ປີນີ້ເປັນປີຄົບຮອບ 40 ປີທີ່ຄະນະປະຈຳສະພາປະຊາຊົນແຫ່ງຊາດຈີນສົ່ງ“ສານເຖິງພີ່ນ້ອງຮ່ວມຊາດໄຕ້ຫວັນ” ຄົບຮອບ 40 ປີ. ພິທີລະນຶກການອອກຖະແຫຼງການເຖິງພີ່ນ້ອງຮ່ວມຊາດໄຕ້ຫວັນຄົບຮອບ 40 ປີໄດ້ຈັດຂຶ້ນຢ່າງຍິ່ງໃຫຍ່ຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງໃນວັນທີ 2 ມັງກອນນີ້. ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ,ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ກ່າວປາໄສສຳຄັນໃນພິທີດັ່ງກ່າວໂດຍຕາງໜ້າໃຫ້ປະຊາຊົນແຜ່ນດິນໃຫຍ່ຈີນສົ່ງຄວາມຢື້ຢາມຖາມຂ່າວຢ່າງຈິງໃຈແລະອວຍພອນໄຊອັນປະເສີດເຖິງພີ່ນ້ອງຮ່ວມຊາດໄຕ້ຫວັນທຸກຖ້ວນໜ້າ.
ໃນພິທີດັ່ງກ່າວ, ທ່ານສີຈິ້ນຜິງຊີ້ໃຫ້ເຫັນວ່າ: ຄວາມເປັນຈິງທາງປະຫວັດສາດແລະທາງນິຕິກຳກ່ຽວກັບໄຕ້ຫວັນເປັນສ່ວນໜຶ່ງຂອງຈີນ, ແຜ່ນດິນໃຫຍ່ແລະໄຕ້ຫວັນ ກໍຄືສອງຝັ່ງຊ່ອງແຄບໄຕ້ຫວັນຕ່າງກໍຂຶ້ນກັບຈີນດຽວເທົ່ານັ້ນເຊິ່ງເປັນສິ່ງທີ່ບໍ່ວ່າຜູ້ໃດຫຼືອິດທິກຳລັງໃດກໍຕາມກໍ ບໍ່ສາມາດປ່ຽນແປງໄດ້. ພີ່ນ້ອງຮ່ວມຊາດສອງຝັ່ງຊ່ອງແຄບໄຕ້ຫວັນລ້ວນແຕ່ເປັນຄົນຈີນ, ຄວາມຮັກແພງກັນທີ່ເປັນໄປຕາມທຳມະຊາດໃນຖານະເປັນພີ່ນ້ອງຮ່ວມອຸທອນດຽວກັນແລະຊ່ວຍເຫຼືອເຊິ່ງກັນແລະກັນແລະຄວາມຍອມຮັບການເປັນເຊື້ອຊາດຈີນນັ້ນ ເປັນສິ່ງທີ່ບໍ່ວ່າຜູ້ໃດຫຼືອິດທິກຳລັງໃດກໍຕາມກໍ ບໍ່ສາມາດປ່ຽນແປງໄດ້.ຕາມກະແສຂອງຍຸກສະໄໝ ສະຖານະການຢູ່ໄຕ້ຫວັນຕ້ອງມຸ່ງໜ້າໄປສູ່ສັນຕິພາບ,ສະຖຽນລະພາບ, ການພົວພັນລະຫວ່າງສອງຝັ່ງຈະຂະຫຍາຍຕົວໄປໜ້ານັ້ນ ບໍ່ວ່າຜູ້ໃດຫຼືອິດທິກຳລັງໃດກໍຕາມກໍ ບໍ່ສາມາດສະກັດກັ້ນໄດ້.ທ່າອ່ຽງປະຫວັດສາດທີ່ປະເທດຊາດເຂັ້ມແຂງ, ຄວາມຈະເລີນຮຸ່ງເຮືອງຂອງຊາດໄດ້ຮັບການຟື້ນຟູຄືນໃໝ່, ສອງຝັ່ງຈະທ້ອນໂຮມເຂົ້າກັນເປັນເອກະພາບນັ້ນ ຍິ່ງເປັນສິ່ງທີ່ບໍ່ວ່າຜູ້ໃດອິດທິກຳລັງໃດກໍຕາມກໍ ບໍ່ສາມາດສະກັດກັ້ນໄດ້.
ທ່ານສີຈິ້ນຜິງກ່າວວ່າ: ປະເທດຊາດຕ້ອງທ້ອນໂຮມເປັນເອກະພາບ ແລະກໍຈະທ້ອນໂຮມເຂົ້າເປັນເອກະພາບກັນຢ່າງແນ່ນອນ. ນີ້ແມ່ນຂໍ້ສະຫຼຸບທາງປະຫວັດສາດໃນຂະບວນວິວັດການພັດທະນາການພົວພັນລະຫວ່າງສອງຝັ່ງໃນໄລຍະ 70 ປີຜ່ານມາ ທັງເປັນຄວາມຮຽກຮ້ອງຕ້ອງການທີ່ຕ້ອງເປັນໄປໃນການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງຊົນຊາດຈີນ ຄືນໃໝ່ໃນຍຸກໃໝ່. ພີ່ນ້ອງຮ່ວມຊາດໄຕ້ຫວັນທັງຫຼາຍລ້ວນແຕ່ເປັນສະມາຊິກຂອງເຊື້ອຊາດຈີນ, ຄວນເປັນຄົນຈີນທີ່ຊື່ສັດເປັນທຳ. ໃນຂະບວນການທີ່ຊາດຈີນພວມກ້າວໄປສູ່ການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ນັ້ນ, ພີ່ນ້ອງຮ່ວມຊາດສອງຝັ່ງຕ້ອງຮ່ວມກັນແບກຫາບພາລະໜ້າທີ່ຟື້ນຟູຄວາມຈະເລີນຮຸ່ງເຮືອງຂອງຊາດ, ຮ່ວມກັນພາກພູມໃຈນຳການຟື້ນຟູຄວາມຈະເລີນຮຸ່ງເຮືອງຂອງຊາດ. ທ່ານສີຈິ້ນຜິງສະເໜີວ່າ: ຄວາມແຕກຕ່າງກັນທາງດ້ານລະບອບ ບໍ່ແມ່ນອຸປະສັກທີ່ກີດຂວາງການທ້ອນໂຮມປະເທດຊາດເຂົ້າເປັນເອກະພາບ, ຍິ່ງບໍ່ແມ່ນຂໍ້ອ້າງໃນການແບ່ງແຍກປະເທດຊາດ. ຄວນຄົ້ນຄວ້າແຜນການໄຕ້ຫວັນສອງລະບອບ, ເຮັດໃຫ້ພຶດຕິກຳການທ້ອນໂຮມປະເທດຊາດເຂົ້າເປັນເອກະພາບໂດຍສັນຕິມີເນື້ອໃນຫຼາຍຂຶ້ນກວ່າເກົ່າ.
ທ່ານສີຈິ້ນຜິງກ່າວຕື່ມວ່າ: ບັນຫາຄວາມຂັດແຍ້ງທາງການເມືອງລະຫວ່າງສອງຝັ່ງຊ່ອງແຄບໄຕ້ຫວັນ ເຊິ່ງມີມາເປັນເວລາດົນນານມາແລ້ວນັ້ນ ເປັນບັນຫາຮາກເຫງົ້າທີ່ກະທົບເຖິງການພັດທະນາຢ່າງໝັ້ນທ່ຽງແລະຂະຫຍາຍຕົວໄປໜ້າຂອງການພົວພັນລະຫວ່າງສອງຝັ່ງ, ສອງຝ່າຍຄວນມີທ່າທີທີ່ມີຄວາມຮັບຜິດຊອບຕໍ່ເຊື້ອຊາດແລະຄົນຮຸ່ນຫຼັງ, ສຸມທຸກຄວາມພະຍາຍາມ ເພື່ອແກ້ໄຂການເປັນປໍລະປັກກັນທາງການເມືອງລະຫວ່າງສອງຝັ່ງໂດຍໄວເທົ່າທີ່ຈະໄວໄດ້.