ຂະແໜງການທ່ອງທ່ຽວລາວຊົມເຊີຍໂອກາດໃໝ່ຈາກການຮ່ວມມື “ໜຶ່ງແລວໜຶ່ງເສັ້ນທາງ”
ແຕ່ວັນທີ 25 ຫາ ວັນທີ 27 ເມສານີ້, ກອງປະຊຸມສຸດຍອດເວທີປຶກສາຫາລືການຮ່ວມມື“ໜຶ່ງແລວໜຶ່ງເສັ້ນທາງ”ຄັ້ງທີ 2 ຈະຈັດຂຶ້ນຢູ່ນະຄອນຫຼວງປັກກິ່ງ. ໃນເວລາໃຫ້ສຳພາດຕໍ່ນັກຂ່າວ, ບຸກຄົນໃນວົງການທ່ອງທ່ຽວຂອງລາວກ່າວວ່າ, ຄຽງຄູ່ກັບການຮ່ວມມືພາຍໃຕ້ຂອບ “ໜຶ່ງແລວໜຶ່ງເສັ້ນທາງ” ລະຫວ່າງຈີນ ແລະ ລາວ ມີຄວາມຄືບໜ້າຢ່າງບໍ່ຢຸດຢັ້ງ, ເສັ້ນທາງຄົມມະນາຄົມມີຄວາມສະດວກຍິ່ງຂຶ້ນ, ການແລກປ່ຽນເພີ່ມຂຶ້ນ, ນັກທ່ອງທ່ຽວຈີນທີ່ໄປທ່ຽວປະເທດລາວກໍເພີ່ມຂຶ້ນເຊັ່ນກັນ. ວົງການທ່ອງທ່ຽວຂອງລາວຫວັງຢາກໃຫ້ສອງປະເທດລົງເລິກການຮ່ວມມື“ໜຶ່ງແລວໜຶ່ງເສັ້ນທາງ”ຕື່ມອີກ, ຊຸກຍູ້ຂະແໜງການທ່ອງທ່ຽວໃຫ້ພັດທະນາຢ່າງວ່ອງໄວ.
ເມືອງວັງວຽງແຂວງວຽງຈັນຫ່າງຈາກນະຄອນຫຼວງວຽງຈັນ 160 ກິໂລແມັດ, ມີທິວທັດທຳມະຊາດສວຍງາມ, ແລະໄດ້ຮັບຄວາມນິຍົມຊົມຊອບຈາກນັກທ່ອງທ່ຽວທັງພາຍໃນ ແລະ ຕ່າງປະເທດ. ທ່ານຫົງຄຳ ແກ້ວດວງສີ ຮອງປະທານສະມາຄົມນັກທຸລະກິດໜຸ່ມເມືອງວັງວຽງໄດ້ຢືນຢັນການປ່ຽນແປງໃນການພັດທະນາອັນໃຫຍ່ຫຼວງຂອງວັງວຽງ. ທ່ານບອກນັກຂ່າວວ່າ:
“ໃນເມື່ອກ່ອນ, ຟາກນ້ຳຊອງເບື້ອງນີ້ບໍ່ມີການພັດທະນາ,ແຕ່ວ່າໃນປະຈຸບັນນີ້ໄດ້ຮັບການພັດທະນາທຸກຢ່າງ,ມີການກະກຽມທີ່ເລີ່ມສ້າງໂຮງແຮມ ຣີຊອດ, ຈົນຮອດຫ່າງໄກຈາກຕົວເມືອງກໍໄດ້ຮັບການພັດທະນາ, ຖ້າທຽບໃສ່ເມື່ອກ່ອນ ຢູ່ເຂດໃດທີ່ອ່າວໄກ ບໍ່ໄດ້ມີການພັດທະນາ. ນັກທ່ອງທ່ຽວຈີນກໍມີການເພີ່ມຂຶ້ນ, ເພາະວ່າເມື່ອກ່ອນຕາມຂ້າພະເຈົ້າເຫັນມີກໍມີແຕ່ສຸກເສົາທິດທີ່ເປັນຄະນະທົວ,ໃນປະຈຸບັນນີ້ມີເກືອບທຸກມື້.”
ທ່ານສົມພັນ ສິສຸລາດ, ປະທານສະມາຄົມໂຮງແຮມເມືອງວັງວຽງເຫັນວ່າ, ການທ່ອງທ່ຽວຂອງວັງວຽງກຳລັງໄດ້ຮັບໂອກາດທີ່ດີໃນການພັດທະນາ. ທ່ານກ່າວວ່າ,“ເມື່ອມີທາງລົດໄຟ ແລະ ທາງດ່ວນແລ້ວ, ຄາດວ່າຈະມີນັກທ່ອງທ່ຽວທີ່ມາວັງວຽງຈະເພີ່ມຂຶ້ນຫຼາຍເທົ່າ.”
ທາງລົດໄຟທີ່ທ່ານສົມພັນ ສິສຸລາດເວົ້າເຖິງນັ້ນກໍແມ່ນທາງລົດໄຟລາວຈີນ. ປະເທດລາວເປັນປະເທດດຽວເທົ່ານັ້ນທີ່ບໍ່ມີທາງອອກສູ່ທະເລຢູ່ແຫຼມອິນໂດຈີນ. ເປັນເວລາດົນນານມາແລ້ວ, ເສັ້ນທາງຄົມມະນາຄົມທີ່ບໍ່ສະດວກໄດ້ກົດໜ່ວງການພັດທະນາຂອງປະເທດລາວ. ເສັ້ນທາງລົດໄຟລາວຈີນເປັນໂຄງການຂີດໝາຍສຳຄັນຂອງການຮ່ວມມືລາວຈີນໃນຂອບ“ໜຶ່ງແລວໜຶ່ງເສັ້ນທາງ”, ຫຼັງຈາກສ້າງສຳເລັດຈະປ່ຽນແປງປະຫວັດສາດໜ້າໃໝ່ທີ່ປະເທດລາວບໍ່ເຄີຍມີທາງລົດໄຟມາດຕະຖານ, ຈະຊ່ວຍຍົກສູງປະສິດທິພາບການຂົນສົ່ງ, ແລະຊຸກດັນໃຫ້ເສດຖະກິດສັງຄົມຂອງລາວມີການພັດທະນາຢ່າງວ່ອງໄວ. ຮອດເວລານັ້ນ, ຂະແໜງການທ່ອງທ່ຽວກໍຈະໄດ້ຮັບຜົນປະໂຫຍດຢ່າງໃຫຍ່ຫຼວງເຊັ່ນກັນ.
ທ່ານນາງ ບົວແກ້ວ ຮຸ່ງອາລຸນ, ຜູ້ຈັດການໂຮງແຮມມະໂນລັກຫຼວງພະບາງບອກນັກຂ່າວວ່າ, ເພິ່ນໄດ້ວາງແຜນຂະຫຍາຍໂຮງແຮມ ແລະ ສ້າງຣີສອດແຫ່ງໃໝ່ຢູ່ໃກ້ແຫຼ່ງທ່ອງທ່ຽວ, ເພື່ອຕ້ອນຮັບນັກທ່ອງທ່ຽວຕື່ມຫຼັງທາງລົດໄຟເປີດບໍລິການແລ້ວ.
ຫຼວງພະບາງເປັນເມືອງມໍລະດົກທາງທຳມະຊາດ ແລະ ວັດທະນະທຳຂອງໂລກທີ່ມີຊື່ສຽງ, ແລະກໍເປັນຈຸດໝາຍປາຍທາງຂອງນັກທ່ອງທ່ຽວຕ່າງປະເທດຈຳນວນຫຼວງຫຼາຍ. ທ່ານສຸລິທິດ ໜໍ່ຂຸນຜົນ ຫົວໜ້າພະແນກຖະແຫຼງຂ່າວ ວັດທະນະທຳ ແລະທ່ອງທ່ຽວແຂວງຫຼວງພະບາງໄດ້ໃຊ້ຄຳປຽບທຽບວ່າ, ຖ້າວ່າ ການຍົກລະດັບເງື່ອນໄຂຄົມມະນາຄົມ ການກິນ ການຢູ່ແມ່ນການປັບປຸງຮາດແວ, ການຍົກລະດັບການບໍລິການໃຫ້ແກ່ນັກທ່ອງທ່ຽວກໍເໝືອນກັບການອັດເດດຊັອບແວ. ທ່ານກ່າວຕື່ມວ່າ, ຫຼວງພະບາງຈະເລັ່ງລັດດຶງດູດການລົງທຶນຂອງນັກທຸລະກິດຈີນ, ລົງເລິກການຮ່ວມມືກັບພາກສ່ວນທີ່ກ່ຽວຂ້ອງຂອງຝ່າຍຈີນ, ເພື່ອຍົກລະດັບຄວາມສາມາດດ້ານການບໍລິການທ່ອງທ່ຽວໃຫ້ສູງຂຶ້ນເລື້ອຍໆ.
ທ່ານບອກນັກຂ່າວວ່າ:“ເສັ້ນທາງລົດໄຟລາວຈີນສ້າງສຳເລັດຈະເຮັດໃຫ້ການໄປມາຫາສູ່ກັນມີຄວາມສະດວກສະບາຍ,ສອງປະເທດລາວຈີນຈະມີການຮ່ວມມືກ້າວສູ່ລວງເລິກໃນຂອບ “ໜຶ່ງແລວໜຶ່ງເສັ້ນທາງ”,ເຮັດໃຫ້ປະເທດລາວຈາກປະເທດ landlockedກາຍ ເປັນປະເທດ landlinked,ນີ້ຈະເປັນແຮງຊຸກດັນອັນໃຫຍ່ຫຼວງໃຫ້ແກ່ຂະແໜງການທ່ອງທ່ຽວຂອງລາວໃຫ້ມີການພັດທະນາຢ່າງວ່ອງໄວ ແລະມີຄວາມກ້າວໜ້າ.”
ອີງຕາມສະຖິຕິຂອງກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວລາວສະແດງໃຫ້ເຫັນວ່າ, ປີ 2018 ມີນັກທ່ອງທ່ຽວຕ່າງປະເທດຫຼາຍກວ່າ 4 ລ້ານ 1 ແສນເທື່ອຄົນໄປທ່ຽວປະເທດລາວ. ໃນນັ້ນ, ນັກທ່ອງທ່ຽວຈີນກວມປະມານ 1 ສ່ວນ 5. ຕັ້ງແຕ່ເລີ່ມເປີດປີທ່ອງທ່ຽວລາວຈີນ 2019 ເປັນຕົ້ນມາ, ສອງປະເທດໄດ້ຈັດກິດຈະກຳຕ່າງໆ, ເຊັ່ນ: ການໂຄສະນາການທ່ອງທ່ຽວ, ກອງປະຊຸມເວທີປຶກສາຫາລື, ການອົບຮົມ, ການສະແດງສິລະປະ, ເທດສະການອາຫານ ແລະອື່ນໆ, ຄາດວ່າປີ 2019 ນີ້ຈະມີນັກທ່ອງທ່ຽວຈີນໄປທ່ຽວລາວຫຼາຍກວ່າ 1 ລ້ານເທື່ອຄົນ.
ອີງຕາມສະຖິຕິ, ຂະແໜງການທ່ອງທ່ຽວ ແລະຂະແໜງການອ້ອມຂ້າງໄດ້ກາຍເປັນຂະແໜງການເສົາຄໍ້າຂອງປະເທດລາວ, ໄດ້ສ້າງວຽກເຮັດງານທຳຫຼາຍກວ່າ 3 ແສນ 8 ໝື່ນ 5 ພັນຕຳແໜ່ງ, ອັດຕາປະກອບສ່ວນເຂົ້າໃນ GDP ຫຼາຍກວ່າ 10%. ເຊື່ອໝັ້ນວ່າຄຽງຄູ່ກັບການຮ່ວມມືລະຫວ່າງສອງປະເທດລາວຈີນໃນຂອບ “ໜຶ່ງແລວໜຶ່ງເສັ້ນທາງ”ກ້າວສູ່ລວງເລິກຢ່າງບໍ່ຢຸດຢັ້ງ, ສະນັ້ນບໍ່ພຽງແຕ່ແມ່ນຂະແໜງການທ່ອງທ່ຽວ, ແຕ່ຍັງມີຂະແໜງການອື່ນໆກໍຈະໄດ້ຮັບການເຕີບໂຕໄວຂຶ້ນພ້ອມທັງຈະໄດ້ຮັບຜົນປະໂຫຍດຮ່ວມກັນຢ່າງຫຼວງຫຼາຍເຊັ່ນກັນ.