ວັນທີ 5 ພຶດສະພານີ້, ງານຕະຫຼາດນັດສິນຄ້າຂາເຂົ້າຂາອອກຈີນ ຫຼື ງານຕະຫຼາດນັດກວາງໂຈ່ວຄັ້ງທີ 125 ໄດ້ສິ້ນສຸດລົງ, ມູນຄ່າການຄ້າສົ່ງອອກ, ຈຳນວນນັກທຸລະກິດຈັດຊື້ທີ່ເຂົ້າຮ່ວມງານຕະຫຼາດນັດຄັ້ງນີ້ຫຼຸດລົງໜ້ອຍໜຶ່ງເມື່ອທຽບໃສ່ໄລຍະດຽວກັນຂອງປີ 2018, ແຕ່ສະພາບການສົ່ງອອກສິນຄ້າສູ່ບັນດາປະເທດ ແລະເຂດແຄ້ວນລຽບຕາມ “ໜຶ່ງແລວໜຶ່ງເສັ້ນທາງ” ມີທ່າອ່ຽງທີ່ດີ, ມູນຄ່າເພີ່ມຂຶ້ນເກືອບ 10% ເມື່ອທຽບໃສ່ໄລຍະດຽວກັນຂອງປີ 2018.
ງານຕະຫຼາດນັດຄັ້ງນີ້ມີຜູ້ຈັດຊື້ເກືອບ 2 ແສນຄົນຈາກ 213 ປະເທດ ແລະເຂດແຄວ້ນທົ່ວໂລກເຂົ້າຮ່ວມ ເຊິ່ງໄດ້ສົ່ງອອກສິນຄ້າສູ່ບັນດາປະເທດ ແລະເຂດແຄວ້ນລຽບຕາມ “ໜຶ່ງແລວໜຶ່ງເສັ້ນທາງ” ບັນລຸເຖິງ 10,63 ຕື້ໂດລາສະຫະລັດ ເພີ່ມຂຶ້ນ 9,9% ເມື່ອທຽບໃສ່ປີ 2018, ກວມມູນຄ່າທັງໝົດ 35,8%. ມີຜູ້ຈັດຊື້ຈາກບັນດາປະເທດ ແລະເຂດແຄວ້ນລຽບຕາມ “ໜຶ່ງແລວໜຶ່ງເສັ້ນທາງ” ຫຼາຍກວ່າ 88 ພັນຄົນເຂົ້າຮ່ວມ, ກວມເອົາຜູ້ເຂົ້າຮ່ວມງານທັງໝົດ 45% ເພີ່ມຂຶ້ນຕື່ມອີກເມື່ອທຽບໃສ່ປີ 2018.
ງານຕະຫຼາດນັດຄັ້ງນີ້ມີຜູ້ຈັດຊື້ຂອງອາຊຽນຈຳນວນຫຼວງຫຼາຍ, ເພີ່ມຂຶ້ນ 4,79% ເມື່ອທຽບໃສ່ປີ 2018, ໃນນັ້ນ ຜູ້ຈັດຊື້ຈາກໄທ, ມາເລເຊຍ, ຫວຽດນາມ, ສິງກະໂປ ແລະກຳປູເຈຍໄດ້ເພີ່ມຂຶ້ນຢ່າງຫຼວງຫຼາຍ.