ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນ ກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 12 ກຸມພານີ້ຢູ່ນະຄອນຫຼວງປັກກິ່ງວ່າ: ຫວັງວ່າ ສປປ ເກົາຫຼີ ແລະ ອາເມຣິກາຈະມຸ່ງໜ້າສູ່ເປົ້າໝາຍດຽວກັນ, ສາມາດຕອບສະໜອງໃນສິ່ງທີ່ແຕ່ລະຝ່າຍມີຄວາມກັງວົນ ແລະ ຊຸກຍູ້ການພົບປະຄັ້ງທີ 2 ລະຫວ່າງຜູ້ນຳສອງປະເທດໃຫ້ດຳເນີນໄປດ້ວຍດີແລະໄດ້ຮັບຜົນດີ.
ຂ່າວລາຍງານວ່າ ກອງປະຊຸມປຶກສາຫາລືຄວາມໝັ້ນຄົງຂອງພາກຕາເວັນອອກສຽງເໜືອອາຊີລະຫວ່າງຈີນ-ຣັດເຊຍ ໄດ້ຈັດຂຶ້ນຢູ່ນະຄອນຫຼວງມົສກູ ໃນເມື່ອບໍ່ດົນມານີ້ ເຊິ່ງສອງຝ່າຍໄດ້ປຶກສາຫາລືກ່ຽວກັບສະພາບການຜັນແປຂອງສະຖານະການຢູ່ແຫຼມເກົາຫຼີໃນໄລຍະຜ່ານມາ ແລະ ໃນເວລາຕອບຄຳຖາມຂອງນັກຂ່າວ, ທ່ານນາງຮວ້າຊຸ່ນຢິງ ກ່າວວ່າ: ປັດຈຸບັນ, ສະຖານະການຢູ່ແຫຼມເກົາຫຼີພວມສືບຕໍ່ພັດທະນາໄປສູ່ທິດທາງທີ່ສົນທະນາກັນແລະຜ່ອນຄາຍລົງ ພວກຂ້າພະເຈົ້າຫວັງວ່າ ສປປ ເກົາຫຼີ ແລະ ອາເມຣິກາຈະມຸ່ງໜ້າສູ່ເປົ້າໝາຍດຽວກັນ, ສາມາດຕອບສະໜອງໃນສິ່ງທີ່ແຕ່ລະຝ່າຍມີຄວາມກັງວົນ ແລະ ຊຸກຍູ້ການພົບປະຄັ້ງທີ 2 ລະຫວ່າງຜູ້ນຳສອງປະເທດໃຫ້ດຳເນີນໄປດ້ວຍດີແລະໄດ້ຮັບຜົນດີ. ຂະນະທີ່ຈີນ ແລະ ຣັດເຊຍລ້ວນແຕ່ສະໜັບສະໜູນສອງເກົາຫຼີປັບປຸງການພົວພັນລະຫວ່າງສອງຝ່າຍໃຫ້ດີຂຶ້ນ, ຊຸກຍູ້ຄວາມປອງດອງຊາດແລະຮ່ວມມືກັນ ແລະ ຈະສືບຕໍ່ພະຍາຍາມຮ່ວມກັນ ເພື່ອຊຸກຍູ້ຂະບວນການແກ້ໄຂບັນຫາແຫຼມເກົາຫຼີໂດຍຜ່ານຊ່ອງທາງການເມືອງ.