ງານວາງສະແດງອຸດສາຫະກຳຖານຂໍ້ມູນໃຫຍ່ສາກົນຈີນປະຈຳປີ 2019 ໄດ້ຈັດຂຶ້ນໃນວັນທີ 26 ພຶດສະພານີ້ຢູ່ນະຄອນກຸ້ຍຢາງ ໂດຍ ທ່ານ ຫວາງເສີນ ກຳມະການກົມການເມືອງສູນກາງພັກກອມມູນິດຈີນ, ຮອງປະທານຄະນະປະຈຳສະພາປະຊາຊົນແຫ່ງຊາດຈີນເຂົ້າຮ່ວມພິທີເປີດງານ ທັງໄດ້ອ່ານຈົດໝາຍຊົມເຊີຍຂອງ ທ່ານ ສີຈິ້ນຜິງ ປະທານປະເທດຈີນທີ່ສົ່ງເຖິງງານດັ່ງກ່າວ ແລະ ໄດ້ກ່າວຄຳເຫັນ.
ທ່ານ ຫວາງເສີນ ກ່າວວ່າ: ການພັດທະນາເສດຖະກິດດີຈີຕອນ ແມ່ນຊ່ອງທາງທີ່ມີປະສິດທິຜົນໃນການຊຸກຍູ້ການປະຕິຮູບໂຄງປະກອບດ້ານການສະໜອງ, ແມ່ນເນື້ອໃນສຳຄັນແຫ່ງການສ້າງລະບົບເສດຖະກິດທີ່ທັນສະໄໝ ແລະ ແມ່ນຄວາມຕ້ອງການຢ່າງພາວະວິໄສໃນການບັນລຸການພັດທະນາຢ່າງມີຄຸນນະພາບສູງ. ຈີນຈະຍຶດໝັ້ນແລະຜັນຂະຫຍາຍທັດສະນະການພັດທະນາໃໝ່, ເສີມຂະຫຍາຍບົດບາດຂອງຖານຂໍ້ມູນໃຫຍ່ທີ່ເປັນຊັບພະຍາກອນພື້ນຖານແລະເປັນຫົວຈັກແຫ່ງການປະດິດສ້າງໃໝ່, ເລັ່ງລັດຊຸກຍູ້ຖານຂໍ້ມູນໃຫຍ່ໃຫ້ເປັນອຸດສາຫະກຳ ແລະ ອຸດສາຫະກຳຫັນເປັນຖານຂໍ້ມູນໃຫຍ່, ພະຍາຍາມບັນລຸການຫັນປ່ຽນຈີນຈາກປະເທດໃຫຍ່ດ້ານຖານຂໍ້ມູນໃຫຍ່ໃຫ້ກາຍເປັນປະເທດໃຫຍ່ທີ່ມີຄວາມເຂັ້ມແຂງດ້ານຖານຂໍ້ມູນໃຫຍ່. ຕ້ອງສ້າງລະບົບການຄຸ້ມຄອງດ້ວຍດີຈີຕອນ, ຊຸກຍູ້ການບໍລິຫານລັດໃຫ້ທັນສະໄໝ; ຫຼຸດຜ່ອນຄວາມແຕກໂຕນກັນດ້ານດີຈີຕອນ, ນຳໃຊ້ຖານຂໍ້ມູນໃຫຍ່ໃນການລົບລ້າງຄວາມທຸກຍາກ, ຮັບໃຊ້ສັງຄົມ, ສ້າງຄວາມຜາສຸກໃຫ້ແກ່ປະຊາຊົນ; ເພີ່ມທະວີການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ຊຸກຍູ້ການພັດທະນາເສດຖະກິດດີຈີຕອນຂອງໂລກ, ເຮັດໃຫ້ປະຊາຊົນແລະປະເທດຕ່າງໆສາມາດຊົມໃຊ້ໝາກຜົນໃນການພັດທະນາຖານຂໍ້ມູນໃຫຍ່ໃຫ້ຫຼາຍກວ່າເກົ່າ.
ທ່ານ ຫວາງເສີນ ກ່າວເນັ້ນອີກວ່າ: ຈີນຍິນດີຮ່ວມກັບບັນດາປະເທດໃນໂລກຮ່ວມກັນຊົມໃຊ້ໂອກາດການພັດທະນາເສດຖະກິດດີຈີຕອນ ແລະ ຮ່ວມກັນຮັບມືກັບສິ່ງທ້າທາຍຕ່າງໆ ເພື່ອປະກອບສ່ວນເຂົ້າໃນການຊຸກຍູ້ການສ້າງປະຊາຄົມຮ່ວມຊາຕາກຳມວນມະນຸດ.