ທ່ານສີຈິ້ນຜິງກ່າວວ່າ ຈີນຕ້ອງສູ້ຊົນຍາດເອົາໄຊຊະນະໃນການລົບລ້າງຄວາມທຸກຍາກຢ່າງຮອບດ້ານໃຫ້ໄດ້ຢ່າງເດັດຂາດ

2019-03-08 16:50:35 |ມາຈາກ: CRI

ຕອນບ່າຍວັນທີ 7 ມີນານີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນໄດ້ເຂົ້າຮ່ວມການພິຈາລະນາບົດລາຍງານວຽກງານລັດຖະບານຂອງຄະນະຜູ້ແທນສະພາປະຊາຊົນແຫ່ງຊາດແຂວງກ່ານຊູ້, ໃນນີ້ ວຽກງານການລົບລ້າງຄວາມທຸກຍາກໄດ້ກາຍເປັນຫົວຂໍ້ທີ່ທ່ານສີຈິ້ນຜິງ ເຊິ່ງເປັນຜູ້ນຳສູງສູດຂອງຈີນແລະບັນດາຜູ້ແທນສະພາປະຊາຊົນຂັ້ນຮາກຖານໄດ້ປຶກສາຫາລືກັນຫຼາຍ.

ໃນຊຸມປີມໍ່ໆມານີ້, ປະຊາກອນຜູ້ທຸກຍາກຂອງແຂວງກ່ານຊູ້ໄດ້ຫຼຸດລົງຈາກ 2.560.000 ຄົນເມື່ອປີ 2016 ເຫຼືອພຽງ 1 ລ້ານກວ່າຄົນໃນປັດຈຸບັນ, ລາຍໄດ້ທີ່ສາມາດຈັບຈ່າຍສະເລ່ຍຕໍ່ຫົວຄົນຜູ້ທຸກຍາກຕໍ່ປີບັນລຸເຖິງ 5.390 ຢວນ.
ທ່ານສີຈີ້ນຜິງກ່າວວ່າ, ວຽກງານເຫຼົ່າ ນີ້ເຮັດໄດ້ດີ. ແຕ່ນີ້ຮອດປີ 2020 ເພື່ອເຮັດສຳເລັດໜ້າທີ່ຕາມເປົ້າໝາຍສູ້ຊົນລົບລ້າງຄວາມທຸກຍາກ ເຫຼືອເວລາພຽງ 2 ປີເທົ່ານັ້ນ, ກຳລັງເປັນໄລຍະທີ່ພົບພໍ້ຄວາມຫຍຸ້ງຍາກຫຼາຍທີ່ສຸດ, ຕ້ອງຍຶດໝັ້ນການປະຕິບັດໜ້າທີ່ວຽກງານໃຫ້ດີ ເພື່ອຍາດເອົາໄຊຊະນະຮອບດ້ານຂັ້ນສຸດທ້າຍໄດ້ຢ່າງເດັດຂາດ.

ກ່ຽວກັບວຽກງານສູ້ຊົນຜ່ານຜ່າຄວາມຫຍຸ້ງຍາກເພື່ອບັນລຸເປົ້າໝາຍລົບລ້າງຄວາມທຸກຍາກຂອງແຂວງກ່ານຊູ້, ທ່ານສີຈິ້ນຜິງໄດ້ຮຽກຮ້ອງໃຫ້ແຂວງດັ່ງກ່າວປະຕິບັດຕາມທິດທາງ “5 ບໍ່” ຄື ຍຶດໝັ້ນຄວາມໝັ້ນໃຈຢ່າງບໍ່ຫວັ່ນໄຫວຄອນແຄນ, ຍຶດໝັ້ນເປົ້າໝາຍຢ່າງບໍ່ລົດລະ, ແກ້ໄຂບັນຫາຢ່າງເດັດຂາດ, ຈັດຕັ້ງປະຕິບັດໜ້າທີ່ຮັບຜິດຊອບຢ່າງບໍ່ລົດລະ ແລະຫັນປ່ຽນແບບແຜນວິທີເຮັດວຽກຢ່າງບໍ່ລົດລະ.
ຕາມທ່ານສີຈິ້ນຜິງເຫັນວ່າ, ມາດຕະຖານໃນການສູ້ຊົນຜ່ານຜ່າຄວາມຫຍຸ້ງຍາກເພື່ອລົບລ້າງຄວາມທຸກຍາກກໍຄືຮັບປະກັນໃຫ້ປະຊາກອນຜູ້ທຸກຍາກບໍ່ຕ້ອງເປັນຫ່ວງຕໍ່ບັນຫາການກິນອິ່ມນຸ່ງອຸ່ນ, ການສຶກສາພາກບັງຄັບ, ການປິ່ນປົວຂັ້ນພື້ນຖານ, ການມີເຮືອນຢູ່ຢ່າງປອດໄພນັ້ນມີການຮັບປະກັນ. ທ່ານແນະນຳໃຫ້ຄົນທັງຫຼາຍຮູ້ວ່າ: ໜ້າທີ່ສູ້ຊົນຜ່ານຜ່າຄວາມຫຍຸ້ງຍາກເພື່ອລົບລ້າງຄວາມທຸກຍາກ ບໍ່ສາມາດແຍກອອກຈາກສະພາບຄວາມເປັນຈິງໄດ້, ບໍ່ຄວນຍົກສູງມາດຕະຖານແລະຕັ້ງຄວາມຫວັງໃຫ້ສູງເກີນຄວາມເປັນຈິງ ແລະກໍບໍ່ຄວນລົບລ້າງຄວາມທຸກຍາກແບບຈອມປອມ, ຫຼຸດມາດຕະຖານໃຫ້ຕ່ຳລົງແລະສົ່ງຜົນກະທົບເຮັດໃຫ້ຜົນສຳເລັດຫຼຸດໜ້ອຍລົງ.

ທ່ານສີຈິ້ນຜິງຊີ້ນຳໃຫ້ບັນດາຜູ້ແທນສະພາປະຊາຊົນແຫ່ງຊາດແຂວງກ່ານຊູ້ ຕ້ອງກຳແໜ້ນທິດທາງທີ່ຖືກຕ້ອງແຫ່ງການສູ້ຊົນຜ່ານຜ່າເພື່ອບັນລຸເປົ້າໝາຍລົບລ້າງຄວາມທຸກຍາກ, ຮັບປະກັນໃຫ້ຜົນສຳເລັດດ້ານການລຶບລ້າງຄວາມທຸກຍາກສາມາດຜ່ານຜ່າການທົດສອບຂອງປະຫວັດສາດໄດ້. ທ່ານແນະນຳວ່າ, ການບັນລຸເປົ້າໝາຍສູ້ຊົນຜ່ານຜ່າຄວາມຫຍຸ້ງຍາກເພຶ່ອລົບລ້າງຄວາມທຸກຍາກ, ຍິ່ງຮອດເວລາຂອດຕັດສິນສຳຄັນກໍຍິ່ງຕ້ອງຕີກອງລະດົມກຳລັງໃຈເພື່ອໃຫ້ພະຍາຍາມສູ້ຊົນຢ່າງມີປະສິດທິຜົນ. ບໍ່ຄວນມີລະບຽບແບບແຜນເຮັດວຽກແບບຟ້າວຟັ່ງກ້າວກະໂດດ,ບໍ່ຂຸ່ຍໂວໂອ້ອວດ, ສົນໃຈແຕ່ຜົນປະໂຫຍດໃນປັດຈຸບັນແລະຟ້າວຟັ່ງຢາກໄດ້ຜົນສຳເລັດໄວໆ, ສ້າງຜົນງານເອົາໜ້າແບບຈອມປອມ.

ທ່ານຖາງສຽວມິງ ຜູ້ແທນສະພາປະຊາຊົນແຫ່ງຊາດຈີນກ່າວວ່າ: ຄວາມເວົ້າຂອງທ່ານເລຂາທິການໃຫຍ່ເຮັດໃຫ້ພວກເຮົາມີຄວາມໝັ້ນໃຈເພີ່ມຂຶ້ນ.

ນະຄອນ ຕິ້ງຊີ່ ເປັນເຂດທີ່ມີປະຊາກອນຜູ້ທຸກຍາກຫຼາຍທີ່ສຸດແລະມີໜ້າທີ່ໜັກໜ່ວງທີ່ສຸດໃນການລົບລ້າງຄວາມທຸກຍາກ.ກ່ອນບຸນກຸດຈີນ ປີ 2013ໃກ້ຈະໝູນວຽນມາເຖິງ, ທ່ານສີຈິ້ນຜິງໄດ້ໄປຢ້ຽມຢາມບ້ານທຸກຍາກຂອງນະຄອນຕິ້ງຊີ່ ແລະໄປຢາມປະຊາຊົນຜູ້ທຸກຍາກ. ໃນເວລາພິຈາລະນາບົດລາຍງານວຽກງານລັດຖະບານ, ທ່ານຖາງສຽວມິງ ເລຂາຄະນະພັກນະຄອນຕິ້ງຊີ່ລາຍງານຕໍ່ທ່ານສີຈິ້ນຜິງວ່າ, ໃນໄລຍະ 6 ປີຜ່ານມາ, ປະຊາກອນຜູ້ທຸກຍາກຂອງນະຄອນຕິ້ງຊີ່ໄດ້ຫຼຸດລົງ 6 ແສນກວ່າຄົນ, ບ້ານຢວນກູຕຸ່ຍ ທີ່ທ່ານສີຈິ້ນຜິງເຄີຍໄປຢ້ຽມຢາມໃນປີ 2013 ນັ້ນໄດ້ຫຼຸດພົ້ນອອກຈາກຄວາມທຸກຍາກໝົດບ້ານແລ້ວໃນປີ2018ຜ່ານມາ.

ທ່ານສີຈິ້ນຜິງຢືນຢັນວ່າ: ໃນຂະບວນການລົບລ້າງຄວາມທຸກຍາກ, ສຳລັບບັນຫາຕ່າງໆທີ່ປະຊາຊົນສ່ອງແສງນັ້ນເຊັ່ນ ລົບລ້າງຄວາມທຸກຍາກແບບຈອມປອມ,ເນັ້ນຜົນສຳເລັດຕາມຄາດໝາຍແຕ່ບໍ່ສົນໃຈຕໍ່ປະສິດທິຜົນຕົວຈິງໃນການລົບລ້າງຄວາມທຸກຍາກແລະບັນຫາອື່ນໆ, ຕ້ອງໃຫ້ຄວາມສຳຄັນຢ່າງສູງແລະແກ້ໄຂບັນຫາເຫຼົ່ານີ້ຢ່າງເດັດຂາດ ເພື່ອຍົກສູງຄຸນນະພາບການລົບລ້າງຄວາມທຸກຍາກ. ຄຳເວົ້າເຫຼົ່ານີ້ໄດ້ສ້າງພາບປະທັບໃຈຢ່າງເລິກເຊິ່ງໃຫ້ທ່ານຖາງສຽວມິງ, ທ່ານກ່າວວ່າ: ຄຳແນະນຳຂອງທ່ານສີຈິ້ນຜິງໄດ້ຕັກເຕືອນໃຫ້ເຈົ້າໜ້າທີ່ຂັ້ນຮາກຖານຕ້ອງລະວັງບໍ່ໃຫ້ເກີດມີຄວາມຜິດພາດໃນການສູ້ຊົນຜ່ານຜ່າຍາດເອົາໄຊຊະນະໃນບັ້ນຮົບລົບລ້າງຄວາມທຸກຍາກ ທັງໄດ້ສະແດງໃຫ້ເຫັນຢ່າງເຕັມສ່ວນວ່າ ສູນກາງພັກກອມມູນິດຈີນມີຄວາມຕັດສິນໃຈຢ່າງເດັດດ່ຽວແລະລົງມືແກ້ໄຂບັນຫາການປະຕິບັດໜ້າທີ່ແບບຈອມປອມໃນການລົບລ້າງຄວາມທຸກຍາກນັ້ນຢ່າງເຂັ້ມງວດ.