ທ່ານ ເກີງສວງ ໂຄສົກກະຊວງການຕ່າງປະເທດຈີນໄດ້ແຈ້ງໃຫ້ຮູ້ໃນວັນທີ 25 ມິຖຸນານີ້ວ່າ: ທ່ານ ຫຼີເຄີ້ສຽງ ນາຍົກລັດຖະມົນຕີຈີນຈະເຂົ້າຮ່ວມກອງປະຊຸມເວທີປຶກສາຫາລືດາວອສລະດູຮ້ອນຄັ້ງທີ 13 ທີ່ຈະຈັດຂຶ້ນຢູ່ນະຄອນຕ້າລຽນແຂວງລຽວນິງໃນວັນທີ 1 ຫາວັນທີ 2 ເດືອນໜ້າ. ໃນໄລຍະນີ້, ທ່ານ ຫຼີເຄີ້ສຽງ ຈະເຂົ້າຮ່ວມພິທີໄຂເວທີປຶກສາຫາລືແລະກ່າວຄຳປາໄສເປັນພິເສດ, ພົບປະກັບທ່ານ ຄລາວສ໌ ສະວາບ ປະທານເວທີປຶກສາຫາລື ແລະ ຜູ້ນຳຕ່າງປະເທດທີ່ເຂົ້າຮ່ວມກອງປະຊຸມ, ພ້ອມທັງຈະແລກປ່ຽນແລະສົນທະນາກັບບຸກຄົນສຳຄັນໃນວົງການອຸດສາຫະກຳການຄ້າ, ການທະນາຄານ,ຄັງປັນຍາແລະສື່ມວນຊົນອີກດ້ວຍ.
ຫົວຂໍ້ຕົ້ນຕໍຂອງເວທີປຶກສາຫາລືຄັ້ງນີ້ແມ່ນ “ຄວາມສາມາດດ້ານການນຳພາ 4,0: ຊ່ອງທາງໃນການປະສົບຜົນສຳເລັດໃນຍຸກໂລກາພິວັດ”. ໂດຍມີຜູ້ຕາງໜ້າວົງການການເມືອງ,ການຄ້າ,ນັກວິຊາການແລະວົງການສື່ມວນຊົນ 1.900 ກວ່າຄົນຈາກ 100 ກວ່າປະເທດຈະເຂົ້າຮ່ວມກອງປະຊຸມ.