ວັນທີ 27 ມັງກອນນີ້, ທ່ານສີຈິ້ນຜິງ ປະທານປະເທດຈີນ ແລະ ທ່ານແອມມານູແອນ ມາຄຣົງ ປະທານາທິບໍດີຝຣັ່ງ ໄດ້ສົ່ງສານຊົມເຊີຍໃຫ້ກັນແລະກັນ ໃນໂອກາດທີ່ສອງປະເທດສ້າງຕັ້ງສາຍພົວພັນທາງການທູດຄົບຮອບ 55 ປີ.
ທ່ານສີຈິ້ນຜິງ ກ່າວໃນສານຊົມເຊີຍວ່າ: ຈີນ ແລະ ຝຣັ່ງລ້ວນແຕ່ແມ່ນປະເທດສະມາຊິກຖາວອນຂອງສະພາຄວາມໝັ້ນຄົງອົງການສະຫະປະຊາຊາດ ລ້ວນແຕ່ມີໜ້າທີ່ແລະຄວາມຮັບຜິດຊອບເປັນພິເສດທາງປະຫວັດສາດ. ຂ້າພະເຈົ້າຍິນດີພະຍາຍາມຮ່ວມກັບທ່ານ, ສົ່ງເສີມມິດຕະພາບອັນເປັນມູນເຊື້ອ, ຊູຄັນທຸງລັດທິຫຼາຍຝ່າຍຂຶ້ນໃຫ້ສູງ, ຕັ້ງໜ້າຊຸກຍູ້ການພັດທະນາແລະການປະດິດສ້າງໃໝ່, ຍົກລະດັບສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນ-ຝຣັ່ງທີ່ມີຄວາມແໜ້ນແຟ້ນແລະທີ່ມີມາແຕ່ດົນນານນັ້ນໃຫ້ສູງຂຶ້ນເລື້ອຍໆ ໂດຍຖືເອົາສອງປະເທດສ້າງຕັ້ງສາຍພົວພັນທາງການທູດຄົບຮອບ 55 ປີເປັນໂອກາດທີ່ດີ ເພື່ອປະກອບສ່ວນອັນໃຫຍ່ຫຼວງກວ່າເກົ່າໃນການຊຸກຍູ້ສັນຕິພາບ, ສະຖຽນລະພາບ ແລະ ການພັດທະນາຂອງໂລກ.
ທ່ານມາຄຣົງ ກ່າວໃນສານຊົມເຊີຍວ່າ: ການສ້າງຕັ້ງສາຍພົວພັນທາງການທູດລະຫວ່າງຝຣັ່ງ-ຈີນກ່ອນໜ້ານີ້ 55 ປີ ໄດ້ເປັນສັນຍະລັກແຫ່ງຈິດໃຈທີ່ເປັນເອກະລາດເປັນເຈົ້າຕົນເອງຂອງສອງປະເທດ. ຂ້າພະເຈົ້າໃຫ້ຄວາມສຳຄັນຢ່າງສູງຕໍ່ມິດຕະພາບແລະສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດ, ຍິນດີຮ່ວມມືກັບທ່ານປະທານສີຈິ້ນຜິງ ເພື່ອຊຸກຍູ້ການຮ່ວມມືໃນຂົງເຂດຕ່າງໆ ເຊັ່ນ: ພະລັງງານນິວເຄຼຍ, ການບິນ, ກະສິກຳ-ອາຫານ, ເສດຖະກິດການຄ້າແລະດ້ານອື່ນໆລະຫວ່າງສອງປະເທດ, ຮັດແໜ້ນການແລກປ່ຽນດ້ານວັດທະນະທຳລະຫວ່າງສອງຝ່າຍ, ເພີ່ມທະວີການຮ່ວມມືໃນບັນຫາທົ່ວໂລກ ເຊັ່ນ: ການປ່ຽນແປງດິນຟ້າອາກາດເປັນຕົ້ນ, ຊຸກຍູ້ສາຍພົວພັນລະຫວ່າງຝຣັ່ງ-ຈີນໃຫ້ມີການພັດທະນາໃຫຍ່ຫຼວງກວ່າເກົ່າໃນປີໃໝ່ນີ້ ເພື່ອສ້າງຄວາມຜາສຸກໃຫ້ແກ່ປະຊາຊົນສອງຊາດ.