ເວທີສື່ມວນຊົນໃໝ່ລະດັບຊາດທີ່ນຳໃຊ້ເຕັກໂນໂລຊີເຄືອຂ່າຍການສື່ສານເຄື່ອນທີ່ຮຸ່ນທີ 5 ຫຼື 5G ແຫ່ງທຳອິດຂອງຈີນໄດ້ເລີ່ມສ້າງຂຶ້ນແລ້ວໃນວັນທີ 28 ທັນວານີ້ຢູ່ສະຖານີວິທະຍຸ-ໂທລະພາບສູນກາງຈີນ.
ໃນວັນດັ່ງກ່າວ ຢູ່ນະຄອນຫຼວງປັກກິ່ງ, ສະຖານີວິທະຍຸ-ໂທລະພາບສູນກາງ ແລະ ບໍລິສັດໄຊນາເທລີຄອມ, ບໍລິສັດໄຊນາໂມບາຍ, ບໍລິສັດໄຊນາຢູນີຄອມ ພ້ອມດ້ວຍບໍລິສັດຫົວເຫວີຍ ໄດ້ຮ່ວມກັນລົງນາມໃນສັນຍາຂອບການຮ່ວມມືເພື່ອສ້າງເວທີສື່ມວນຊົນໃໝ່ 5G. ອີງຕາມສັນຍາດັ່ງກ່າວ, ສະຖານີວິທະຍຸ-ໂທລະພາບສູນກາງ ແລະ 4 ບໍລິສັດດັ່ງກ່າວຈະຮ່ວມມືກັນເພື່ອສ້າງເວທີສື່ມວນຊົນໃໝ່ 5G.
ຂ່າວລາຍງານຕື່ມວ່າ ຫ້ອງທົດລອງການນຳໃຊ້ສື່ມວນຊົນ 5G ຈະສຳເລັດການກວດກາເຕັກນິກໃນທຸກດ້ານໃນໄລຍະ 6 ເດືອນຕົ້ນປີ 2019. ກ່ອນໜ້ານີ້, ສະຖານີວິທະຍຸ-ໂທລະພາບສູນກາງ ກັບ 4 ບໍລິສັດດັ່ງກ່າວ ໄດ້ດຳເນີນການທົດລອງການສົ່ງຂໍ້ມູນດ້ວຍເຕັກນິກ 5G ເປັນເວລາ 3 ເດືອນ ແລະ ໄດ້ປະສົບຜົນສຳເລັດຢ່າງຈົບງາມ.