ວັນທີ 21 ພຶດສະພານີ້, ທ່ານ ສີຈິ້ນຜິງ ປະທານປະເທດຈີນໄດ້ຕາງໜ້າລັດຖະບານ ແລະ ປະຊາຊົນຈີນ ແລະ ໃນນາມສ່ວນຕົວໄດ້ສົ່ງສານອວຍພອນເຖິງທ່ານ ໂຈໂຄ ວີໂດໂດ ທີ່ໄດ້ຮັບການເລືອກຕັ້ງເປັນປະທານາທິບໍດີອິນໂດເນເຊຍອີກສະໄໝໜຶ່ງ.
ທ່ານສີຈິ້ນຜິງກ່າວວ່າ: ຈີນ ແລະອິນໂດເນເຊຍຕ່າງກໍເປັນປະເທດໃຫຍ່ທີ່ກຳລັງພັດທະນາ, ມີຜົນປະໂຫຍດຮ່ວມກັນໃນລະດັບ 2 ຝ່າຍ, ເຂດແຄວ້ນ ແລະຫຼາຍຝ່າຍ, ເປັນຄູ່ຮ່ວມມືຢ່າງທຳມະຊາດ. ໃນຊຸມປີຜ່ານມາ, ສອງປະເທດໄດ້ຖືໂອກາດສ້າງ “ໜຶ່ງແລວໜຶ່ງເສັ້ນທາງ”, ລົງເລິກ ແລະພັດທະນາການເຊື່ອມຈອດຍຸດທະສາດຢ່າງບໍ່ຢຸດຢັ້ງ ເຊິ່ງໄດ້ຮັບໝາກຜົນຢ່າງພົ້ນເດັ່ນໃນການຮ່ວມມືຕົວຈິງໃນຂົງເຂດຕ່າງໆ ແລະເຮັດໃຫ້ສາຍພົວພັນສອງຝ່າຍກ້າວຂຶ້ນສູ່ລະດັບໃໝ່ທີ່ພັດທະນາຢ່າງວ່ອງໄວ. ຂ້າພະເຈົ້າເອົາໃຈໃສ່ເປັນຢ່າງສູງຕໍ່ສາຍພົວພັນຈີນ-ອິນໂດເນເຊຍ, ຍິນດີຮ່ວມກັນກັບທ່ານໂຈໂຄ ວີໂດໂດ ປະທານາທິບໍດີອິນໂດເນເຊຍ, ສືບຕໍ່ນຳພາສາຍພົວພັນຄູ່ຮ່ວມຍຸດທະສາດຮອບດ້ານສອງປະເທດໃຫ້ກ້າວຂຶ້ນສູ່ລະດັບໃໝ່ບົນພື້ນຖານໄລຍະ 5 ປີຜ່ານມາ ເພື່ອສ້າງຜົນປະໂຫຍດໃຫ້ສອງປະເທດ ແລະປະຊາຊົນສອງຊາດ.