ທ່ານ ຫຼີເຄີ້ສຽງ ພົບປະເຈລະຈາກັບນາຍົກວານູອາຕູ
ຕອນເຊົ້າວັນທີ 27 ພຶດສະພານີ້ ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະເຈລະຈາກັບທ່ານ ຄາລອດ ຊາວາຍ ນາຍົກລັດຖະມົນຕີວານູອາຕູ.
ທ່ານ ຫຼີເຄີ້ສຽງ ກ່າວວ່າ: ນັບຕັ້ງແຕ່ຈີນແລະວານູອາຕູສ້າງຕັ້ງສາຍພົວພັນທາງການທູດເປັນເວລາ 37 ປີມານີ້,ສອງຝ່າຍໄດ້ເຄົາລົບເຊິ່ງກັນແລະກັນແລະປະຕິບັດຕໍ່ກັນຢ່າງມີຄວາມສະເໝີພາບມາໂດຍຕະຫຼອດ.ຈີນມີຈຸດຢືນມາໂດຍຕະຫຼອດວ່າປະເທດໃຫຍ່ຫຼືປະເທດນ້ອຍລ້ວນແຕ່ມີຄວາມສະເໝີພາບກັນ,ສາມາດຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ.ຈີນແລະວານູອາຕູລ້ວນແຕ່ເປັນປະເທດທີ່ພວມພັດທະນາ,ພວກຂ້າພະເຈົ້າຍິນດີຮ່ວມກັບວານູອາຕູເສີມຂະຫຍາຍບົດບາດຕາມທ່າແຮງຂອງໃຜລາວ,ເພີ່ມທະວີຄວາມໄວ້ເນື້ອເຊື່ອໃຈກັນທາງການເມືອງ,ລົງເລິກການແລກປ່ຽນແລະຮ່ວມມືໃນຂົງເຂດຕ່າງໆ,ຊຸກຍູ້ການພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດໃຫ້ກ້າວຂຶ້ນສູ່ລະດັບໃໝ່.
ທ່ານ ຄາລອດ ຊາວາຍ ໄດ້ສະແດງຄວາມຊົມເຊີຍຕໍ່ການສະຖາປະນາສາທາລະນະລັດປະຊາຊົນຈີນຄົບຮອບ 70 ປີ. ທ່ານກ່າວວ່າ: ວານູອາຕູໃຫ້ຄວາມສຳຄັນຢ່າງສູງຕໍ່ການພົວພັນກັບຈີນ,ຂອບໃຈຈີນທີ່ໄດ້ໃຫ້ການສະໜັບສະໜູນແລະຊ່ວຍເຫຼືອແບບບໍ່ເຫັນແກ່ຕົວແກ່ປະເທດຕົນ,ຍິນດີຮ່ວມກັບຈີນລົງເລິກການແລກປ່ຽນດ້ານວັດທະນະທຳແລະການໄປມາຫາສູ່ກັນລະຫວ່າງເຈົ້າໜ້າທີ່ລັດຖະບານຢ່າງບໍ່ຢຸດຢັ້ງ,ຊຸກຍູ້ການຮ່ວມມືໃນຂົງເຂດການຄ້າ,ການລົງທຶນ,ພື້ນຖານໂຄງລ່າງແລະໂທລະຄົມເປັນຕົ້ນ,ຊຸກຍູ້ການພົວພັນສອງຝ່າຍກໍຄືການພົວພັນລະຫວ່າງຈີນກັບປະເທດເກາະດອນໃນມະຫາສະໝຸດປາຊີຟິກໃຫ້ກ້າວຂຶ້ນສູ່ລະດັບໃໝ່.
ຫຼັງການພົບປະ,ນາຍົກຂອງສອງປະເທດໄດ້ຮ່ວມກັນເປັນສັກຂີພິຍານໃນການເຊັນສັນຍາຮ່ວມມືລະຫວ່າງສອງປະເທດຫຼາຍສະບັບ.