ວັນທີ 7 ມີນານີ້ຢູ່ນະຄອນຫຼວງປັກກິ່ງ ສປ ຈີນ, ທ່ານລິວຢຸງຟູ້ ຫົວໜ້າຫ້ອງການໜ່ວຍງານນຳພາການຫຼຸດຜ່ອນຄວາມທຸກຍາກຂອງລັດຖະບານຈີນກ່າວວ່າ, ເລີ່ມແຕ່ຈີນປະຕິບັດມາດຕະການຫຼຸດຜ່ອນຄວາມທຸກຍາກໃຫ້ຖືກເປົ້າໝາຍເປັນເວລາ 6 ປີມານີ້, ປະຊາກອນທຸກຍາກຂອງຈີນໄດ້ຫຼຸດລົງຈາກ 98.99 ລ້ານຄົນເມື່ອປີ 2012 ຍັງເຫຼືອ 16.6 ລ້ານຄົນໃນປີ 2018, ໃນໄລຍະ 6 ປີຜ່ານມາປະຊາກອນທຸກຍາກຂອງຈີນໄດ້ຫຼຸດລົງຫຼາຍກວ່າ 80 ລ້ານຄົນ. ໃນ 9 ແຂວງພາກຕາເວັນອອກຂອງຈີນມີ 8 ແຂວງແມ່ນບໍ່ມີປະຊາກອນທີ່ມີລາຍໄດ້ຕ່ຳກວ່າເສັ້ນກຳນົດຄວາມທຸກຍາກຂອງຊາດແລ້ວ. ປີ 2019, ຈີນຈະພະຍາຍາມຫຼຸດຈຳນວນປະຊາກອນທຸກຍາກໃຫ້ໄດ້ 10 ລ້ານກວ່າຄົນ .
ໃນພິທີຖະແຫຼງຂ່າວຂອງກອງປະຊຸມສະພາປະຊາຊົນແຫ່ງຊາດຈີນຄັ້ງທີ 2 ສະໄໝທີ 13ທີ່ຈັດຂຶ້ນໃນວັນທີ 7 ມີນານີ້, ທ່ານລິວຢຸງຟູ້ ກ່າວວ່າ, ຄວາມທຸກຍາກທຽບຖານຂອງຈີນຍັງຈະຄົງຕົວຢູ່ເປັນໄລຍະຍາວນານ. ທ່ານກ່າວວ່າ, ຈີນຍັງແມ່ນປະເທດທີ່ພວມພັດທະນາໃຫຍ່ທີ່ສຸດໃນໂລກ, ນີ້ແມ່ນລັກສະນະພື້ນຖານອັນໜຶ່ງຂອງການພັດທະນາເສດຖະກິດສັງຄົມຂອງຈີນ, ການຫຼຸດຜ່ອນຄວາມທຸກຍາກຍັງແມ່ນໜ້າທີ່ອັນໜຶ່ງທີ່ຍາວນານ.