ກອງປະຊຸມລົດພະລັງງານໃໝ່ໂລກປີ 2019 ຈະຈັດຂຶ້ນແຕ່ວັນທີ 1-3 ກໍລະກົດໜ້ານີ້ຢູ່ເມືອງໂປອາວ ແຂວງໄຫຫຼຳ ໂດຍການເປັນເຈົ້າພາບຂອງສະມາຄົມວິທະຍາສາດເຕັກນິກຈີນ ແລະ ອຳນາດການປົກຄອງແຂວງໄຫຫຼຳ ເຊິ່ງເປັນກອງປະຊຸມລົດພະລັງງານໃໝ່ໂລກທີ່ຈີນຈະຈັດຂຶ້ນເປັນຄັ້ງທຳອິດ ໂດຍມີຈຸດປະສົງເພື່ອຊຸກຍູ້ໃຫ້ອຸດສາຫະກຳລົດພະລັງງານໃໝ່ໂລກມີການພັດທະນາຢ່າງປອດໃສແລະວ່ອງໄວ ແລະ ເລັ່ງລັດການຫັນປ່ຽນແລະຍົກລະດັບອຸດສາຫະກຳດັ່ງກ່າວ.
ຂ່າວລາຍງານວ່າ ກອງປະຊຸມຄັ້ງນີ້ຈະຈັດໃຫ້ມີຫຼາຍກິດຈະກຳ ເຊັ່ນ: ການສົນທະນາກັນ, ການແຂ່ງຂັນທາງດ້ານວິທະຍາສາດເຕັກນິກ, ການວາງສະແດງແລະການສຳຜັດກັບເຕັກນິກທີ່ກ້າວໜ້າ, ການທົດລອງຂີ່ລົດແລະຂັບລົດ ແລະອື່ນໆ. ມາຮອດປັດຈຸບັນ, ໄດ້ເຊື້ອເຊີນບໍລິສັດລົດທີ່ມີຊື່ສຽງ 20 ແຫ່ງ ແລະ ຜູ້ຕາງໜ້າວິສາຫະກິດລົດພະລັງງານໃໝ່ 80 ກວ່າແຫ່ງທັງພາຍໃນແລະຕ່າງປະເທດ ແລະ ຜູ້ຊ່ຽວຊານ, ນັກວິຊາການພາຍໃນແລະຕ່າງປະເທດ 150 ກວ່າທ່ານ ລວມທັງສະມາຊິກສະຖາບັນວິທະຍາສາດ ຫຼື ສະຖາບັນວິສະວະກຳ ຫຼາຍທ່ານເຂົ້າຮ່ວມກອງປະຊຸມ ເພື່ອປຶກສາຫາລືທ່າອ່ຽງການພັດທະນາເຕັກນິກລົດພະລັງງານໃໝ່ໃນອະນາຄົດ ແລະ ຍຸດທະສາດການຫັນປ່ຽນຂອງອຸດສາຫະກຳດັ່ງກ່າວ.