ກອງປະຊຸມສາກົນ “ເຂົ້າໃຈຈີນ” ຄັ້ງທີ 3 ໄດ້ໄຂຂຶ້ນຢູ່ນະຄອນຫຼວງປັກກິ່ງໃນວັນທີ 16 ທັນວານີ້. ທ່ານ ສີຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍ ໂດຍໄດ້ສະແດງຄວາມຍິນດີຕ້ອນຮັບຕໍ່ບຸກຄົນສຳຄັນໃນວົງການຕ່າງໆ ເຊັ່ນ: ການເມືອງ, ຍຸດທະສາດ, ວິສາຫະກິດ ແລະວິຊາການຂອງບັນດາປະເທດທີ່ມາເຂົ້າຮ່ວມກອງປະຊຸມ.
ທ່ານ ສີຈິ້ນຜິງ ກ່າວວ່າ: ໂລກໃນປັດຈຸບັນ ໄດ້ຜະເຊີນໜ້າກັບການປ່ຽນແປງໃຫຍ່ທີ່ບໍ່ເຄີຍມີມາກ່ອນໃນຮອບຮ້ອຍປີ, ແຕ່ສັນຕິພາບແລະການພັດທະນາ ຍັງແມ່ນຫົວຂໍ້ຫຼັກຂອງຍຸກສະໄໝ, ຂະນະດຽວກັນ, ມະນຸດເຮົາກໍຜະເຊີນໜ້າກັບສິ່ງທ້າທາຍຮ່ວມກັນຢ່າງຫຼວງຫຼາຍ. ຈີນຍິນດີຮ່ວມກັບບັນດາປະເທດໃນການຕັ້ງໜ້າຊຸກຍູ້ການສ້າງສາຍພົວພັນລະຫວ່າງຊາດແບບໃໝ່ທີ່ເຄົາລົບເຊິ່ງກັນແລະກັນ, ມີຄວາມຍຸຕິທຳ, ມີຄວາມເປັນທຳ, ຮ່ວມມື ແລະຕ່າງຝ່າຍຕ່າງມີປະໂຫຍດ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ປະກອບສ່ວນໃໝ່ໃຫຍ່ຫຼວງ ກວ່າເກົ່າເພື່ອສັນຕິພາບແລະການພັດທະນາຂອງໂລກ.
ທ່ານ ສີຈິ້ນຜິງ ເນັ້ນວ່າ: ປີນີ້ແມ່ນປີຄົບຮອບ 40 ປີແຫ່ງການປະຕິຮູບແລະເປີດປະຕູສູ່ພາຍນອກຂອງຈີນ. ຕະຫຼອດໄລຍະ 40 ປີທີ່ຜ່ານມາ ເປັນການຂຽນປຶ້ມປະຫວັດສາດໜ້າໃໝ່ທີ່ສະຫງ່າຜ່າເຜີຍຂອງການພັດທະນາຂອງຈີນ, ການພົວພັນລະຫວ່າງຈີນກັບໂລກ ໄດ້ໃກ້ຊິດກັນຂຶ້ນຕື່ມອີກ. ຈີນຈະສືບຕໍ່ລົງເລິກການປະຕິຮູບຢ່າງຮອບດ້ານແລະເປີດກວ້າງການເປີດປະຕູຢ່າງຮອບດ້ານ, ຍຶດໝັ້ນຈັດຕັ້ງປະຕິບັດທັດສະນະການພັດທະນາໃໝ່, ລົງເລິກຊຸກຍູ້ການປະຕິຮູບອົງປະກອບດ້ານການສະໜອງ, ຊຸກຍູ້ວຽກງານຕ່າງໆ ຄື: ເຮັດໃຫ້ການເຕີບໂຕມີຄວາມໝັ້ນທ່ຽງ, ຊຸກຍູ້ການປະຕິຮູບ, ປັບປຸງອົງປະກອບ, ສ້າງຜົນປະໂຫຍດແກ່ຊີວິດການເປັນຢູ່ຂອງປະຊາຊົນ ແລະ ປ້ອງກັນຄວາມສ່ຽງຢ່າງເປັນເອກະພາບກັນ, ຊຸກຍູ້ເສດຖະກິດຈີນໃຫ້ມີການພັດທະນາດ້ວຍຄຸນນະພາບສູງ ເພື່ອສະໜອງໂອກາດການຮ່ວມມືໃຫ້ໂລກຫຼາຍກວ່າເກົ່າ.
ທ່ານ ສີຈິ້ນຜິງ ຫວັງວ່າ: ແຂກທີ່ມາເຂົ້າຮ່ວມກອງປະຊຸມຈະລົງເລິກປຶກສາຫາລືກັນ, ເຕົ້າໂຮມຄວາມເຫັນເປັນເອກະພາບກັນ, ເພີ່ມທະວີການເຂົ້າໃຈປະເທດຈີນໃຫ້ດີກວ່າເກົ່າ ແລະຊ່ວຍໂລກເຂົ້າໃຈປະເທດຈີນໃຫ້ດີກວ່າເກົ່າ, ຊຸກຍູ້ການແລກປ່ຽນແລະການຮ່ວມມືລະຫວ່າງຈີນກັບໂລກ ແລະບັນລຸເປົ້າໝາຍການພັດທະນາແລະຄວາມຈະເລີນຮຸ່ງເຮືອງຮ່ວມກັນ.