ໄຂງານວາງສະແດງສິລະປະສວນໂລກປັກກິ່ງຈີນ 2019 ຢ່າງເປັນທາງການ
ຕາມຂ່າວ CRI: ຕອນຄ່ຳວັນທີ 28 ເມສານີ້, ພິທີໄຂງານວາງສະແດງສິລະປະສວນໂລກປັກກິ່ງຈີນ 2019 ໄດ້ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນ. ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມພິທີໄຂແລະກ່າວຄຳປາໄສ.
ບັນດາຜູ້ນຳແລະທູດພິເສດຂອງ 11 ປະເທດ, ຜູ້ຮັບຜິດຊອບຂອງອົງການຈັດຕັ້ງສາກົນທີ່ກ່ຽວຂ້ອງ, ຜູ້ເຂົ້າຮ່ວມງານວາງສະແດງສາກົນ, ບຸກຄົນວົງການອຸດສາຫະກຳການຄ້າທົ່ວໂລກ, ຜູ້ຊ່ຽວຊານທີ່ມີຊື່ສຽງໃນວົງການສິລະປະສວນປະມານ 900 ທ່ານໄດ້ເຂົ້າຮ່ວມພິທີດັ່ງກ່າວ.
ໃນເວລາກ່າວຄຳປາໄສ, ທ່ານສີຈິ້ນຜິງ ປະທານປະເທດຈີນກ່າວວ່າ, ປະເທດຕ່າງໆມີແຕ່ຮ່ວມມືກັນ, ຈຶ່ງສາມາດຮັບມືກັບບັນຫາສິ່ງແວດລ້ອມຂອງໂລກ, ເຊັ່ນການປ່ຽນແປງຂອງດິນຟ້າອາກາດ, ມົນລະພິດທາງທະເລ, ການອະນຸລັກຄວາມຫຼາກຫຼາຍຂອງຊີວະນານາພັນແລະອື່ນໆ, ແລະບັນລຸເປົ້າໝາຍວາລະການພັດທະນາແບບຍືນຍົງ ປີ2030 ຂອງອົງການສະຫະປະຊາຊາດ. ທ່ານກ່າວວ່າ, ການສ້າງບ້ານເມືອງທີ່ສວຍງາມເປັນຄວາມໄຝ່ຝັນຮ່ວມກັນຂອງມວນມະນຸດ. ເມື່ອຜະເຊີນກັບສິ່ງທ້າທາຍດ້ານສິ່ງແວດລ້ອມ, ມວນມະນຸດເປັນປະຊາຄົມຮ່ວມຊາຕາກຳທີ່ຮ່ວມທຸກຮ່ວມສຸກ, ບໍ່ມີປະເທດໃດໆຈະສາມາດຢູ່ລອດດ້ວຍຕົນເອງໄດ້.
ງານວາງສະແດງສວນໂລກປັກກິ່ງໄດ້ຍຶດຖືຫົວຂໍ້ “ຊີວິດສີຂຽວ, ບ້ານເມືອງສວຍງາມ”, ໂດຍມີຈຸດປະສົງເພື່ອແນະນຳໃຫ້ປະຊາຊົນເຄົາລົບທຳມະຊາດ, ເຊື່ອມໂຍງເຂົ້າກັບທຳມະຊາດ, ແລະສະແຫວງຫາຊີວິດທີ່ສວຍງາມ. ເຂດສວນທີ່ຈັດງານວາງສະແດງສວນໂລກໄດ້ກົມກຽວກັບພູຂຽວນ້ຳໃສ, ທ່ານຫວັງວ່າ ທັດສະນະການພັດທະນາແບບສີຂຽວຈະຊຸກຍູ້ໃຫ້ເຂດສວນແຫ່ງນີ້ສາມາດແຜ່ຂະຫຍາຍໄປທົ່ວທຸກມຸມໂລກ.
ການສ້າງສາອາລະຍະທຳດ້ານນິເວດຈີນໄດ້ເລັ່ງລັດໄວຂຶ້ນ, ທ້ອງຟ້າປອດໂປ່ງກວ່າເກົ່າ, ສາຍພູຂຽວງາມກວ່າເກົ່າ, ແມ່ນ້ຳສົດໃສກວ່າເກົ່າຈະສະແດງໃຫ້ປະຊາຄົມໂລກໄດ້ເຫັນປະຈັກຕາຢ່າງບໍ່ຢຸດຢັ້ງ. ທ່ານກ່າວວ່າ, ການສ້າງອາລະຍະທຳດ້ານນິເວດໄດ້ຈັດເຂົ້າໃນແສນພັດທະນາສັງລວມແຫ່ງຊາດຈີນ, ສ້າງສາຈີນໃຫ້ສວຍງານກາຍເປັນເປົ້າໝາຍສູ້ຊົນຂອງປະຊາຊົນຈີນ.
ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ກໍຄືສ້າງເສັ້ນທາງແຫ່ງການພັດທະນາທີ່ເປີດປະຕູ, ຂະນະດຽວກັນກໍຄວນເປັນເສັ້ນທາງພັດທະນາສີຂຽວ. ທ່ານກ່າວວ່າ, ນີ້ແມ່ນຄວາມເຫັນເປັນເອກກະພາບອັນກັນສຳຄັນຂອງກອງປະຊຸມສຸດຍອດການຮ່ວມມືສາກົນ “ໜຶ່ງແລວໜຶ່ງເສັ້ນທາງ” ຄັ້ງທີ 2. ຈີນຍິນດີຮ່ວມກັບບັນດາຝ່າຍ, ສ້າງໜ່ວຍໂລກທີ່ສວຍງາມຮ່ວມກັນ, ສ້າງປະຊາຄົມຮ່ວມຊາຕາກຳມວນມະນຸດຮ່ວມກັນ. ທ່ານຮຽກຮ້ອງໃຫ້ປະຊາຄົມໂລກຈົ່ງເລີ່ມຕົ້ນດ້ວຍຕົນເອງຈາກປັດຈຸບັນ, ສືບທອດການສ້າງອາລະຍະທຳນິເວດຈາກຄົນລຸ້ນນີ້ສູ່ຄົນລຸ້ນຕໍ່ໄປ.
ທ່ານ ສີຈິ້ນຜິງ ຮຽກຮ້ອງໃຫ້ຮັກສາຄວາມສົມດູນໂດຍລວມດ້ານນິເວດຂອງໂລກ,ເຮັດໃຫ້ລູກຫຼານທຸກເຊັ່ນຄົນສາມາດຊົມໃຊ້ຊັບພະຍາກອນທີ່ອຸດົມສົມບູນ,ທັງສາມາດເງີຍໜ້າເບິ່ງທ້ອງຟ້າທີ່ເຕັມໄປດ້ວຍດວງດາວ,ໄດ້ເຫັນພູຂຽວແລະດົມກິ່ນຫອມດອກໄມ້. ທ່ານກ່າວວ່າ,ຖ້າຈະດຳເນີນການພັດທະນາແບບບໍ່ມີລະບຽບການ,ຍຶດເອົາຊັບພະຍາກອນຢ່າງປ່າເຖື່ອນ,ມະນຸດເຮົາຍ່ອມຈະຖືກແກ້ແຄ້ນຢ່າງໄຮ້ຄວາມປານີດຈາກທຳມະຊາດ;ຖ້ານຳໃຊ້ຢ່າງເໝາະສົມແລະມີການອະນຸລັກທີ່ເປັນມິດ ກັບທຳມະຊາດ,ມະນຸດເຮົາຍ່ອມຈະສາມາດໄດ້ຮັບການຕອບແທນບຸນຄຸນຈາກທຳມະຊາດດ້ວຍຄວາມອຸດົມສົມບູນ.
ທ່ານ ສີຈິ້ນຜິງ ກ່າວວ່າ, ການປັບປຸງສິ່ງແວດລ້ອມນິເວດໃຫ້ດີຂຶ້ນ ກໍເປັນການພັດທະນາກຳລັງການຜະລິດ. ທ່ານກ່າວວ່າ, ນ້ຳໃສພູຂຽວກໍ່ແມ່ນພູເງິນພູຄຳ, ປະຊາຄົມໂລກຄວນສະແຫວງຫາການພັດທະນາຄວາມຈະເລີນຮຸ່ງເຮືອງແບບສີຂຽວ, ເພາະວ່າການມີລະບົບນິເວດທີ່ດີ ກໍມີຄຸນຄ່າຕໍ່ເສດຖະກິດທີ່ບໍ່ມີວັນສິ້ນສຸດ, ສາມາດປະດິດສ້າງຢ່າງມີປະສິດທິຜົນແບບສັງລວມຢ່າງບໍ່ຢຸດຢັ້ງ, ຈະຊຸກຍູ້ໃຫ້ເສດຖະກິດສັງຄົມມີການພັດທະນາແບບຍືນຍົງ.
ການສ້າງອາລະຍະທຳດ້ານນິເວດໃຫ້ດີຕ້ອງມີການສະແຫວງຫາໃນ 5 ດ້ານ ຄື: ການສະແຫວງຫາຄວາມກົມກຽວກັນລະຫວ່າງມະນຸດກັບທຳມະຊາດ, ການສະແຫວງຫາຄວາມຈະເລີນຮຸ່ງເຮືອງແລະການພັດທະນາແບບສີຂຽວ, ການສະແຫວງຫາຄວາມຮັກຫອມຕໍ່ທຳມະຊາດ, ການສະແຫວງຫາແນວຄິດບໍລິຫານຕາມຫຼັກວິທະຍາສາດ ແລະການສະແຫວງຫາການຮ່ວມມືກັນແກ້ໄຂບັນຫາຕ່າງໆ.
ທ່ານສີຈິ້ນຜິງກ່າວຕື່ມວ່າ, ຂະບວນການຫັນເປັນອຸດສາຫະກຳໄດ້ສ້າງຊັບສິນດ້ານວັດຖຸຢ່າງອຸດົມສົມບຸນທີ່ບໍ່ເຄີຍມີມາກ່ອນ, ແຕ່ກໍໄດ້ທຳລາຍລະບົບນິເວດທີ່ຟື້ນຄືນໄດ້ຍາກ. ການພັດທະນາທີ່ສະແຫວງຫາພຽງແຕ່ຜົນປະໂຫຍດນັ້ນໄປມາຮອດຂັ້ນສຸດທ້າຍແລ້ວ, ການພັດທະນາແບບສີຂຽວທີ່ເປັນໄປຕາມທຳມະຊາດແລະຮັກສານິເວດຈິ່ງແມ່ນອະນາຄົນຂອງມວນມະນຸດ.