ຕາມຂ່າວ CRI: ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 7 ມັງກອນນີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນເປີດເຜີຍວ່າ, ໂດຍຕອບສະໜອງຕາມຄຳເຊື້ອເຊີນຂອງທ່ານຢູລິ ມໍເຣີ ປະທານາທິບໍດີສະຫະພັນສວິສແລະທ່ານຄຼາວສ໌ ສະວັບ, ຜູ້ກໍ່ຕັ້ງທັງເປັນປະທານບໍລິຫານງານຂອງເວທີປຶກສາຫາລືເສດຖະກິດໂລກ, ທ່ານຫວາງຊີຊ່ານ ຮອງປະທານປະເທດຈີນຈະເດີນທາງຢ້ຽມຢາມສວິສແຕ່ວັນທີ 21 ຫາວັນທີ 24 ມັງກອນນີ້, ແລະຈະເຂົ້າຮ່ວມກອງປະຊຸມປະຈຳປີ 2019 ຂອງເວທີປຶກສາຫາລືເສດຖະກິດໂລກດາວົສ.
ມີນັກຂ່າວຖາມວ່າ, ຈີນຈະສົ່ງສັນຍານຫຍັງແດ່ໃຫ້ປະຊາຄົມໂລກໂດຍຜ່ານກອງປະຊຸມຄັ້ງນີ້?
ທ່ານລູ້ຄ່າງກ່າວວ່າ: “ເຖິງວ່າສະພາບແວດລ້ອມພາຍນອກມີຄວາມບໍ່ແນ່ນອນແລະຄວາມບໍ່ໝັ້ນທ່ຽງຈຳນວນໜຶ່ງກໍຕາມ, ແຕ່ການພັດທະນາຂອງຈີນມີຄວາມໜັກແໜ້ນພຽງພໍແລະມີກຳລັງບົ່ມຊ້ອນຢ່າງມະຫາສານ, ທ່ວງທ່າການພັດທະນາເປັນຢ່າງດີຂອງເສດຖະກິດຈີນໃນໄລຍະຍາວຈະບໍ່ມີການປ່ຽນແປງ. ພວກເຮົາມີຄວາມໝັ້ນໃຈຢ່າງເຕັມທີ່ຕໍ່ສະພາບພື້ນຖານເສດຖະກິດຈີນທີ່ພັດທະນາເປັນຢ່າງດີໃນໄລຍະຍາວ, ພວກເຮົາຈະບັນລຸເປົ້າໝາຍຮັກສາອັດຕາການເຕີບໂຕໃນລະດັບກາງສູງໃນຂະນະດຽວກັນກໍຈະໄດ້ຮັບຄວາມຄືບໜ້າໃນການພັດທະນາໃນລະດັບກາງສູງ. ທ່ານຫວາງຊີຊ່ານຈະກ່າວຄຳປາໄສເຖິງສະພາບການພັດທະນາຂອງຈີນກໍຄືຄວາມເຫັນແລະຈຸດຢືນຂອງຈີນກ່ຽວກັບບັນຫາສາກົນທີ່ສຳຄັນເຊັ່ນເສດຖະກິດໂລກາພິວັດແລະອື່ນໆໃນກອງປະຊຸມຄັ້ງນີ້. ພວກເຮົາຍິນດີຕ້ອນຮັບບັນດາຝ່າຍຮ່ວມກັບຈີນ, ບົນຈິດໃຈຮ່ວມກັນປຶກສາຫາລື, ຮ່ວມກັນກໍ່ສ້າງແລະຮ່ວມກັນຊົມໃຊ້, ປະກອບສ່ວນຢ່າງຕັ້ງໜ້າເຂົ້າໃນການສ້າງເສດຖະກິດໂລກແບບເປີດປະຕູແລະຊຸກຍູ້ການພັດທະນາແລະຄວາມກ້າວໜ້າຮ່ວມກັນຂອງມວນມະນຸດ”