ວັນທີ 4 ມິຖຸນານີ້, ຫຼາຍອົງການຂອງຈີນ ເຊັ່ນ: ສະຖາບັນຄົ້ນຄວ້າຣັດເຊຍ, ເອີຣົບກາງແລະອາຊີກາງ ຂອງສະຖາບັນວິທະຍາສາດສັງຄົມແຫ່ງຊາດຈີນເປັນຕົ້ນ ໄດ້ຮ່ວມກັນອອກ “ປື້ມປົກເຫຼືອງຣັດເຊຍ: ບົດລາຍງານການພັດທະນາຂອງຣັດເຊຍປີ 2019” ໂດຍຊີ້ໃຫ້ເຫັນວ່າ: ມູນຄ່າການຄ້າລະຫວ່າງຈີນ-ຣັດເຊຍໄດ້ຮັກສາທ່ວງທ່າການເຕີບໂຕຢ່າງໝັ້ນທ່ຽງ. ປີຜ່ານມາ, ມູນຄ່າການຄ້າລະຫວ່າງຈີນ-ຣັດເຊຍໄດ້ບັນລຸເຖິງ 107.06 ຕື້ໂດລາສະຫະລັດ, ເປັນສະຖິຕິໃໝ່ໃນປະຫວັດສາດ, ຈັງຫວະການເຕີບໂຕຂອງມູນຄ່າການຄ້າກໍຈັດໃຫ້ຢູ່ອັນດັບໜຶ່ງໃນບັນດາຄູ່ຄ້າໃຫຍ່ຂອງຈີນແຕ່ອັນດັບທີ 1-10. ໃນນີ້, ຈີນສົ່ງອອກສູ່ຣັດເຊຍຕົ້ນຕໍແມ່ນຜະລິດຕະພັນກົນຈັກແລະເຄື່ອງຜະລິດໄຟຟ້າ, ສ່ວນການນຳເຂົ້າຈາກຣັດເຊຍຕົ້ນຕໍແມ່ນພະລັງງານແລະຊັບພະຍາກອນປະເພດຕ່າງໆ.
ທ່ານສວີໂພ່ຫຼົງ ຫົວໜ້າສະຖາບັນຄົ້ນຄວ້າຣັດເຊຍ, ເອີຣົບກາງແລະອາຊີກາງ ຂອງສະຖາບັນວິທະຍາສາດສັງຄົມແຫ່ງຊາດຈີນ ກ່າວວ່າ: ການຄ້າດ້ານການບໍລິການແລະດ້ານເຕັກໂນໂລຊີ ຈະກາຍເປັນຮູບການຕົ້ນຕໍແຫ່ງການຮ່ວມມືດ້ານການຄ້າລະຫວ່າງຈີນ-ຣັດເຊຍ. ນອກນີ້, ຫຼັງຈາກການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ເຊື່ອມຕໍ່ກັບສະຫະພາບເສດຖະກິດເອີຣົບອາຊີແລ້ວ, ຈີນແລະຣັດເຊຍຈະມີພື້ນທີ່ການຮ່ວມມືທີ່ກວ້າງຂວາງກວ່າເກົ່າໃນຂົງເຂດຫຼາຍຝ່າຍ.