ຕອນຄ່ຳວັນທີ 16 ມິຖຸນານີ້, ພາຍຫຼັງສິ້ນສຸດການຢ້ຽມຢາມກຽກກີສະຖານ ແລະ ຕັດຊີກີສະຖານທາງລັດຖະກິດ ທັງເຂົ້າຮ່ວມກອງປະຊຸມສະພາມົນຕີປະມຸກລັດປະເທດສະມາຊິກອົງການຮ່ວມມືຊຽງໄຮ້ຄັ້ງທີ 19 ແລະ ກອງປະຊຸມສຸດຍອດກ່ຽວກັບມາດຕະການໃນການປະສານງານ ແລະການສ້າງຄວາມໄວ້ເນື້ອເຊື່ອໃຈກັນໃນອາຊີຄັ້ງທີ 5 ແລ້ວ, ທ່ານສີຈິ້ນຜິງ ປະທານປະເທດຈີນໄດ້ເດີນທາງກັບຄືນເຖິງນະຄອນຫຼວງປັກກິ່ງ.
ທ່ານ ສີຈິ້ນຜິງ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສົມກຽດຂອງທ່ານ ເອໂມມາລີ ຣັກໂມນອຟ ປະທານາທິບໍດີຕັດຊີກີສະຖານ, ແລະ ສະແດງຄວາມຊົມເຊີຍທີ່ຕັດຊີກີສະຖານຈັດກອງປະຊຸມສຸດຍອດກ່ຽວກັບມາດຕະການໃນການປະສານງານ ແລະ ການສ້າງຄວາມໄວ້ເນື້ອເຊື່ອໃຈກັນໃນອາຊີຢ່າງສຳເລັດຜົນ. ທ່ານສີຈິ້ນຜີງ ກ່າວວ່າ, ເຊື່ອວ່າພາຍໃຕ້ຄວາມພະຍາຍາມຮ່ວມກັນຂອງສອງຝ່າຍ, ການຮ່ວມມືໃນຂົງເຂດຕ່າງໆຂອງສອງປະເທດຈະກ້າວຂຶ້ນສູ່ລະດັບໃໝ່ຢ່າງແນ່ນອນ, ເພື່ອເພີ່ມຄວາມຜາສຸກໃຫ້ແກ່ປະຊາຊົນທັງສອງປະເທດ.
ທ່ານ ຣັກໂມນອຟໄດ້ສະແດງຄວາມຊົມເຊີຍທ່ານສີຈິ້ນຜິງທີ່ຢ້ຽມຢາມຕັດຊີກີສະຖານໄດ້ຮັບຜົນສຳເລັດຢ່າງຈົບງາມ, ຂອບໃຈນຳທ່ານສີຈິ້ນຜີງກໍຄືປະເທດຈີນທີ່ໄດ້ປະກອບສ່ວນເຂົ້າໃນກອງປະຊຸມສຸດຍອດກ່ຽວກັບມາດຕະການໃນການປະສານງານ ແລະການສ້າງຄວາມໄວ້ເນື້ອເຊື່ອໃຈກັນໃນອາຊີ. ທ່ານ ຣັກໂມນອຟ ກ່າວວ່າ, ການຢ້ຽມຢາມຕັດຊີກີສະຖານຂອງທ່ານສີຈິ້ນຜິງໄດ້ຮັບໝາກຜົນອັນອຸດົມສົມບູນແລະມີຄວາມໝາຍສຳຄັນ. ຕັດຊີກີສະຖານຍິນດີຖືການຢ້ຽມຢາມຄັ້ງນີ້ເປັນໂອກາດທີ່ດີ, ເພື່ອລົງເລິກການພົວພັນລະຫວ່າງສອງປະເທດ.