ວັນທີ 20 ກຸມພານີ້, ຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງ, ທ່ານ ສີຈິ້ນຜິງ ປະທານປະເທດຈີນໄດ້ຮັບສານຕາຕັ້ງຂອງເອກອັກຄະລັດຖະທູດ 9 ປະເທດປະຈຳຈີນຄົນໃໝ່.
ໂອກາດດັ່ງກ່າວ, ທ່ານ ສີຈິ້ນຜິງ ໄດ້ສະແດງຄວາມຍິນດີຕ້ອນຮັບບັນດາທ່ານທູດທີ່ມາດຳລົງຕຳແໜ່ງປະຈຳຈີນ, ແລະຜ່ານບັນດາທ່ານທູດຝາກຄຳຢື້ຢາມຖາມຂ່າວດ້ວຍຄວາມຈິງໃຈແລະຄຳອວຍພອນອັນປະເສີດເຖິງບັນດາຜູ້ນຳແລະປະຊາຊົນບັນດາປະເທດເຫຼົ່ານັ້ນ. ຂະນະດຽວກັນ, ທ່ານ ສີຈິ້ນຜິງ ໄດ້ຕີລາຄາສູງຕໍ່ການພົວພັນອັນດີງາມກັບບັນດາປະເທດ ແລະເນັ້ນວ່າ ຈີນໃຫ້ຄວາມສຳຄັນທີ່ສຸດຕໍ່ການຂະຫຍາຍການພົວພັນກັບບັນດາປະເທດ, ຍິນດີລົງເລິກຄວາມໄວ້ເນື້ອເຊື່ອໃຈດ້ານການເມືອງ, ເປີດກວ້າງການຮ່ວມມືທີ່ແທດເໝາະກັບສະພາບຕົວຈິງ ເພື່ອສ້າງຄວາມຜາສຸກໃຫ້ປະຊາຊົນບັນດາປະເທດຫຼາຍກວ່າເກົ່າ. ລັດຖະບານຈີນຈະອຳນວຍຄວາມສະດວກແລະສະໜັບສະໜູນທູຕານຸທູດຂອງບັນດາປະເທດໃນການດຳລົງຕຳແໜ່ງຢູ່ຈີນ, ຫວັງວ່າ ທຸກທ່ານຈະປະກອບສ່ວນຢ່າງຕັ້ງໜ້າເພື່ອຊຸກຍູ້ການພັດທະນາສາຍພົວພັນສອງຝ່າຍ.
ບັນດາເອກອັກຄະລັດຖະທູດໄດ້ນຳເອົາຄຳຢື້ຢາມຖາມຂ່າວອັນສະໜິດສະໜົມຂອງຜູ້ນຳປະເທດຕົນເຖິງທ່ານ ສີຈິ້ນຜິງ ແລະກ່າວວ່າ, ຍິນດີຕັ້ງໜ້າສຸມໃສ່ການເພີ່ມມິດຕະພາບແລະຄວາມເຂົ້າໃຈກັນ, ຊຸກຍູ້ການຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ມື້ດຽວກັນ, ທ່ານ ສີຈິ້ນຜິງ ຍັງໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ວະລາດີເມຍ ໂນຣົຟ ເລຂາທິການໃຫຍ່ອົງການຮ່ວມມືຊຽງໄຮຄົນໃໝ່ ແລະຫວັງວ່າທ່ານຈະປະກອບສ່ວນຢ່າງຕັ້ງໜ້າເພື່ອຊຸກຍູ້ການພັດທະນາຂອງອົງການຮ່ວມມືຊຽງໄຮ.