ວັນທີ 19 ທັນວານີ້, ຫ້ອງການຖະແຫຼງຂ່າວລັດຖະບານຈີນໄດ້ຈັດພິທີຕ້ອນຮັບປີໃໝ່ 2019 ຢູ່ຫໍພິພິທະພັນແຫ່ງຊາດຈີນ, ທ່ານຮວງຂຸ່ນມີງ ກຳມະການກົມການເມືອງສູນກາງພັກກອມມູນິດຈີນ, ຫົວໜ້າຄະນະໂຄສະນາສູນກາງພັກກອມມູນິດຈີນໄດ້ເຂົ້າຮ່ວມພິທີດັ່ງກ່າວ.
ທ່ານຮວງຂຸ່ນມີງໄດ້ພົບປະໂອ້ລົມກັບແຂກຜູ້ມີກຽດຈີນ ແລະຕ່າງປະເທດທີ່ເຂົ້າຮ່ວມພິທີດັ່ງກ່າວ ແລະສະແດງຄວາມຂອບໃຈໃນຄວາມພະຍາຍາມຂອງບັນດາທ່ານໃນການເລົ່ານິທານເລື່ອງເມືອງຈີນທີ່ດີ, ສົ່ງເສີມການສື່ສານແລກປ່ຽນກັນລະຫວ່າງຈີນກັບຕ່າງປະເທດ ແລະອື່ນໆ. ທ່ານກ່າວວ່າ: ປີ 2019 ແມ່ນປີທີ່ສາທາລະນະລັດ ປະຊາຊົນຈີນສະຖາປະນາຂຶ້ນຄົບຮອບ 70 ປີ, ໃນ 70 ປີຜ່ານມາ, ປະຊາຊົນຈີນໄດ້ບຸກບືນສູ້ຊົນຜ່ານຜ່າຄວາມຫຍຸ້ງຍາກ, ສ້າງສາພັດທະນາປະເທດໃຫ້ມີການປ່ຽນແປງຢ່າງໃຫຍ່ຫຼວງແບບໜ້າມືເປັນຫຼັງມື. ຫວັງວ່າເພື່ອນມິດຕ່າງປະເທດຈະມາທ່ຽວມາເບິ່ງຈີນໃຫ້ຫຼາຍກວ່າເກົ່າ, ຮັບຮູ້ສະພາບຄວາມເປັນຈິງດ້ານການພັດທະນາຂອງຈີນ ແລະເລົ່າເລື່ອງຈີນໃນຄວາມເປັນຈິງໃນຫຼາຍແງ່ມູມ ແລະຮອບດ້ານຕໍ່ຊາວໂລກ.
ນອກຈາກນີ້, ຍັງມີນັກວິຊາການສື່ມວນຊົນພາຍໃນ ແລະຕ່າງປະເທດ, ໂຄສົກຖະແຫຼງຂ່າວຂອງອົງການສູນກາງພັກ ແລະລັດແຫ່ງຊາດ, ເອກອັກຄະລັດຖະທູດຕ່າງປະເທດປະຈຳຈີນ, ຜູ້ຕາງໜ້າອົງການຈັດຕັ້ງສາກົນ ແລະອື່ນໆຈຳນວນຫຼາຍກວ່າ 400 ຄົນໄດ້ເຂົ້າຮ່ວມພິທີດັ່ງກ່າວ.