ທ່ານສີຈິ້ນຜິງໄດ້ຮັບລູກກະແຈຄຳຂອງນະຄອນຫຼວງມາດຣິດ
ວັນທີ 28 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ຮັບລູກກະແຈຄຳຂອງນະຄອນຫຼວງມາດຣິດຢູ່ຫ້ອງການປົກຄອງນະຄອນຫຼວງມາດຣິດປະເທດແອດສະປາຍ.
ທ່ານມານູເອລາ ກາເມນາ ເຈົ້າຄອງນະຄອນຫຼວງມາດຣິດໄດ້ຕາງໜ້າປະຊາຊົນທົ່ວນະຄອນຫຼວງສະແດງຄວາມຍິນດີຕ້ອນຮັບທ່ານສີຈິ້ນຜິງ ປະທານປະເທດຈີນທີ່ມາຢ້ຽມຢາມແອດສະປາຍ. ທ່ານກາເມນາກ່າວວ່າ: ການໄປມາຫາສູ່ກັນລະຫວ່າງນະຄອນຫຼວງມາດຣິດກັບຈີນໄດ້ແໜ້ນແຟ້ນຍິ່ງໆຂຶ້ນ, ບຸນກຸດຈີນໄດ້ກາຍເປັນບຸນສຳຄັນທີ່ໄດ້ຮັບຄວາມນິຍົມສູງຈາກປະຊາຊົນມາດຣິດ. ການຢ້ຽມຢາມທາງລັດຖະກິດຂອງທ່ານສີຈິ້ນຜິງເທື່ອນີ້ຈະສ້າງໂອກາດຫຼາຍກວ່າເກົ່າໃນການຮ່ວມມືລະຫວ່າງແອດສະປາຍ ແລະຈີນ. ນະຄອນຫຼວງມາດຣິດຫວັງຈະເພີ່ມທະວີການແລກປ່ຽນ ແລະການຮ່ວມມືກັບຈີນ.
ທ່ານກາເມນາໄດ້ມອບລູກກະແຈຄຳນະຄອນຫຼວງມາດຣິດໃຫ້ທ່ານສີຈິ້ນຜິງ ເຊິ່ງໄດ້ຮັບສຽງຕົບມືຊົມເຊີຍຈາກຜູ້ຊົມຢ່າງສະໜັ່ນຫວັ່ນໄຫວ.
ທ່ານສີຈິ້ນຜິງໄດ້ກ່າວປາໄສວ່າ: ທ່ານຍິນດີມາຢ້ຽມຢາມນະຄອນຫຼວງມາດຣິດ ແລະຮັບລູກກະແຈຄິງມາດຣິດ ເຊິ່ງບໍ່ພຽງແຕ່ເປັນການໃຫ້ກຽດຂ້າພະເຈົ້າ, ຍັງສະແດງເຖິງນ້ຳໃຈມິດຕະພາບທີ່ດີລະຫວ່າງປະຊາຊົນແອດສະປາຍ ແລະຈີນ. ຫວັງວ່າລູກກະແຈນີ້ສາມາດເປີດປະຕູການໄປມາຫາສູ່ກັນລະຫວ່າງຈີນ ແລະປະເທດຕາເວັນຕົກ ແລະສ້າງມິດຕະພາບລະຫວ່າງປະຊາຊົນສອງຝ່າຍ.