ທ່ານສີຈິ້ນຜິງມີຄວາມຄິດທີ່ດີຕໍ່ການປັບປຸງສະພາບນິເວດແລະຊີວິດການເປັນຢູ່ຂອງປະຊາຊົນໃນເຂດມົງໂກໃນ
ຕອນບ່າຍວັນທີ 5 ມີນານີ້, ທ່ານສີຈິ້ນຜິງໄດ້ເຂົ້າຮ່ວມພິຈາລະນາບົດລາຍງານວຽກງານລັດຖະບານຮ່ວມກັບຜູ້ແທນໃນຄະນະຜູ້ແທນເຂດປົກຄອງຕົນເອງມົງໂກໃນ ເຊິ່ງທ່ານເອງກໍເປັນໜຶ່ງໃນຜູ້ແທນໃນຄະນະດັ່ງກ່າວ. ທ່ານໄດ້ໃຫ້ທິດຊີ້ນຳ ແລະ ທັດສະນະທີ່ໜັກແໜ້ນ ແລະ ຈະແຈ້ງ.
ທ່ານສີຈິ້ນຜິງເຫັນວ່າ, ໃນໄລຍະທີ່ເສດຖະກິດຈີນຈາກການເຕີບໂຕຢ່າງວ່ອງໄວຫັນມາເປັນການພັດທະນາທີ່ມີຄຸນນະພາບສູງ, ການປ້ອງກັນແລະກຳຈັດມົນລະພິດ ແລະ ການອະນຸລັກສິ່ງແວດລ້ອມແມ່ນວຽກງານສຳຄັນຢ່າງໜຶ່ງທີ່ຕ້ອງແກ້ໄຂ. “ພວກເຮົາຕ້ອງມີມານະອົດທົນ, ຂ້າມສິ່ງກີດຂວາງເຫຼົ່ານີ້. ຕ້ອງມີຄວາມເຄັ່ງຄັດໃນການອະນຸລັກຮັກສາສິ່ງແວດລ້ອມນິເວດ, ຈະບໍ່ຫວັ່ນໄຫວຄອນແຄນ, ບໍ່ທໍ້ຖອຍ ແລະ ບໍ່ມີກໍລະນີພິເສດ.” ບໍ່ຄວນມີຄວາມຄິດທີ່ຢາກສະແຫວງຫາການເຕີບໂຕດ້ານເສດຖະກິດດ້ວຍການທຳລາຍສິ່ງແວດລ້ອມ ຍ້ອນວ່າການພັດທະນາເສດຖະກິດພົບຄວາມຫຍຸ້ງຍາກ, ຈົນໄປແຕະຕ້ອງຂີດເສັ້ນຕ່ຳສຸດແຫ່ງການອະນຸລັກຮັກສາສິ່ງແວດລ້ອມນິເວດ.
ທ່ານສີຈິ້ນຜິງສະເໜີອອກມາວ່າ, ສ້າງເຂດມົງໂກໃນເປັນແນວກັ້ນປ້ອງກັນນິເວດທີ່ສຳຄັນຢູ່ທາງພາກເໜືອຂອງຈີນ ແມ່ນທີ່ຕັ້ງຍຸດທະສາດທີ່ພິຈາລະນາເຖິງສະພາບການພັດທະນາຂອງທົ່ວປະເທດຈີນ ແລະ ກໍແມ່ນໜ້າທີ່ຮັບຜິດຊອບທີ່ສຳຄັນຍິ່ງຂອງມົງໂກໃນ. ເພື່ອເຮັດໃຫ້ເຂດມົງໂກໃນບັນລຸການພັດທະນາແບບສີຂຽວ, ທ່ານສີຈິ້ນຜິງໃຫ້ຂໍ້ສະເໜີດັ່ງນີ້:
--ໂດຍພິຈາລະນາເຖິງການພົວພັນລະຫວ່າງການພັດທະນາເສດຖະກິດກັບການອະນຸລັກຮັກສາສິ່ງແວດລ້ອມນິເວດຢ່າງກົມກຽວກັນ, ພະຍາຍາມຄົ້ນຄວ້າຊອກຫາເສັ້ນທາງໃໝ່ທີ່ສອດຄ່ອງກັບທີ່ຕັ້ງຍຸດທະສາດ ແລະ ສ່ອງແສງເຖິງເອກະລັກພິເສດຂອງເຂດມົງໂກໃນ.
--ການອະນຸລັກທົ່ງຫຍ້າແລະປ່າໄມ້ແມ່ນໜ້າທີ່ອັນດັບໜຶ່ງໃນການອະນຸລັກລະບົບນິເວດຂອງເຂດມົງໂກໃນ. ຕ້ອງປະຕິບັດຕາມກົດເກນພາຍໃນຂອງລະບົບນິເວດ, ຍຶດໝັ້ນໂດຍຖືເອົາການຟື້ນຟູທຳມະຊາດເປັນຕົ້ນຕໍ, ປະຕິບັດງານຕາມສະພາບຕົວຈິງ ແລະ ໃຊ້ນະໂຍບາຍຕ່າງໆຕາມແຕ່ລະປະເພດ, ຕ້ອງປະຕິບັດໂດຍມີຈຸດສຸມ, ເປັນລະບົບ ແລະ ມີປະສິດທິຜົນຍາວນານ.
--ຕ້ອງແກ້ໄຂບັນຫາສິ່ງແວດລ້ອມທີ່ເຄັ່ງຮ້ອນທີ່ມີຫາງສຽງຮຸນແຮງ ເຊິ່ງເປັນຄວາມຕ້ອງການດ່ວນໃນການປັບປຸງສິ່ງແວດລ້ອມເພື່ອຊີວິດການເປັນຢູ່ຂອງປະຊາຊົນ, ທັງແມ່ນໜ້າທີ່ອັນຮີບດ່ວນໃນການເພີ່ມທະວີການສ້າງສາຄວາມສີວິໄລດ້ານນິເວດ.
ທ່ານສີຈິ້ນຜິງເອົາໃຈໃສ່ຕໍ່ບັນຫາລະອຽດດ້ານຊີວິດການເປັນຢູ່ຂອງປະຊາຊົນເຂດມົງໂກໃນ
ທ່ານສີຈິ້ນຜິງເອົາໃຈໃສ່ຕໍ່ບັນຫາລະອຽດດ້ານຊີວິດການເປັນຢູ່ຂອງປະຊາຊົນໄດ້ສ້າງຄວາມປະທັບໃຈອັນເລິກເຊິ່ງໃຫ້ແກ່ຜູ້ແທນທັງຫຼາຍ. ເມື່ອໄດ້ຍິນທ່ານຢວີລີ້ຊິນ ເລຂາຄະນະພັກນະຄອນຮູລຸນເບວເວົ້າວ່າ, ຍ້ອນວ່ານະຄອນຕົນໄດ້ປະຕິບັດໂຄງການອະນຸລັກຊັບພະຍາກອນປ່າໄມ້ທຳມະຊາດ, ກຳມະກອນໃນຂະແໜງການປ່າໄມ້ 26.300 ຄົນໄດ້ປະຖິ້ມຂວານ, ຈາກກຳມະກອນຟັນໄມ້ກາຍເປັນກຳມະກອນບົວລະບັດປ່າໄມ້. ທ່ານສີຈິ້ນຜິງເລີຍຖາມວ່າ, ສະພາບການເຮັດວຽກຂອງກຳມະກອນເຫຼົ່ານີ້ເປັນແນວໃດ.
ຫຼັງກອງປະຊຸມ, ທ່ານອູຢຸນໂປ່ ຜູ້ແທນສະພາປະຊາຊົນແຫ່ງຊາດຈີນເຜົ່າມົງໂກນບອກກັບນັກຂ່າວວ່າ: “ທ່ານປະທານສີຈິ້ນຜິງໄດ້ຟັງການປະກອບຄຳເຫັນຢ່າງຈິງຈັງ! ທ່ານຍັງໄດ້ຕອບຄຳຖາມຂອງຂ້າພະເຈົ້າດ້ວຍຄວາມເວົ້າແບບຕະຫຼົກ ແລະ ສະແດງຄວາມເຫັນດີຕໍ່ສະຫະກອນພວກເຮົາ ໂດຍກ່າວວ່າ, ສະຫະກອນແບບນີ້ຄວນມີຫຼາຍຂຶ້ນ, ຄວນໃຫ້ການສະໜັບສະໜູນແກ່ສະຫະກອນແບບນີ້ຢ່າງຍືນຍົງ.”
