ທ່ານສີຈິ້ນຜິງພົບປະເຈລະຈາກັບປະທານາທິບໍດີປານາມາ
ວັນທີ 3 ທັນວານີ້, ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານຈວນ ຄາຣອສ ວາເລຣາ ປະທານາທິບໍດີປານາມາ. ປະມຸກລັດສອງປະເທດໄດ້ຕີລາຄາຢ່າງສູງຕໍ່ທ່ວງທ່າຂະຫຍາຍຕົວທີ່ດີງາມແຫ່ງການພົວພັນລະຫວ່າງສອງປະເທດ ແລະ ຜົນສຳເລັດດ້ານການຮ່ວມມືລະຫວ່າງສອງປະເທດ ນັບແຕ່ຈີນ-ປານາມາສ້າງຕັ້ງສາຍພົວພັນທາງການທູດມານີ້ ພ້ອມທັງໄດ້ກ້າວເຖິງຂັ້ນມີຄວາມເຫັນເອກະພາບກັນຢ່າງກວ້າງຂວາງ ເພື່ອຊຸກຍູ້ການພົວພັນລະຫວ່າງສອງປະເທດ.
ທ່ານສີຈິ້ນຜິງກ່າວວ່າ, ນັບແຕ່ຈີນແລະປານາມາສ້າງຕັ້ງສາຍພົວພັນທາງການທູດໄດ້ໜຶ່ງປີເຄິ່ງມານີ້, ການພົວພັນລະຫວ່າງສອງປະເທດໄດ້ຂະຫຍາຍຕົວຢ່າງໜັກແໜ້ນ, “ຍຸດທະສາດຈໍລະຈອນສິນຄ້າແຫ່ງຊາດຮອດປີ 2030” ຂອງປານາມາແທດເໝາະກັບຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນໃນລະດັບສູງ, ສອງຝ່າຍຄວນເພີ່ມທະວີການເຊື່ອມຕໍ່ທາງຍຸດທະສາດ, ຊຸກຍູ້ການເຊື່ອມຈອດກັນ. ຈີນຍິນດີດຳເນີນການເຈລະຈາການຄ້າເສລີກັບປານາມາ, ຍິນດີໃຫ້ປານາມາສົ່ງອອກເຄື່ອງທະເລ, ຜະລິດຕະພັນຊີ້ນ ແລະ ໝາກນັດສູ່ຈີນ, ຄວນເພີ່ມທະວີການແລກປ່ຽນໃນຂົງເຂດວັດທະນະທຳ ແລະ ລະຫວ່າງທ້ອງຖິ່ນ, ເພີ່ມທະວີການຮ່ວມມືຫຼາຍຝ່າຍ, ຮ່ວມກັນຮັບມືກັບສິ່ງທ້າທາຍຈາກລັດທິປົກປ້ອງ ແລະ ລັດທິຝ່າຍດຽວ.
ທ່ານວາເລຣາກ່າວວ່າ, ນັບແຕ່ປານາມາ ແລະ ຈີນສ້າງຕັ້ງສາຍພົວພັນທາງການທູດເປັນຕົ້ນມາ, ການພົວພັນລະຫວ່າງສອງຝ່າຍໄດ້ຂະຫຍາຍຕົວເປັນຢ່າງດີ. ປານາມາຍຶດໝັ້ນໃນການປະຕິບັດນະໂຍບາຍຈີນດຽວ, ສະໜັບສະໜູນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ຍິນດີລົງນາມໃນສັນຍາການຄ້າເສລີກັບຈີນໂດຍໄວ ແລະ ຍົກລະດັບການຄ້າລະຫວ່າງສອງປະເທດ. ປານາມາຫວັງວ່າ, ຈະສາມາດນຳໃຊ້ທ່າແຮງດ້ານທີ່ຕັ້ງພູມສາດ ແລະ ການຈໍລະຈອນສິນຄ້າຂອງຕົນ ເພື່ອກາຍເປັນປະຕູ ແລະ ຂົວທີ່ເຊື່ອມຕໍ່ຈີນກັບພາກພື້ນອາເມຣິກາກາງ ແລະ ອາເມຣິກາລາຕິນ.
ປະມຸກລັດສອງປະເທດຍັງໄດ້ເປັນສັກຂີພິຍານໃຫ້ແກ່ການລົງນາມໃນເອກະສານຮ່ວມມືສອງຝ່າຍຫຼາຍສະບັບ ແລະ ຮ່ວມກັນຖະແຫຼງຂ່າວ.