ກອງປະຊຸມສະພາມົນຕີສະຫະພັນການຮ່ວມມືສື່ມວນຊົນໃນຂອບ “ໜຶ່ງແລວໜຶ່ງເສັ້ນທາງ” ຄັ້ງທຳອິດ ໄດ້ຈັດຂຶ້ນໃນວັນທີ 23 ເມສານີ້ຢູ່ນະຄອນຫຼວງປັກກິ່ງ. ທ່ານສີຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍເຖິງກອງປະຊຸມດັ່ງກ່າວ.
ທ່ານສີຈິ້ນຜິງ ກ່າວວ່າ: ຈີນເປັນຜູ້ລິເລີ່ມ “ໜຶ່ງແລວໜຶ່ງເສັ້ນທາງ”, ແຕ່ໂອກາດແລະໝາກຜົນຕ່າງໆຈາກຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ເປັນຂອງໂລກ. ບັນດາຝ່າຍທີ່ເຂົ້າຮ່ວມຂໍ້ລິເລີ່ມດັ່ງກ່າວ ໄດ້ຍຶດຖືເນື້ອໃນຈິດໃຈເສັ້ນທາງສາຍໄໝແຫ່ງການຮ່ວມມືໂດຍສັນຕິ, ການເປີດກວ້າງແລະກວມລວມ, ການຖອດຖອນບົດຮຽນເຊິ່ງກັນແລະກັນ ແລະ ຕ່າງຝ່າຍຕ່າງມີຜົນປະໂຫຍດ, ພະຍາຍາມສ້າງ “ໜຶ່ງແລວໜຶ່ງເສັ້ນທາງ” ໃຫ້ກາຍເປັນເສັ້ນທາງແຫ່ງສັນຕິພາບ, ເສັ້ນທາງແຫ່ງຄວາມຈະເລີນຮຸ່ງເຮືອງ, ເສັ້ນທາງການເປີດກວ້າງ, ເສັ້ນທາງສີຂຽວ, ເສັ້ນທາງການປະດິດສ້າງໃໝ່ ແລະ ເສັ້ນທາງແຫ່ງອາລະຍະທຳ.
ທ່ານສີຈິ້ນຜິງ ກ່າວເນັ້ນວ່າ: ພວກເຮົາມີຄວາມປິຕິຊົມຊື່ນວ່າ, ພາຍຫຼັງໄດ້ສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລ້ວ, ໃນການຮ່ວມກັນສ້າງເຄືອຂ່າຍຄູ່ຮ່ວມ “ໜຶ່ງແລວໜຶ່ງເສັ້ນທາງ” ນັ້ນ, ສື່ມວນຊົນໄດ້ເສີມຂະຫຍາຍບົດບາດທີ່ສ້າງສັນແລະຕັ້ງໜ້າ. ຂະນະທີ່ສະຫະພັນການຮ່ວມມືສື່ມວນຊົນໃນຂອບ “ໜຶ່ງແລວໜຶ່ງເສັ້ນທາງ” ໄດ້ສ້າງເວທີການແລກປ່ຽນແລະຮ່ວມມືທີ່ສະດວກໃຫ້ແກ່ສື່ມວນຊົນຂອງປະເທດຕ່າງໆ. ຫວັງວ່າບັນດາຄະນະມົນຕີຈະສົ່ງເສີມເນື້ອໃນຈິດໃຈເສັ້ນທາງສາຍໄໝ, ເພີ່ມທະວີການແລກປ່ຽນແລະຮ່ວມມືກັນ ເພື່ອໃຫ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ນັ້ນສາມາດສ້າງຜົນປະໂຫຍດໃຫ້ແກ່ປະຊາຊົນບັນດາປະເທດລຽບຕາມ “ໜຶ່ງແລວໜຶ່ງເສັ້ນທາງ” ໄດ້ຫຼາຍກວ່າເກົ່າ.