ຜູ້ຊ່ຽວຊານລາວ: ສປປລາວສາມາດຖອດ​ຖອນ​ບົດຮຽນ​ການ​ຫຼຸ​ດຜ່ອນ​ຄວາມທຸກ​ຍາກຈາກຈີນ

ຕອນເຊົ້າວັນທີ 5 ມີນານີ້, ສະ​ພາ​ປະ​ຊາ​ຊົນ​ແຫ່ງ​ຊາດ​ຈີນ ເຊິ່ງ​ເປັນ​ອົງ​ການ​ອຳ​ນາດ​ສູງ​ສຸດ​ຂອງ​ຈີນ​ໄດ້ຈັດ​ກອງ​ປະ​ຊຸມ​ປະ​ຈຳ​ປີ​ຢູ່​ນະ​ຄອນ​ຫຼວງ​ປັກ​ກິ່ງ ໂດຍທ່ານ ຫຼີ້ເຄີ້ສຽງ ນາຍົກລັດ ຖະມົນຕີຈີນໄດ້ຜ່ານບົດລາຍງານວຽກງານຂອງລັດຖະບານຈີນຕໍ່ກອງປະຊຸມ. ມື້ດຽວກັນ, ທ່ານ ສີວິໄລ ບຸດພົມວິຫານ ທີ່ປຶກສາສູນຄົ້ນຄວ້າຈີນ ຂອງ ມະຫາວິທະຍາໄລແຫ່ງຊາດລາວ ໄດ້ຕິດຕາມຮັບຟັງພິທີໄຂກອງປະຊຸມດັ່ງກ່າວເຊິ່ງເປັນການຖ່າຍທອດສົດເປັນພາສາລາວໂດຍຜ່ານ APP ມືຖືຂອງສະຖານີວິທະຍຸໂທລະພາບສູນກາງຈີນ. ທ່ານກ່າວວ່າ, ​ເນື້ອ​ໃນຕ່າງໆ ໃນບົດລາຍງານວຽກງານຂອງລັດຖະບານຈີນນັ້ນ ຕົນເອງປະທັບໃຈທີ່ສຸດຕໍ່ໝາກຜົນການ​ຫຼຸດຜ່ອນ​ຄວາມທຸກ​ຍາກຂອງຈີນ.

ທ່ານ ສີວິໄລ ບຸດພົມວິຫານ ໄດ້ໃຫ້ສຳພາດຕໍ່ນັກຂ່າວ CRI ວ່າ: ບົດລາຍງານດັ່ງກ່າວ ໄດ້ສະຫຼຸບຜົນການປະຕິບັດວຽກງານຕ່າງໆຂອງຈີນຢ່າງຮອບດ້ານໃນປີ 2018 ຜ່ານມາ ເຊິ່ງຕົນປະທັບໃຈທີ່ສຸດຕໍ່ໝາກຜົນການ​ຫຼຸ​ດຜ່ອນ​ຄວາມທຸກ​ຍາກຂອງຈີນ ເຊິ່ງ​ໃນປີ 2018 ຜ່ານມາ, ຈີນສາມາດຫຼຸດຈຳນວນປະຊາກອນຜູ້ທຸກຍາກໃນ​ເຂດຊົນນະບົດລົງ 13,86 ລ້ານຄົນ ເຊິ່ງເປັນຈຳນວນຫຼາຍ​ທີ່​ສຸດ.

ທ່ານ ສີວິໄລ ບຸດພົມວິຫານ ກ່າວຕື່ມວ່າ: ການຫຼຸດຜ່ອນຄວາມທຸກຍາກກໍ່ເປັນໜຶ່ງໃນ ວຽກງານຈຸດສຸມຂອງລັດຖະບານລາວ, ພວກເຮົາເຄີຍຈັດຕັ້ງປະຕິບັດມາແລ້ວແຕ່​ຍັງ​ບໍ່​ທັນ​ເຮັດ​ສຳ​ເລັດ​ໝົດ​ເທື່ອຍ້ອນໄດ້ປະເຊີນກັບຄວາມຫຍຸ້ງຍາກຕ່າງໆນານາ,​ ສະນັ້ນ, ສປປ ລາວ ສາມາດນໍາ​ເອົາບົດຮຽນ​ການ​ຫຼຸ​ດຜ່ອນ​ຄວາມທຸກ​ຍາກຈາກຈີນມາປຽບທຽບ ແລະໃຫ້ນັກຄົ້ນຄວ້າ ​ເຮັດການວິໄຈວ່າມີຄວາມ​ເໝາະ​ສົມບໍ່ທີ່ຈະເອົາມານໍາໃຊ້ ໃນ ສປປ ລາວ.