ທ່ານ ສີຈິ້ນຜິງ ຕ້ອນຮັບການເຂົ້າຢ້ຽມຄຳນັບຂອງຜູ້ບັນຊາການສູງສຸດຂອງກອງທັບປ້ອງກັນປະເທດມຽນມາ
ຕາມຂ່າວCRI: ວັນທີ 10 ເມສານີ້ ຢູ່ນະຄອນຫຼວງປັກກິ່ງ, ທ່ານ ສີຈິ້ນຜິງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ມິນອອງລາຍ ຜູ້ບັນຊາການສູງສຸດຂອງກອງທັບປ້ອງກັນປະເທດມຽນມາ. ທ່ານ ສີຈິ້ນຜິງ ກ່າວວ່າ: ຈີນໃຫ້ຄວາມສຳຄັນຢ່າງສູງຕໍ່ການພົວພັນລະຫວ່າງຈີນ-ມຽນມາ, ບໍ່ວ່າສະຖານະການສາກົນຈະມີການປ່ຽນແປງແນວໃດກໍຕາມ,ຈີນຍິນດີສືບຕໍ່ຮ່ວມກັບມຽນມາເພີ່ມທະວີການຕິດຕໍ່ພົວພັນທາງຍຸດທະສາດຄືທີ່ໄດ້ປະຕິບັດຜ່ານມາ,ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ,ເພີ່ມເນື້ອໃນຈິດໃຈໃໝ່ເຂົ້າໃນການພົວພັນຄູ່ຮ່ວມມືຍຸດທະສາດຮອບດ້ານຈີນ-ມຽນມາໃຫ້ສົມບູນຂຶ້ນຕື່ມຢ່າງບໍ່ຢຸດຢັ້ງ,ສ້າງຜົນປະໂຫຍດຕົວຈິງໃຫ້ແກ່ປະຊາຊົນຂອງສອງປະເທດຫຼາຍກວ່າເກົ່າ,ຮ່ວມກັນປະກອບສ່ວນເຂົ້າໃນສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນ.
ທ່ານ ມິນອອງລາຍ ກ່າວວ່າ: ມຽນມາແລະຈີນໄດ້ມີໄມຕີຈິດມິດຕະພາບທີ່ເປັນມູນເຊື້ອທີ່ມີປະຫວັດສາດຍາວນານ,ການພົວພັນລະຫວ່າງສອງລັດ,ສອງກອງທັບໄດ້ຮັກສາການພັດທະນາທີ່ດີມາໂດຍຕະຫຼອດ. ມຽນມາຂໍສະແດງຄວາມຂອບໃຈຕໍ່ຈີນທີ່ໄດ້ໃຫ້ການສະໜັບສະໜູນທີ່ລ້ຳຄ່າແກ່ມຽນມາໃນການສ້າງສາພັດທະນາປະເທດແລະກອງທັບມຽນມາໃນໄລຍະຍາວນານມານີ້,ຂອບໃຈຕໍ່ຈີນທີ່ໄດ້ໃຫ້ການສະໜັບສະໜູນຕໍ່ຂະບວນການສັນຕິພາບພາຍໃນປະເທດຕົນ,ມຽນມາຊົມເຊີຍແລະສະໜັບສະໜູນຢ່າງຈິງໃຈພ້ອມທັງຍິນດີເຂົ້າຮ່ວມການສ້າງ “ໜຶ່ງແລວໜຶ່ງເສັ້ນທາງ” ຢ່າງຕັ້ງໜ້າ,ເພີ່ມທະວີການຮ່ວມມືຕົວຈິງກັບຈີນໃນຂົງເຂດຕ່າງໆ,ແລະຈະໃຊ້ມາດຕະການທີ່ແທ້ຈິງເພື່ອປົກປັກຮັກສາຄວາມໝັ້ນຄົງຢູ່ເຂດຊາຍແດນລະຫວ່າງສອງປະເທດ.