ວັນທີ 7 ພຶດສະພານີ້ໃນເວລາຕອບຄຳຖາມຂອງນັກຂ່າວກ່ຽວກັບທ່ານລິວເຮີ້ ຮອງນາຍົກລັດຖະມົນຕີຈີນຈະເດີນທາງໄປອາເມຣິກາເພື່ອດຳເນີນການປຶກສາຫາລືດ້ານເສດຖະກິດການຄ້າ, ທ່ານເກີງສວງ ໂຄສົກກະຊວງການຕ່າງປະເທດຈີນກ່າວວ່າ, ການເຄົາລົບນັບຖືເຊິ່ງກັນແລະກັນ, ຄວາມສະເໝີພາບກັນແລະຕ່າງຝ່າຍຕ່າງມີຜົນປະໂຫຍດແມ່ນປັດໄຈເພື່ອພື້ນຖານທີ່ບັນລຸສັນຍາ, ການຂຶ້ນພາສີບໍ່ສາມາດແກ້ໄຂບັນຫາໃດໆໄດ້. ຈີນບໍ່ຫຼີກລ່ຽງຄວາມຂັດແຍ້ງກັນ, ແລະມີຄວາມຈິງໃຈຕໍ່ການປຶກສາຫາລືດ້ານເສດຖະກິດການຄ້າລະຫວ່າງຈີນ-ອາເມຣິກາ.
ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 7 ພຶດສະພານີ້, ທ່ານເກີງສວງ ກ່າວວ່າ: “ຈີນເຫັນໂດຍຕະຫຼອດວ່າ, ການເຄົາລົບນັບຖືເຊິ່ງກັນແລະກັນ, ຄວາມສະເໝີພາບກັນແລະຕ່າງຝ່າຍຕ່າງມີຜົນປະໂຫຍດແມ່ນປັດໄຈພື້ນຖານເພື່ອບັນລຸສັນຍາ, ການຂຶ້ນພາສີບໍ່ສາມາດແກ້ໄຂບັນຫາໃດໆ. ການເຈລະຈາກໍຄືຂະບວນການປຶກສາຫາລື, ສອງຝ່າຍມີຄວາມເຫັນຂັດແຍ້ງກັນເປັນເລື່ອງປົກກະຕິ, ຈີນບໍ່ຫຼີກລ່ຽງຄວາມຂັດແຍ້ງ, ແລະມີຄວາມຈິງໃຈສືບຕໍ່ດຳເນີນການປຶກສາຫາລື. ຈີນຫວັງໃຫ້ອາເມຣິກາສຸມຄວາມພະຍາຍາມຮ່ວມກັນກັບຈີນ, ປະຕິບັດຕາມທິດທາງດຽວກັນກັບຈີນບົນພື້ນຖານການເຄົາລົບນັບຖືເຊິ່ງກັນແລະກັນແລະສະເໝີພາບກັນ, ແກ້ໄຂຄວາມກັງວົນຂອງແຕ່ລະຝ່າຍຢ່າງສົມເຫດສົມຜົນ, ພະຍາຍາມບັນລຸສັນຍາທີ່ຕ່າງຝ່າຍຕ່າງມີຜົນປະໂຫຍດ.”