ໂຄສົກອົງການປົກຄອງເຂດບໍລິຫານພິເສດຮົງກົງ ສປ ຈີນຖະແຫຼງໃນວັນທີ 16 ພຶດສະພານີ້ວ່າ: ໃນສັນຍາການລົງທຶນຮົງກົງ-ອາຊຽນ, ໃນສ່ວນທີ່ພົວພັນລະຫວ່າງຮົງກົງກັບລາວ, ມຽນມາ, ສິງກະໂປ, ໄທແລະຫວຽດນາມ ຈະມີຜົນບັງຄັບໃຊ້ໃນວັນທີ 17 ເດືອນມິຖຸນາໜ້ານີ້.
ພາຍຫຼັງສັນຍາດັ່ງກ່າວເກີດມີຜົນບັງຄັບໃຊ້ແລ້ວ, ລາວ, ມຽນມາ, ສິງກະໂປ, ໄທແລະຫວຽດນາມຈະປະຕິບັດນະໂຍບາຍທີ່ຍຸຕິທຳແລະທ່ຽງທຳຕໍ່ວິສາຫະກິດຮົງກົງໃນການລົງທຶນຢູ່ປະເທດຕົນ ໂດຍຈະໃຫ້ການປົກປ້ອງແລະຮັບປະກັນແກ່ຜູ້ລົງທຶນ ທັງໃຫ້ຄຳໝັ້ນສັນຍາວ່າ ການລົງທຶນແລະຜົນກຳໄລ່ສາມາດໂອນໄດ້ຢ່າງເສລີ. ໃນກໍລະນີທີ່ໂຄງການລົງທຶນຖືກເວນຄືນຫຼືໄດ້ຮັບຜົນເສຍຫາຍຈາກເຫດການຕ່າງໆເຊັ່ນ: ສົງຄາມ, ການປະທະກັນທາງການທະຫານແລະອື່ນໆນັ້ນ, 5 ປະເທດສະມາຊິກອາຊຽນດັ່ງກ່າວຕ້ອງໃຫ້ການຊົດເຊີຍທີ່ກ່ຽວຂ້ອງໃຫ້ແກ່ວິສາຫະກິດຮົງກົງທີ່ລົງທຶນຢູ່ປະເທດຕົນນັ້ນຕາມຂໍ້ຕົກລົງທີ່ສອງຝ່າຍເຫັນດີນຳກັນແລະລະບຸໄວ້ໃນສັນຍາການລົງທຶນ.
ນອກນີ້, ໃນສັນຍາການຄ້າເສລີຮົງກົງ-ອາຊຽນ, ໃນສ່ວນທີ່ພົວພັນລະຫວ່າງຮົງກົງກັບລາວ, ມຽນມາ, ສິງກະໂປ, ໄທແລະຫວຽດນາມນັ້ນຈະ ມີຜົນບັງຄັບໃຊ້ໃນວັນທີ 11 ມິຖຸນານີ້.