ວັນທີ 30 ມິຖຸນາແລ້ວນີ້, ລັດຖະບານຈີນໄດ້ເຜີຍແຜ່ ມາດຕະການຄຸ້ມຄອງພິເສດກ່ຽວກັບການເຂົ້າເຖິງຕະຫຼາດຈີນສຳລັບນັກລົງທຶນຕ່າງປະເທດໃນບັນຊີດ້ານລົບສະບັບປີ 2019 ແລະ ມາດຕະການຄຸ້ມຄອງພິເສດກ່ຽວກັບການເຂົ້າເຖິງເຂດທົດລອງການຄ້າເສລີສຳລັບການລົງທຶນຂອງຕ່າງປະເທດໃນບັນຊີດ້ານລົບສະບັບປີ 2019 ຢ່າງເປັນທາງການ ໂດຍອະນຸມັດໃຫ້ນັກທຸລະກິດຕ່າງປະເທດຖືຫຸ້ນຫຼືດຳເນີນທຸລະກິດດ້ວຍການລົງທຶນພຽງຜູ້ດຽວຢູ່ຈີນໃນຫຼາຍຂົງເຂດກວ່າເກົ່າ.
ບັນຊີດ້ານລົບກ່ຽວກັບການເຂົ້າເຖິງຕະຫຼາດຈີນສຳລັບນັກລົງທຶນຕ່າງປະເທດສະບັບໃໝ່ມີຈຸດພິເສດ 3 ຂໍ້ ຄື ໜຶ່ງ: ເມື່ອທຽບໃສ່ສະບັບກ່ອນແລ້ວ, ເນື້ອໃນບັນຊີດ້ານລົບສະບັບປັດຈຸບັນໄດ້ຫຼຸດລົງຈາກ 48 ຂໍ້ລົງເຫຼືອ 40 ຂໍ້ ເຊິ່ງໄດ້ຫຼຸດລົງເຖິງ 16,7%, ບັນຊີດ້ານລົບສະບັບເຂດການຄ້າເສລີໄດ້ຫຼຸດຈາກ 45 ຂໍ້ລົງເຫຼືອ 37 ຂໍ້ ເຊິ່ງຫຼຸດລົງ 17,8%. ສອງ: ໄດ້ເປີດຂົງເຂດການລົງທຶນຂອງນັກລົງທຶນຕ່າງປະເທດຢ່າງຮອບດ້ານ ເຊິ່ງລວມທັງກະສິກຳ, ຂະແໜງການຂຸດຄົ້ນບໍ່ແຮ່, ຂະແໜງການອຸດສາຫະກຳການຜະລິດກໍຄືຂະແໜງການບໍລິການເຊັ່ນ: ການຄົມມະນາຄົມຂົນສົ່ງ, ໂທລະຄົມທີ່ມີມູນຄ່າເພີ່ມ, ພື້ນຖານໂຄງລ່າງ, ວັດທະນະທຳແລະອື່ນໆ. ສາມ: ສືບຕໍ່ມອບສິດໃຫ້ເຂດການຄ້າເສລີເປັນຜູ້ປະຕິບັດແລະທົດລອງກ່ອນໃນດ້ານການເປີດກວ້າງການເປີດປະຕູສູ່ພາຍນອກ ຕົວຢ່າງເຊັ່ນ: ຍົກເລີກການຈຳກັດຕໍ່ນັກທຸລະກິດຕ່າງປະເທດຢູ່ເຂດການຄ້າເສລີໃນການລົງທຶນໃນຂົງເຂດການຫາສິນໃນນ້ຳ, ການພິມຈຳໜ່າຍສິ່ງພິມແລະອື່ນໆ.
ຈີນປັບປຸງບັນຊີດ້ານລົບເພື່ອເປີດກວ້າງຂົງເຂດການລົງທຶນສຳລັບທຶນຕ່າງປະເທດຄັ້ງນີ້ ເຊິ່ງບໍ່ພຽງແຕ່ໄດ້ສົ່ງສັນຍານຕໍ່ພາຍນອກວ່າ ຈີນມີການປະຕິບັດຕົວຈິງໃນການເປີດກວ້າງການເປີດປະຕູສູ່ພາຍນອກນັບມື້ຫຼາຍຂຶ້ນເທົ່ານັ້ນ ຍັງເປັນການຮັບປະກັນດ້ານນະໂຍບາຍອັນແນ່ນອນໃຫ້ແກ່ທຶນຕ່າງປະເທດເຂົ້າສູ່ຕະຫຼາດຈີນ, ຮ່ວມກັນຊົມໃຊ້ໂອກາດການພັດທະນາຂອງຈີນ ເພື່ອບັນລຸເປົ້າໝາຍໃຫ້ຕ່າງຝ່າຍຕ່າງໄດ້ຮັບຜົນປະໂຫຍດນຳກັນ.