ວັນທີ 29 ມັງກອນນີ້, ຫ້ອງການຖະແຫຼງຂ່າວລັດຖະບານຈີນ ໄດ້ຈັດກອງປະຊຸມເຜີຍແຜ່ຂ່າວກ່ຽວກັບສະພາບເສດຖະກິດຈີນໃນປັດຈຸບັນ, ທ່ານ ຈ່າງຢ້ຽນເຊິ່ງ ຫົວໜ້ານັກຄົ້ນຄວ້າຂອງສູນແລກປ່ຽນສາກົນຈີນກ່າວໃນກອງປະຊຸມດັ່ງກ່າວວ່າ, ເຖິງວ່າຈັງຫວະເຕີບໂຕຂອງ GDP ໄດ້ຊັກຊ້າລົງໜ້ອຍໜຶ່ງກໍຕາມ, ແຕ່ພະລັງແຮງໃໝ່ກຳລັງເຂົ້າມາແທນອັນເກົ່າໃນການພັດທະນາເສດຖະກິດຂອງຈີນ, ໃນນັ້ນ, ການລົງທຶນແລະການພັດທະນາດ້ານວິທະຍາສາດເຕັກໂນໂລຊີ ຈະກາຍເປັນພະລັງແຮງໃໝ່ແກ່ການພັດທະນາເສດຖະກິດຂອງຈີນ, ໃນປີ 2018 ຜ່ານມາ, ລາຍຈ່າຍດ້ານການຄົ້ນຄວ້າແລະການທົດລອງໃນທົ່ວສັງຄົມຈີນກວມອັດຕາສ່ວນ GDP 2,15 ເຊິ່ງໄດ້ລື່ນກາຍ 15 ປະເທດໃນສະຫະພາບເອີຣົບທີ່ມີພຽງ 2,08.
ນອກນີ້, ກະຊວງວິທະຍາສາດເຕັກໂນໂລຊີຈີນໄດ້ເປີດເຜີຍຂໍ້ມູນສະແດງໃຫ້ເຫັນວ່າ, ປີ 2018 ຄວາມສາມາດປະດິດສ້າງໃໝ່ດ້ານວິທະຍາສາດເຕັກໂນໂລຊີຂອງຈີນ ໄດ້ເພີ່ມຂຶ້ນຢ່າງຫຼວງຫຼາຍ ເຊິ່ງເປັນສິ່ງຄ້ຳຊູການພັດທະນາດ້ວຍຄຸນນະພາບສູງໃຫ້ໄດ້ຮັບປະສິດທິຜົນໃໝ່. ປີ 2018, ພະນັກງານຄົ້ນຄວ້າໃນທົ່ວສັງຄົມ ຄາດວ່າຈະບັນລຸເຖິງ 4,18 ລ້ານຄົນ, ເປັນອັນດັບ 1 ຂອງໂລກ, ຈຳນວນການຮ້ອງຂໍແລະໄດ້ຮັບການມອບສິດທິບັດດ້ານການປະດິດສ້າງໃໝ່ເປັນອັນດັບ 1 ຂອງໂລກ; ອັດຕາການປະກອບສ່ວນດ້ານວິທະຍາສາດເຕັກໂນໂລຊີທີ່ກ້າວໜ້າ ຄາດວ່າຈະມີຫຼາຍກວ່າ 58,5%, ຄວາມສາມາດປະດິດສ້າງໃໝ່ສັງລວມຂອງຊາດເປັນອັນດັບທີ 17 ຂອງໂລກ.
ຈີນເຜີຍແຜ່ປຶ້ມປົກຟ້າກ່ຽວກັບການເຄື່ອນໄຫວວິທະຍາສາດການບິນອະວະກາດ