ຕອນບ່າຍວັນທີ 19ມີນານີ້ຢູ່ນະຄອນຫຼວງປັກກິ່ງ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະໂອ້ລົມກັບບັນດາຜູ້ແທນຕ່າງປະເທດທີ່ເຂົ້າຮ່ວມກອງປະຊຸມເວທີປຶກສາຫາລືຂັ້ນສູງກ່ຽວກັບການພັດທະນາຂອງຈີນ2019 ໂດຍຜູ້ບໍລິຫານຂັ້ນສູງຂອງວິສາຫະກິດຊັ້ນນຳ 500 ແຫ່ງຂອງໂລກ, ນອກນີ້ຍັງມີຜູ້ຊ່ຽວຊານ ນັກວິຊາການຂອງສະຖາບັນຄົ້ນຄວ້າວິຊາການທີ່ມີຊື່ສຽງໃນສາກົນ, ຜູ້ຕາງໜ້າອົງການຈັດຕັ້ງສາກົນສຳຄັນແລະທ່ານອື່ນໆຮ້ອຍກວ່າທ່ານເຂົ້າຮ່ວມ.
ທ່ານຫຼີເຄີ້ສຽງກ່າວເນັ້ນວ່າ: ມວນມະນຸດກຳລັງຜະເຊີນກັບການປະຕິວັດອຸດສາຫະກຳແລະເຕັກນິກຮອບໃໝ່. ລັດຖະບານຈີນໄດ້ເອົາໃຈໃສ່ຕໍ່ການເຄື່ອນໄຫວປະດິດສ້າງໃໝ່ດ້ວຍຈິດໃຈກວມລວມແລະສຸຂຸມຮອບຄອບ, ຈີນສົ່ງເສີມການພັດທະນາເຕັກນິກໃໝ່,ຮູບແບບອຸດສາຫະກຳໃໝ່ ແລະສ້າງຊ່ອງທາງໃຫ້ແກ່ການພັດທະນາການປະດິດສ້າງໃໝ່. ພວກເຮົາຈະເພີ່ມທະວີການປົກປ້ອງຊັບສິນທາງປັນຍາຢ່າງຮອບດ້ານ, ປັບປຸງລະບຽບການຊົດໃຊ້ແທນໃນລັກສະນະລົງໂທດຕໍ່ການລະເມີດຊັບສິນທາງປັນຍາ, ສ້າງສະພາບແວດລ້ອມດຳເນີນທຸລະກິດທີ່ໄດ້ມາດຕະຖານສາກົນ, ຫັນເປັນຕະຫຼາດແລະດຳເນີນງານຕາມກົດໝາຍ.
ບັນດາຜູ້ແທນປະເທດຕ່າງໆໄດ້ປຶກສາຫາລືກ່ຽວກັບຈີນວ່າຈະສາມາດຮັກສາທ່ວງທ່າການຂະຫຍາຍຕົວໄດ້ແນວໃດເຊິ່ງລວມທັງການປະຕິຮູບທາງດ້ານໂຄງປະກອບ,ນະໂຍບາຍການເງິນ, ການປະຕິຮູບຂົງເຂດອຸດສາຫະກຳການຜະລິດແລະການທະນາຄານແລະອື່ນໆ ອັນໄດ້ເຮັດໃຫ້ເຂົາເຈົ້າມີຄວາມໝັ້ນໃຈຕໍ່ຕະຫຼາດຈີນ.