ຕາມຂ່າວCRI: ໃນໂອກາດບຸນກຸດຈີນທີ່ເປັນບຸນປະເພນີທີ່ສຳຄັນທີ່ສຸດຂອງຈີນໃກ້ຈະມາເຖິງ,ຜູ້ເຮັດວຽກແລະນັກຮຽນນັກສຶກສາຢູ່ຕ່າງແຂວງແລະອື່ນໆຈະກັບເມືອຢາມບ້ານໃນໄລຍະບຸນກຸດຈີນ,ເຊິ່ງເປັນໄລຍະການຂົນສົ່ງຜູ້ໂດຍສານຈຳນວນຫຼາຍທີ່ສຸດຢູ່ໃນທົ່ວປະເທດ. ຂ່າວແຈ້ງວ່າ: ຈຳນວນການຂົນສົ່ງຜູ້ໂດຍສານໃນໄລຍະບຸນກຸດຈີນປີນີ້ຈະມີເຖິງ 2,99 ຕື້ເທື່ອຄົນ, ຍອດຈຳນວນຜູ້ໂດຍສານຈະເພີ່ມຂຶ້ນເລັກໜ້ອຍເມື່ອທຽບໃສ່ປີ 2018.
ການຂົນສົ່ງຜູ້ໂດຍສານໃນໄລຍະບຸນກຸດຈີນຂອງປີນີ້ຈະເລີ່ມຕົ້ນໃນວັນທີ 21 ມັງກອນນີ້ແລະຈະສິ້ນສຸດໃນວັນທີ 1 ມີນາປີນີ້,ລວມມີ 40 ວັນ. ຕອນບ່າຍວັນທີ 7 ມັງກອນນີ້, ຄະນະກຳມະການພັດທະນາແລະປະຕິຮູບແຫ່ງລັດຈີນແລະພາກສ່ວນອື່ນໆໄດ້ຮ່ວມກັນຈັດກອງປະຊຸມທາງໂທລະສັບແລະວິດີໂອກ່ຽວກັບການຂົນສົ່ງຜູ້ໂດຍສານໃນຂອບເຂດທົ່ວປະເທດໃນໄລຍະບຸນກຸດຈີນປີ 2019,ຕາມການຄາດຄະເນ,ປີ 2019, ຈຳນວນການຂົນສົ່ງຜູ້ໂດຍສານຂອງທົ່ວປະເທດໃນໄລຍະບຸນກຸດຈີນຈະມີເຖິງ 2,99 ຕື້ເທື່ອຄົນ, ເພີ່ມຂຶ້ນ 0,6% ເມື່ອທຽບໃສ່ໄລຍະດຽວກັນຂອງປີ 2018. ໃນນັ້ນ, ຈຳນວນການຂົນສົ່ງຜູ້ໂດຍສານທາງລົດໄຟຈະບັນລຸ 413 ລ້ານເທື່ອຄົນ, ເພີ່ມຂຶ້ນ 8,3%, ການບິນພົນລະເຮືອນຈະມີເຖິງ 73 ລ້ານເທື່ອຄົນ,ເພີ່ມຂຶ້ນ 12%,ສ່ວນທາງນ້ຳແລະທາງຫຼວງຈະຮັກສາຢູ່ໃນລະດັບເທົ່າທຽມກັບປີ 2018.