ອົງການສະຫະປະຊາຊາດໄດ້ຈັດກອງປະຊຸມລະນຶກ “ວັນສາກົນເພື່ອສະໜັບສະໜູນປະຊາຊົນປາແລັສຕິນ” ໃນວັນທີ 28 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງໂທລະເລກຊົມເຊີຍເຖິງກອງປະຊຸມດັ່ງກ່າວ ໂດຍລະບຸວ່າ: ບັນຫາປາແລັສຕິນແມ່ນເຫງົ້າບັນຫາພື້ນຖານຂອງບັນຫາຕາເວັນອອກກາງ ແລະ ໄດ້ພົວພັນເຖິງຄວາມສະຫງົບແລະຄວາມເປັນລະບຽບຮຽບຮ້ອຍຖາວອນແລະການພັດທະນາຄວາມຈະເລີນຮຸ່ງເຮືອງຂອງປາແລັສຕິນແລະປະເທດຕາເວັນອອກກາງອື່ນໆ. ການທີ່ແກ້ໄຂບັນຫາປາແລັສຕິນຢ່າງທ່ຽງທຳຮອບດ້ານແມ່ນຈິດໃຈລວມຂອງປະຊາຄົມໂລກ ໂດຍສອດຄ່ອງກັບຜົນປະໂຫຍດຂອງປະຊາຊົນປະເທດພາກພື້ນ ລວມທັງປະຊາຊົນປາແລັສຕິນ ແລະ ມີຜົນດີຕໍ່ການຊຸກຍູ້ສັນຕິພາບແລະສະຖຽນລະພາບຂອງໂລກ.
ທ່ານສີຈິ້ນຜິງ ເນັ້ນໜັກວ່າ: ຈີນເດັດດ່ຽວສະໜັບສະໜູນແລະຊຸກຍູ້ຂະບວນການສັນຕິພາບຕາເວັນອອກກາງ, ສະໜັບສະໜູນພາລະກິດທີ່ເປັນທຳຂອງປະຊາຊົນປາແລັສຕິນໃນການຟື້ນຟູສິດທິແຫ່ງຊາດທີ່ຖືກຕ້ອງຕາມກົດໝາຍ; ຈີນຍິນດີສືບຕໍ່ຮ່ວມກັບປະຊາຄົມໂລກ ສ້າງກົນໄກຊຸກຍູ້ສັນຕິພາບສາກົນໃໝ່, ຊຸກຍູ້ໃຫ້ປາແລັສຕິນແລະອິສຣາແອນຟື້ນຟູການເຈລະຈາສັນຕິພາບໂດຍໄວ ແລະ ມີຄວາມພະຍາຍາມຢ່າງບໍ່ລົດລະເພື່ອບັນລຸສັນຕິພາບຮອບດ້ານ, ທ່ຽງທຳ ແລະ ຖາວອນຢູ່ຕາເວັນອອກກາງ.