ວັນທີ 20 ມີນານີ້ ຢູ່ນະຄອນຫຼວງປັກກິ່ງ, ທ່ານ ສີຈິ້ນຜິງ ປະທານປະເທດຈີນ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ລໍເຣັນສ໌ ບາໂຄ ອະທິການບໍດີຂອງມະຫາວິທະຍາໄລຮາເວີດປະເທດອາເມຣິກາ. ທ່ານ ສີຈິ້ນຜິງ ກ່າວວ່າ, ຈີນມີແນວຄວາມຄິດໃຫ້ຖອດຖອນບົດຮຽນກັບຕ່າງປະເທດເຊິ່ງກັນແລະກັນ, ສົ່ງເສີມການໄປຮຽນຢູ່ຕ່າງປະເທດ, ສະໜັບສະໜູນການແລກປ່ຽນແລະການຮ່ວມມືດ້ານການສຶກສາລະຫວ່າງຈີນກັບຕ່າງປະເທດ, ຫວັງວ່າ ການແລກປ່ຽນດ້ານວັດທະນະທຳຈີນ-ອາເມຣິກາຈະໄດ້ຮັບຜົນງານທີ່ດີຫຼາຍກວ່າເກົ່າ.
ທ່ານ ສີຈິ້ນຜິງ ເນັ້ນໜັກວ່າ: ນັບແຕ່ປະຕິຮູບແລະເປີດປະຕູສູ່ພາຍນອກເປັນເວລາ 40 ປີມານີ້, ການທີ່ຈີນພັດທະນາຢ່າງວ່ອງໄວນັ້ນ ສ່ວນໃຫຍ່ແລ້ວແມ່ນຍ້ອນໄດ້ຮັບຜົນປະໂຫຍດຈາກການສຶກສາທີ່ມີລະດັບສູງຂຶ້ນ. ຈີນໄດ້ສຸມໃສ່ຊຸກຍູ້ການສຶກສາໃຫ້ທັນສະໄໝ, ສ້າງປະເທດທີ່ເຂັ້ມແຂງໃນດ້ານການສຶກສາ ແລະເຮັດວຽກງານການສຶກສາທີ່ປະຊາຊົນເພິ່ງພໍໃຈ. ຈີນຈະເປີດປະຕູໃຫ້ກວ້າງອອກໃນດ້ານການສຶກສາ, ເພີ່ມທະວີການແລກປ່ຽນກັບບັນດາປະເທດໃນໂລກ ແລະຮ່ວມກັນຊຸກຍູ້ການພັດທະນາວຽກງານການສຶກສາ. ໃນຂະບວນການດັ່ງກ່າວ, ຈີນຍິນດີດຳເນີນການແລກປ່ຽນແລະການຮ່ວມມືທີ່ກວ້າງຂວາງກວ່າເກົ່າກັບສະຖາບັນການສຶກສາແລະຄົ້ນຄວ້າວິທະຍາສາດຂອງອາເມຣິກາເຊັ່ນ: ມະຫາວິທະຍາໄລຮາເວີດເປັນຕົ້ນ.
ທ່ານ ບາໂຄ ກ່າວວ່າ: ມະຫາວິທະຍາໄລຮາເວີດ ມີນັກສຶກສາຈີນຢ່າງຫຼວງຫຼາຍ, ອັດຕາການເຜີຍແຜ່ພາສາຈີນ ຖືກຈັດຢູ່ແຖວໜ້າຂອງພາສາປະເທດຕ່າງໆ. ລັດຖະບານຈີນໃຫ້ຄວາມສຳຄັນຢ່າງສູງແລະອອກແຮງຂະຫຍາຍການສຶກສາຊັ້ນສູງ ແມ່ນເລື່ອງທີ່ເປັນຕາຍ້ອງຍໍຊົມເຊີຍ, ມະຫາວິທະຍາໄລຮາເວີດຍິນດີສືບຕໍ່ຊຸກຍູ້ການແລກປ່ຽນແລະການຮ່ວມມືກັບສະຖາບັນການສຶກສາແລະຄົ້ນຄວ້າວິທະຍາສາດຂອງຈີນ.