ວັນທີ 17 ມິຖຸນານີ້, ສື່ມວນຊົນຈີນລາຍງານວ່າ: ໂດຍແນໃສ່ບັນຫາຫຍຸ້ງຍາກກ່ຽວກັບ “ລັກສະນະດື້ຢາ Artemisinin ໃນການປິ່ນປົວພະຍາດໄຂ້ຍຸງ” ທີ່ເກີດຂຶ້ນຢູ່ບາງເຂດໃນໂລກໃນຊຸມປີມໍ່ໆມານີ້, ທ່ານນາງ ທູໂຢ່ໂຢ່ ນັກຄົ້ນຄວ້າຕະຫຼອດການຂອງສະຖາບັນວິທະຍາສາດແພດສາດຈີນ, ຜູ້ໄດ້ຮັບລາງວັນວິທະຍາສາດເຕັກໂນໂລຊີລະດັບສູງສຸດຂອງຈີນ, ຜູ້ໄດ້ຮັບລາງວັນໂນແບນສາຂາສະລີລະສາດຫຼືແພດສາດ ພ້ອມດ້ວຍທີມງານຂອງເພິ່ນ ໄດ້ດຳເນີນການຄົ້ນຄວ້າເປັນເວລາຫຼາຍປີ, ໃນທີ່ສຸດກໍສາມາດບຸກທະລຸໃນດ້ານ “ການຄົ້ນຄວ້າທິດສະດີກ່ຽວກັບບົດບາດປົວພະຍາດໄຂ້ຍຸງ”, “ສາເຫດຂອງລັກສະນະດື້ຢາ”, “ການປັບປຸງວິທີປິ່ນປົວ” ແລະອື່ນໆ ໂດຍໄດ້ສະເໜີແຜນການປິ່ນປົວທີ່ສາມາດປະຕິບັດໄດ້ໃນການແກ້ໄຂບັນຫາ “ລັກສະນະດື້ຢາ Artemisinin” ໃນຫວ່າງມໍ່ໆມານີ້.
ທ່ານນາງ ທູໂຢ່ໂຢ່ ໄດ້ຮັບລາງວັນໂນແບນສາຂາສະລີລະສາດຫຼືແພດສາດປີ 2015. ຫຼັງຈາກທ່ານຄົ້ນພົບຢາ Artemisinin ເປັນຕົ້ນມາ, ຢາຊະນິດນີ້ໄດ້ຖືກນຳໃຊ້ເປັນຢາຊະນິດໜຶ່ງທີ່ໄດ້ຮັບຜົນດີແລະບໍ່ມີອາການທາງລົບໃນການປິ່ນປົວພະຍາດໄຂ້ຍຸງຕະຫຼອດມາ.