ປຶ້ມ “ຄັດຈ້ອນຄຳເຫັນຂອງທ່ານສີຈິ້ນຜິງວ່າດ້ວຍວຽກງານກະສິກຳ, ຊົນນະບົດແລະຊາວກະສິກອນ” ທີ່ຮຽບຮຽງໂດຍສະຖາບັນຄົ້ນຄວ້າປະຫວັດສາດພັກແລະເອກະສານເກົ່າຂອງສູນກາງພັກກອມມູນິດຈີນ ໄດ້ຖືກພິມໂດຍສຳນັກພິມເອກະສານເກົ່າສູນກາງໃນຫວ່າງມໍ່ໆມານີ້ ແລະຈຳໜ່າຍໃນຂອບເຂດທົ່ວປະເທດ.
ປຶ້ມດັ່ງກ່າວແບ່ງເປັນ 11 ຫົວຂໍ້ຫຼັກ, ໄດ້ແກ່: ຍຶດໝັ້ນການພັດທະນາກະສິກຳແລະຊົນນະບົດກ່ອນໝູ່, ປະຕິບັດຍຸດທະສາດສ້າງຊົນນະບົດໃຫ້ຈະເລີນຂຶ້ນ; ສ້າງແລະບູລະນະໂຄງປະກອບ, ກົນໄກ ແລະລະບົບນະໂຍບາຍກ່ຽວກັບການພັດທະນາຕົວເມືອງແລະຊົນນະບົດໃຫ້ເຊື່ອມໂຍງເຂົ້າກັນ, ເລັ່ງລັດແລະຊຸກຍູ້ກະສິກຳແລະຊົນນະບົດຫັນເປັນທັນສະໄໝໃຫ້ໄວຂຶ້ນ; ປັບປຸງແລະບູລະນະລະບຽບການທຸລະກິດຂັ້ນພື້ນຖານຢູ່ຊົນນະບົດ, ລົງເລິກການປະຕິຮູບລະບຽບການທີ່ດິນຊົນນະບົດ; ຮັບປະກັນຄວາມປອດໄພດ້ານສະບຽບອາຫານຂອງຊາດ, ສົ່ງເສີມໃຫ້ຊາວຈີນສາມາດກຸ້ມຕົນເອງໄດ້ໃນດ້ານສະບຽບອາຫານ; ລົງເລິກການປະຕິຮູບໂຄງປະກອບການສະໜອງດ້ານກະສິກຳ; ນຳພາການສ້າງຊົນນະບົດໃຫ້ຈະເລີນຂຶ້ນດ້ວຍການພັດທະນາແບບສີຂຽວ; ສືບທອດ, ພັດທະນາ ແລະ ຍົກລະດັບອາລະຍະທຳກະສິກຳໃຫ້ສູງຂຶ້ນ; ເພີ່ມທະວີແລະປະດິດສ້າງໃໝ່ໃນດ້ານການບໍລິຫານຊົນນະບົດ; ສະໜັບສະໜູນແລະສົ່ງເສີມຊາວກະສິກອນໃນການປະກອບອາຊີບແລະດຳເນີນທຸລະກິດ, ເປີດກວ້າງຊ່ອງທາງການສ້າງລາຍຮັບໃຫ້ເພີ່ມຂຶ້ນ; ເດັດດ່ຽວເອົາຊະນະບັ້ນຮົບແຫ່ງການຫຼຸດຜ່ອນຄວາມທຸກຍາກຂອງປະຊາກອນຜູ້ທຸກຍາກຢູ່ຊົນນະບົດ; ເພີ່ມທະວີແລະປັບປຸງການນຳພາຂອງພັກຕໍ່ວຽກງານກະສິກຳ, ຊົນນະບົດ ແລະ ຊາວກະສິກອນ. ປຶ້ມດັ່ງກ່າວໄດ້ຮີບໂຮມຄັດຈ້ອນຄຳເຫັນ 286 ຕອນຂອງທ່ານ ສີຈິ້ນຜິງ ຈາກບົດລາຍງານ, ທິດຊີ້ນຳ ແລະສານຊົມເຊີຍທີ່ສຳຄັນເປັນຕົ້ນລວມມີ 70 ກວ່າບົດ ນັບແຕ່ເດືອນທັນວາປີ 2012 ຮອດເດືອນມີນາປີ 2019. ໃນນັ້ນ, ບາງຕອນຂອງຄຳເຫັນຖືກເຜີຍແຜ່ເປັນຄັ້ງທຳອິດ.