ປະທານປະເທດຈີນພົບປະກັບນາຍົກວານູອາຕູ
ວັນທີ 28 ພຶດສະພານີ້, ທ່ານສີຈິ້ນຜິງ ປະທານປະເທດຈີນໃຫ້ກຽດຕ້ອນຮັບການເຂົ້າຢ້ຽມຄຳນັບຂອງທ່ານຄາລອດ ຊາວາຍ ນາຍົກລັດຖະມົນຕີວານູອາຕູຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ.
ທ່ານສີຈິ້ນຜິງ ກ່າວວ່າ, ປັດຈຸບັນ, ການພົວພັນລະຫວ່າງຈີນກັບວານູອາຕູເປັນໄລຍະດີທີ່ສຸດໃນປະຫວັດສາດ. ສອງຝ່າຍພວມຕັ້ງໜ້າປະຕິບັດໝາກຜົນຂອງການພົບປະກັນລະຫວ່າງຕົນກັບທ່ານນາຍົກເມື່ອປີຜ່ານມາ, ຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງປະເທດສືບຕໍ່ກ້າວເຂົ້າສູ່ລວງເລິກ, ການແລກປ່ຽນແລະຮ່ວມມືໃນຂົງເຂດຕ່າງໆໄດ້ເປີດກວ້າງອອກຢ່າງບໍ່ຢຸດຢັ້ງ. ການພົວພັນລະຫວ່າງຈີນກັບວານູອາຕູໄດ້ກາຍເປັນແບບຢ່າງຂອງການພົວພັນລະຫວ່າງຈີນກັບປະເທດເກາະດອນໃນມະຫາສະໝຸດປາຊີຟິກ. ຈີນຍິນດີຮ່ວມກັບວານູອາຕູ, ເພີ່ມທະວີການສົນທະນາ, ການຮ່ວມມືແລະການແລກປ່ຽນຢ່າງຮອບດ້ານ, ຊຸກຍູ້ໃຫ້ການພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດມີການຂະຫຍາຍຕົວຫຼາຍຂຶ້ນກວ່າເກົ່າ.
ທ່ານ ຊາ ວາຍ ໄດ້ກ່າວສະແດງຄວາມຊົມເຊີຍທີ່ຈີນໄດ້ສະຖາປະນາປະເທດຄົບຮອບ 70 ປີ, ຂອບໃຈນຳຈີນທີ່ໄດ້ໃຫ້ການຊ່ວຍເຫຼືອຢ່າງຈິງໃຈຕາມຄວາມຕ້ອງການທີ່ແທ້ຈິງຂອງວານູອາຕູໃນໄລຍະຜ່ານມາ, ຍິນດີເພີ່ມທະວີການຮ່ວມມືກັບຈີນໃນຂົງເຂດຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ປະຕິບັດວາລະການພັດທະນາແບບຍືນຍົງ 2030 ຂອງອົງການສະຫະປະຊາຊາດ, ຮັມມືກັບການປ່ຽນແປງຂອງດິນຟ້າອາກາດແລະຂົງເຂດອື່ນໆ, ເພີ່ມຄວາມພະຍາຍາມຊຸກຍູ້ໃຫ້ການພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນກັບວານູອາຕູຂະຫຍາຍຕົວໄປໜ້າຢ່າງບໍ່ຢຸດຢັ້ງ.