ວັນທີ 18 ມີນານີ້, ຫ້ອງການຖະແຫຼງຂ່າວຂອງລັດຖະບານຈີນ ໄດ້ເຜີຍແຜ່ປຶ້ມປົກຂາວ “ການຕໍ່ສູ້ຕ້ານການກໍ່ການຮ້າຍ, ການຫຼຸດພົ້ນອອກຈາກລັດທິຫົວຮຸນແຮງແລະການປົກປ້ອງສິດທິມະນຸດໃນຊິ່ນຈ່ຽງ”.
ປຶ້ມປົກຂາວດັ່ງກ່າວ ລະບຸວ່າ: ເມື່ອບໍ່ດົນມານີ້, ເຂດຊິ່ນຈ່ຽງຂອງຈີນໄດ້ຮັບຜົນກະທົບຈາກອິດທິກຳລັງແບ່ງແຍກຊົນເຜົ່າ, ອິດທິກຳລັງຫົວຮຸນແຮງດ້ານສາສະໜາ ແລະ ອິດທິກຳລັງລັດທິກໍ່ການຮ້າຍ, ຈຶ່ງເຮັດໃຫ້ເກີດເຫດການຫຼອນໂຈມຕີດ້ານການກໍ່ການຮ້າຍເລື້ອຍໆ, ເຊິ່ງເປັນໄພອັນຕະລາຍຕໍ່ຄວາມປອດໄພດ້ານຊັບສິນແລະຊີວິດຂອງປະຊາຊົນບັນດາເຜົ່າຢ່າງໜັກໜ່ວງ ແລະເປັນການຢຽບຢ່ຳກຽດສັກສີຂອງມະນຸດຢ່າງໜັກໜ່ວງ. ໂດຍຜະເຊີນໜ້າກັບການຂົ່ມຂູ່ຕົວຈິງຈາກລັດທິກໍ່ການຮ້າຍແລະລັດທິຫົວຮຸນແຮງ, ເຂດຊິ່ນຊ່ຽງໄດ້ນຳໃຊ້ມາດຕະການອັນເດັດຂາດ ໂດຍໄດ້ດຳເນີນການຕໍ່ສູ້ຕ້ານລັດທິກໍ່ການຮ້າຍແລະເພື່ອຫຼຸດພົ້ນອອກຈາກລັດທິຫົວຮຸນແຮງຕາມກົດໝາຍ, ໄດ້ສະກັດກັ້ນທ່າອ່ຽງທີ່ພາໃຫ້ມີການເຄື່ອນໄຫວກໍ່ການຮ້າຍເລື້ອຍໆຢ່າງບັງເກີດຜົນ, ໄດ້ປົກປ້ອງສິດຢູ່ລອດ, ສິດພັດທະນາ ແລະສິດພື້ນຖານອື່ນໆຂອງປະຊາຊົນບັນດາເຜົ່າໃຫ້ຫຼາຍເທົ່າທີ່ຈະຫຼາຍໄດ້.
ປຶ້ມປົກຂາວຍັງລະບຸອີກວ່າ: ຈີນແມ່ນປະເທດສັງຄົມນິຍົມທີ່ປົກຄອງຕາມກົດໝາຍ, ການເຄົາລົບນັບຖືແລະປົກປ້ອງສິດທິມະນຸດ ແມ່ນຫຼັກການຕາມລັດຖະທຳມະນູນຂອງຈີນ. ການຕໍ່ສູ້ຕ້ານລັດທິກໍ່ການຮ້າຍແລະເພື່ອຫຼຸດພົ້ນອອກຈາກລັດທິຫົວຮຸນແຮງຢູ່ເຂດຊິ່ນຈ່ຽງຂອງຈີນ ແມ່ນພາກສ່ວນສຳຄັນຂອງການຕໍ່ສູ້ຕ້ານລັດທິກໍ່ການຮ້າຍຂອງປະຊາຄົມໂລກ, ເຊິ່ງສອດຄ່ອງກັບຈຸດປະສົງແລະຫຼັກການຂອງອົງການສະຫະປະຊາຊາດກ່ຽວກັບການຕ້ານລັດທິກໍ່ການຮ້າຍແລະປົກປ້ອງສິດທິມະນຸດຂັ້ນພື້ນຖານ.