ວັນທີ 7 ມັງກອນນີ້, ທ່ານຊຸ່ຍທ່ຽນໄຂ ເອກອັກຄະລັດຖະທູດຈີນປະຈຳອາເມຣິກາ ໄດ້ກ່າວປາໄສໃນງານລ້ຽງອາຫານຄ່ຳທີ່ຈັດຂຶ້ນໂດຍສະມາຄົມການຄ້າຈີນຢູ່ອາເມຣິກາໃນໂອກາດປີໃໝ່ສາກົນໝູນວຽນມາເຖິງ ວ່າ: ຈີນຈະສືບຕໍ່ຮ່ວມມືກັບອາເມຣິກາ, ສ້າງສາຍພົວພັນລະຫວ່າງສອງຝ່າຍໃຫ້ໝັ້ນທ່ຽງແລະພັດທະນາຢ່າງໜັກແໜ້ນ, ການຮ່ວມມືແມ່ນທາງເລືອກທີ່ຖືກຕ້ອງພຽງໜຶ່ງດຽວລະຫວ່າງຈີນແລະອາເມຣິກາ.
ທ່ານຊຸ່ຍທ່ຽນໄຂ ກ່າວວ່າ: ປະຫວັດສາດໄດ້ຢັ້ງຢືນຢ່າງເຕັມສ່ວນແລ້ວວ່າ ຈີນດຳເນີນການປະຕິຮູບແລະເປີດປະຕູ່ສູ່ພາຍນອກ ແລະ ສາຍພົວພັນລະຫວ່າງຈີນ-ອາເມຣິກາກັບຄືນສູ່ສະພາບຄວາມເປັນປົກກະຕິແລະພັດທະນາຢ່າງປອດໃສ ໄດ້ສ້າງຄວາມຜາສຸກໃຫ້ແກ່ສອງປະເທດ ກໍຄືທົ່ວໂລກ. ຈີນ, ອາເມຣິກາ ແລະ ໂລກ ລ້ວນແຕ່ມີການປ່ຽນແປງຢ່າງເລິກເຊິ່ງ ຕະຫຼອດໄລຍະ 40 ປີຜ່ານມາ, ນີ້ເປັນການຢືນຢັນແລ້ວວ່າ ສາຍພົວພັນລະຫວ່າງຈີນ-ອາເມຣິກາຕ້ອງກ້າວໄປຕາມຍຸກສະໄໝ. ຈີນຈະສືບຕໍ່ເປີດກວ້າງການຮ່ວມມືກັບອາເມຣິກາບົນພື້ນຖານຕ່າງຝ່າຍຕ່າງມີຜົນປະໂຫຍດ, ຄຸ້ມຄອງແລະຄວບຄຸມຄວາມຂັດແຍ້ງກັນບົນພື້ນຖານເຄົາລົບເຊິ່ງກັນແລະກັນ ແລະ ພັດທະນາສາຍພົວພັນລະຫວ່າງສອງປະເທດໂດຍຖືເອົາການປະສານງານ, ການຮ່ວມມື ແລະ ຄວາມໝັ້ນທ່ຽງເປັນທິດທາງພື້ນຖານ.
ທ່ານຊຸ່ຍທ່ຽນໄຂ ຊີ້ໃຫ້ເຫັນວ່າ: ໃນໄລຍະສຳຄັນ ຄື: ຈີນດຳເນີນການປະຕິຮູບແລະເປີດປະຕູສູ່ພາຍນອກຄົບຮອບ 40 ປີ ແລະ ຈີນ-ອາເມຣິກາສ້າງຕັ້ງສາຍພົວພັນທາງການທູດຄົບຮອບ 40 ປີນີ້ ເປັນຈຸດເລີ່ມຕົ້ນໃໝ່ຂອງຈີນແລະອາເມຣິກາໃນການວາງແຜນພັດທະນາໃນອະນາຄົດເພື່ອກ້າວໄປສູ່ຜົນສຳເລັດອັນຍິ່ງໃຫຍ່ກວ່າເກົ່າ. ຂະນະທີ່ບຸກຄົນໃນວົງການອຸດສາຫະກຳການຄ້າຂອງຈີນແລະອາເມຣິກາຄວນເລັງໃສ່ສະພາບການລວມ, ຮັກສາການເປີດກວ້າງ ແລະ ຮູ້ຈຳແນກສິ່ງທີ່ຖືກສິ່ງທີ່ຜິດໄດ້ເປັນຢ່າງດີ, ຄວນກ້າ “ປະຕິເສດ” ຕໍ່ຜູ້ຄົນຈຳນວນໜຶ່ງທີ່ມີຈຸດຢືນທຳລາຍຕ່ອງໂສ້ການສະໜອງຂອງໂລກ, ແບ່ງແຍກຕະຫຼາດໂລກ, ຫວັງຕັດການພົວພັນເສດຖະກິດຈີນ-ອາເມຣິກາອອກຈາກກັນ ໂດຍໂຄສະນາຊວນເຊື່ອເພື່ອເປັນປໍລະປັກກັນແບບເຈົ້າໄດ້ຂ້ອຍເສຍ ເພື່ອຫວັງໃຫ້ສົງຄາມເຢັນຄັ້ງໃໝ່ເກີດຂຶ້ນ.