ຢູ່ທີ່ກອງປະຊຸມເວທີປຶກສາຫາລືການຄ້າແລະການລົງທຶນຈີນ-ກຳປູເຈຍທີ່ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 22 ມັງກອນນີ້, ທ່ານຫວາງໂຊ້ວເຫວີນ ຮອງລັດຖະມົນຕີກະຊວງການຄ້າຈີນກ່າວວ່າ, ປັດຈຸບັນ, ຈີນເປັນຕະຫຼາດໃຫຍ່ອັນດັບ 5 ສຳລັບການສົ່ງອອກສິນຄ້າຂອງກຳປູເຈຍ, ປີ 2018 ຜ່ານມາ, ມູນຄ່າການນຳເຂົ້າສິນຄ້າຈາກກຳປູເຈຍໄດ້ກວມຍອດມູນຄ່າການນຳເຂົ້າຂອງຈີນໃນປີດຽວກັນເກືອບ 0,5%, ກຳປູເຈຍມີທ່າແຮງບົ່ມຊ້ອນອັນມະຫາສານໃນການເພີ່ມການສົ່ງອອກສິນຄ້າສູ່ຈີນ. ຈີນຫວັງວ່າ ວິສາຫະກິດທັງສອງປະເທດຈະນຳໃຊ້ໂອກາດທີ່ດີຂອງເຂດການຄ້າເສລີຈີນ-ອາຊຽນ ກໍຄືສັນຍາສາຍພົວພັນຄູ່ຮ່ວມເສດຖະກິດຮອບດ້ານໃນພາກພື້ນຫຼື RCEP ທີ່ກຳລັງໄດ້ຮັບການຊຸກຍູ້ການເຈລະຈານັ້ນ ແລະນະໂຍບາຍການຄ້າທີ່ໃຫ້ບູລິມະສິດອື່ນໆ ເພື່ອຊຸກຍູ້ໃຫ້ຜະລິດຕະພັນອຸດສາຫະກຳ, ຜະລິດຕະພັນກະສິກຳທີ່ມີທ່າແຮງຂອງກຳປູເຈຍເຊັ່ນ: ກ້ວຍງ້າວ,ໝາກມ່ວງແລະອື່ນໆສົ່ງໄປຂາຍຈີນ.
ທ່ານຫວາງໂຊ້ວເຫວີນກ່າວຕື່ມວ່າ, ລັດຖະບານຈີນອອກແຮງສົ່ງເສີມວິສາຫະກິດໄປລົງທຶນຢູ່ກຳປູເຈຍ, ການຮ່ວມມືດ້ານການລົງທຶນລະຫວ່າງຈີນ-ກຳປູເຈຍມີອະນາຄົດທີ່ສົດໃສ.
ທ່ານຮຸນແຊນ ນາຍົກລັດຖະມົນຕີກຳປູເຈຍຢືນຢັນວ່າ: ຈີນເປັນປະເທດທີ່ລົງທຶນຢູ່ກຳປູເຈຍຫຼາຍກວ່າໝູ່ໃນປັດຈຸບັນ, ປີ 2018 ຜ່ານມາ, ຈີນໄດ້ລົງທຶນຢູ່ກຳປູເຈຍສູງເຖິງ 3,6 ຕື້ໂດລາສະຫະລັດ, ກວມຍອດມູນຄ່າການລົງທຶນຂອງຕ່າງປະເທດ ຫຼາຍກວ່າເຄິ່ງໜຶ່ງ. ກຳປູເຈຍຍິນດີຕ້ອນຮັບນັກລົງທຶນຈີນໂດຍເລືອກເອົາກຳປູເຈຍເປັນເປົ້າໝາຍລົງທຶນທີ່ມີທ່າແຮງບົ່ມຊ້ອນຫຼາຍ.