ງານຕະຫຼາດນັດການຄ້າການບໍລິການສາກົນຈີນປີ 2019 ໄດ້ໄຂຂຶ້ນຢູ່ນະຄອນຫຼວງປັກກິ່ງ ສປ ຈີນໃນວັນທີ 28 ພຶດສະພານີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງສານສະແດງຄວາມຊົມເຊີຍຕໍ່ການຈັດງານດັ່ງກ່າວ.
ສານຂອງປະທານປະເທດຂຽນວ່າ, ຄຽງຄູ່ກັບເສດຖະກິດໂລກາພິວັດກ້າວເຂົ້າສູ່ລວງເລິກ, ການຄ້າການບໍລິການໄດ້ກາຍເປັນພາກສ່ວນສຳຄັນຂອງການຄ້າສາກົນແລະຂົງເຂດສຳຄັນໃນຂອງການຮ່ວມມືດ້ານເສດຖະກິດການຄ້າລະຫວ່າງປະເທດຕ່າງໆນັບມື້ນັບຫຼາຍ, ເປັນການເພີ່ມພະລັງແຮງໃໝ່ໃຫ້ແກ່ການເຕີບໂຕຂອງເສດຖະກິດໂລກ. ການຄ້າການບໍລິການມີອະນາຄົດໃນການພັດທະນາຢ່າງກວ້າງຂວາງ, ແລະມີກຳລັງບົ່ມຊ້ອນຢ່າງໃຫຍ່ຫຼວງ, ພວກເຮົາຄວນກຳໂອກາດໃຫ້ດີ, ຮ່ວມກັນສ້າງອະນາຄົດອັນດີງາມທີ່ “ການບໍລິການທົ່ວໂລກ, ແບ່ງປັນຜົນປະໂຫຍດຮ່ວມກັນ.”
ທ່ານສີຈິ້ນຜິງ ກ່າວເນັ້ນວ່າ, ຈີນໄດ້ສຸມກຳລັງເພື່ອຊຸກຍູ້ການເປີດປະຕູສູ່ພາຍນອກໃຫ້ກ້າວຂຶ້ນສູ່ລະດັບສູງກວ່າເກົ່າ, ເດັດດ່ຽວສະໜັບສະໜູນໂຄງປະກອບການຄ້າຫຼາຍຝ່າຍ, ແລະຈະເປີດກວ້າງຂົງເຂດທີ່ອະນຸຍາດການລົງທຶນຂອງຕ່າງປະເທດໃຫ້ເຂົ້າເຖິງຕະຫຼາດຈີນ, ຕັ້ງໜ້າສ້າງສະພາບແວດລ້ອມການດຳເນີນທຸລະກິດທີ່ມີລະດັບສູງ. ຈີນຍິນດີລົງເລິກການຮ່ວມມືດ້ານການລົງທຶນແລະການຄ້າການບໍລິການກັບປະເທດຕ່າງໆ, ຊຸກຍູ້ໃຫ້ການຄ້າແລະການລົງທຶນເປັນແບບເສລີແລະສະດວກ, ຊຸກຍູ້ໃຫ້ເສດຖະກິດໂລກພັດທະນາໄປສູ່ທິດທາງທີ່ເປີດປະຕູ, ກວມລວມ, ສ້າງຜົນປະໂຫຍດຢ່າງກວ້າງຂວາງ, ດຸນດ່ຽງແລະຕ່າງຝ່າຍຕ່າງມີຜົນປະໂຫຍດ.