ທ່ານ ສີຈິ້ນຜິງ ຕ້ອນຮັບຫົວຫນ້າຄະນະຜູ້ແທນຕ່າງປະເທດທີ່ເຂົ້າຮ່ວມກິດຈະກຳສະເຫລີມສະຫລອງວັນສ້າງຕັ້ງກອງທັບເຮືອຈີນຄົບຮອບ 70 ປີ
ຕາມຂ່າວສານຊີນຮວາ: ຕອນເຊົ້າວັນທີ 23 ເມສານີ້ ຢູ່ນະຄອນຊີງຕາວ, ທ່ານສີຈິ້ນຜີງ ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ຕ້ອນຮັບຫົວຫນ້າຄະນະຜູ້ແທນຝ່າຍຕ່າງປະເທດທີ່ເຂົ້າຮ່ວມກິດຈະກຳທະຫານເຮືອນາໆປະເທດເນື່ອງໃນໂອກາດວັນສ້າງຕັ້ງກອງທັບເຮືອຂອງກອງທັບປົດປ່ອຍປະຊາຊົນຈີນຄົບຮອບ 70 ປີ, ໂດຍທ່ານໄດ້ຕາງຫນ້າລັດຖະບານແລະກອງທັບຈີນສະແດງຄວາມຍິນດີຕ້ອນຮັບນາຍແລະພົນທະຫານເຮືອບັນດາປະເທດທີ່ເຂົ້າຮ່ວມກິດຈະກຳດັ່ງກ່າວ.
ທ່ານສີຈິ້ນຜິງກ່າວວ່າ, ກອງທັບຈີນຈະຊູຄັນທຸງແຫ່ງການຮ່ວມມືແບບຕ່າງຝ່າຍຕ່າງມີຜົນປະໂຫຍດຢ່າງສະເໝີຕົ້ນສະເໝີປາຍ, ອອກແຮງສ້າງສະພາບແວດລ້ອມແຫ່ງຄວາມໝັ້ນຄົງບົນພື້ນຖານຄວາມສະເໝີພາບ, ຄວາມໄວ້ເນື້ອເຊື່ອໃຈກັນ, ຄວາມຍຸດຕິທຳແລະຄວາມເປັນທຳ, ສ້າງສາຮ່ວມກັນແລະຊົມໃຊ້ຮ່ວມກັນ. ໃນຖານະທີ່ເປັນກອງກຳລັງສຳຄັນຕົ້ນຕໍເທີງທະເລຂອງປະເທດຊາດ, ທະຫານເຮືອມີຫນ້າທີ່ຮັບຜິດຊອບອັນໜັກໜ່ວງຕໍ່ການປົກປັກຮັກສາຄວາມສະຫງົບສັນຕິພາບ ແລະລະບຽບການອັນດີງາມທາງທະເລ. ຊາດຕ່າງໆຄວນໃຫ້ການເຄົາລົບເຊິ່ງກັນແລະກັນ, ປະຕິບັດຕໍ່ກັນຢ່າງສະເຫມີພາບ, ເພີ່ມຄວາມໄວ້ເນື້ອເຊື່ອໃຈກັນ, ເພີ່ມທະວີການແລກປ່ຽນແລະສົນທະນາທາງທະເລ, ລົງເລິກການຮ່ວມມືຢ່າງຕິດແທດຕົວຈິງລະຫວ່າງກອງທັບເຮືອ, ສະແຫວງຫາເສັ້ນທາງແຫ່ງຄວາມໝັ້ນຄົງທາງທະເລທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ຮ່ວມມືກັນຮັບມືກັບໄພຂົ່ມຂູ່ແລະສິ່ງທ້າທາຍທາງທະເລປະເພດຕ່າງໆຮ່ວມກັນ, ຮ່ວມກັນປົກປັກຮັກສາສັນຕິພາບແລະຄວາມສະຫງົບທາງທະເລ.
ທ່ານສີຈີ້ນຜິງຊີ້ອອກວ່າ, ປະຈຸບັນ, ການຮ່ວມມືທາງທະເລດ້ານການຕະຫລາດ, ເຕັກນິກ, ຂໍ້ມູນຂ່າວສານ, ແລະວັດທະນະທຳເປັນຕົ້ນນັບມື້ນັບແໜ້ນແຟ້ນ, ຈີນສະເຫນີຂໍລິເລີ່ມວ່າຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21 ກໍ່ແມ່ນຫວັງຢາກຊຸກຍູ້ການເຊື່ອມຈອດກັນທາງທະເລແລະການຮ່ວມມືທີ່ຕິດແທດຕົວຈິງໃນຂົງເຂດຕ່າງໆ, ຊຸກຍູ້ການພັດທະນາເສດຖະກິດສີຟ້າ, ຊຸກຍູ້ການເຊື່ອມໂຍງວັດທະນະທຳທາງທະເລ, ພ້ອມກັນເພີ່ມຄວາມຜາສຸກທາງທະເລ. ກອງທັບເຮືອຈີນຍິນດີຮ່ວມມືກັບກອງທັບເຮືອຂອງປະເທດຕ່າງໆ, ປະກອບສ່ວນຢ່າງຕັ້ງຫນ້າເຂົ້າໃນການຊຸກຍູ້ຄວາມຈະເລີນຮຸ່ງເຮືອງແລະການພັດທະນາທາງທະເລ.
ກ່ອນການພົບປະ, ທ່ານສີຈິ້ນຜີງໄດ້ຖ່າຍຮູບຮ່ວມກັບບັນດາຫົວຫນ້າຄະນະຜູ້ແທນຕ່າງປະເທດທີ່ເຂົ້າຮ່ວມກິດຈະກຳດັ່ງກ່າວ.