີຈິ້ນຜິງກ່າວວ່າ, ໃນໄລຍະຢ້ຽມຢາມ, ຂ້າພະເຈົ້າມຸ່ງຫວັງລົງເລິກແລກປ່ຽນຄວາມເຫັນຢ່າງກວ້າງຂວາງກັບສົມເດັດເຟລີເປລາຊະການທີ 6, ທ່ານເປໂດຣ ຊານເຊັສ ນາຍົກລັດຖະມົນຕີ ແລະ ຜູ້ນຳທ່ານອື່ນໆຂອງແອສປາຍ ກ່ຽວກັບການພົວພັນລະຫວ່າງສອງປະເທດ ແລະ ບັນຫາອື່ນໆ ທີ່ສອງຝ່າຍມີຄວາມສົນໃຈຮ່ວມກັນ ເພື່ອຊຸກຍູ້ໃຫ້ການພົວພັນຄູ່ຮ່ວມຍຸດທະສາດຮອບດ້ານຈີນ-ແອສປາຍກ້າວເຂົ້າສູ່ຍຸກໃໝ່.
ພາຍຫຼັງສິ້ນສຸດການຢ້ຽມຢາມແອສປາຍທາງລັດຖະກິດແລ້ວ, ທ່ານສີຈິ້ນຜິງຍັງຈະຢ້ຽມຢາມອາກຊັງຕິນ, ປານາມາ ແລະ ປອກຕຸຍການທາງລັດຖະກິດ ແລະ ເຂົ້າຮ່ວມກອງປະຊຸມສຸດຍອດກຸ່ມ 20 ປະເທດຄັ້ງທີ 13 ທີ່ຈະຈັດຂຶ້ນຢູ່ນະຄອນຫຼວງບູນົສໄອເຣສ ປະເທດອາກຊັງຕິນ.