ທ່ານຫຼີເຄີ້ສຽງ ແລະ ຜູ້ນຳສະຫະພາບເອີຣົບເຂົ້າຮ່ວມພິທີຖະແຫຼງຂ່າວ
ຕອນບ່າຍວັນທີ 9 ເມສານີ້ຕາມເວລາທ້ອງຖິ່ນ, ທ່ານຫຼີເຄີ້ສຽງ ນາຍົກລັດຖະມົນຕີຈີນ ແລະ ທ່ານໂດໂນ ແຟຣງຊີສເຊັກ ຕູສ ປະທານສະພາມົນຕີເອີຣົບ, ທ່ານ ຢອງ ຄລູດເດີ ຢູນເກີ ປະທານຄະນະກຳມາທິການສະຫະພາບເອີຣົບ ໄດ້ເຂົ້າຮ່ວມພິທີຖະແຫຼງຂ່າວ ຫຼັງຈາກສິ້ນສຸດການພົບປະລະຫວ່າງຜູ້ນຳຈີນ-ສະຫະພາບເອີຣົບຄັ້ງທີ 21 ແລະ ຕອບຄຳຖາມຂອງນັກຂ່າວ.
ສອງຝ່າຍໄດ້ເປີດເຜີຍຜົນການພົບປະກັນຄັ້ງນີ້ ແລະ ເປັນເອກະພາບກັນເຫັນວ່າ: ໃນສະຖານະການສາກົນໃນປັດຈຸບັນ, ຈີນ ແລະ ສະຫະພາບເອີຣົບໃນຖານະເປັນສອງກຳລັງໃຫຍ່ຫຼວງທີ່ສຳຄັນໃນການປົກປັກຮັກສາສັນຕິພາບ, ຄວາມຈະເລີນຮຸ່ງເຮືອງ ແລະ ການພັດທະນາຂອງໂລກ ຄວນຮ່ວມມືກັນ ແລະ ເປີດກວ້າງຜົນປະໂຫຍດຮ່ວມກັນ ເພື່ອໃຫ້ປະຊາຊົນສອງຝ່າຍໄດ້ຮັບຜົນປະໂຫຍດ. ສອງຝ່າຍໄດ້ເປັນເອກະພາບກັນກ່ຽວກັບຖະແຫຼງການຮ່ວມຂອງການພົບປະກັນລະຫວ່າງຜູ້ນຳສອງຝ່າຍຄັ້ງນີ້ ໂດຍຜ່ານການແລກປ່ຽນຄວາມຄິດເຫັນແລະປຶກສາຫາລືກັນຢ່າງເລິກເຊິ່ງບົນພື້ນຖານເຄົາລົບເຊິ່ງກັນແລະກັນ ແລະ ປຶກສາຫາລືກັນຢ່າງສະເໝີພາບ ເຊິ່ງເປັນໝາກຜົນຮ່ວມແບບຕ່າງຝ່າຍຕ່າງມີຜົນປະໂຫຍດ.
ທ່ານຫຼີເຄີ້ສຽງ ກ່າວວ່າ: ການພົບປະກັນຄັ້ງນີ້ໄດ້ຮັບຜົນສຳເລັດຢ່າງຫຼວງຫຼາຍ, ໄດ້ບັນລຸຄວາມຮັບຮູ້ທີ່ສຳຄັນໃນບັນຫາຕ່າງໆ ເຊັ່ນ: ການລົງເລິກສາຍພົວພັນຄູ່ຮ່ວມລະຫວ່າງສອງຝ່າຍໃນ 4 ດ້ານ ຄື: ດ້ານສັນຕິພາບ, ດ້ານການເຕີບໂຕ, ດ້ານການປະຕິຮູບ ແລະ ດ້ານອາລະຍະທຳ, ການປົກປ້ອງລັດທິຫຼາຍຝ່າຍແລະການຄ້າເສລີ, ການເພີ່ມທະວີການຮ່ວມມືດ້ານການປະດິດສ້າງໃໝ່ທາງດ້ານວິທະຍາສາດເຕັກນິກ, ການຊຸກຍູ້ການເຈລະຈາສັນຍາການລົງທຶນ-ການຄ້າຈີນ-ສະຫະພາບເອີຣົບແລະສັນຍາແຫຼ່ງກຳເນີດຂອງຜົນຜະລິດ, ການເປີດກວ້າງການອະນຸມັດໃຫ້ເຂົ້າເຖິງຕະຫຼາດສອງຝ່າຍ, ການເພີ່ມທະວີການເຊື່ອມຈອດກັນ ແລະບັນຫາອື່ນໆ.
ທ່ານຕູສ ແລະ ທ່ານຢູນເກີ ຕ່າງກໍກ່າວວ່າ: ການເຈລະຈາລະຫວ່າງສອງຝ່າຍໄດ້ບັນລຸການອອກຖະແຫຼງການຮ່ວມ ຖືວ່າແມ່ນໄຊຊະນະທັງສອງຝ່າຍ. ສອງຝ່າຍຄວນຈັດຕັ້ງປະຕິບັດຄວາມຮັບຮູ້ທີ່ເປັນເອກະພາບກັນທຸກຂໍ້ທີ່ສອງຝ່າຍໄດ້ບັນລຸໃນການພົບປະກັນຄັ້ງນີ້, ປະສານງານກັນຢ່າງໃກ້ຊິດໃນວຽກງານສາກົນ, ເພີ່ມທະວີການສົນທະນາແລະຮ່ວມມືກັນໃນບັນຫາຕ່າງໆ ເຊັ່ນ: ການປະຕິຮູບອົງການການຄ້າໂລກເປັນຕົ້ນ ເພື່ອພັດທະນາສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນ-ເອີຣົບໃຫ້ເຂົ້າສູ່ລວງເລິກ.