ປະມຸກລັດຈີນ-ອາເມລິກາພົບປະກັນຢູ່ໂອຊາກາ
ໃນເວລາ 11:50 ນາທີຕາມເວລາທ້ອງຖີ່ນຂອງວັນທີ 29 ມີຖຸນານີ້ ທ່ານສີຈິ້ນຜິງ ປະທານປະເທດ ສປ ຈີນ ໄດ້ພົບປະກັບທ່ານໂດໂນ ທຣຳ ປະທານາທິບໍດີສະຫະລັດອາເມລິກາຢູ່ທີ່ເມືອງໂອຊາກາປະເທດຍີ່ປຸ່ນ.ໂດຍປະມຸກລັດສອງປະເທດເຫັນດີຊຸກຍູ້ການພົວພັນຈີນ-ອາເມລິກາທີ່ຖືເອົາການປະສານງານ, ຮ່ວມມືກັນແລະມີຄວາມໝັ້ນຄົງເປັນພື້ນຖານ.
ທ່ານສີຈິ້ນຜິງກ່າວວ່າ, ການພົວພັນຈີນ-ອາເມລິກາແມ່ນໜຶ່ງໃນບັນດາການພົວພັນສອງຝ່າຍທີ່ສຳຄັນທີ່ສຸດໃນໂລກ. ປັດຈຸບັນ ການພົວພັນຈີນ-ອາເມລິກາໄດ້ປະສົບຄວາມຫຍຸ້ງຍາກຈຳນວນໜຶ່ງ ທີ່ບໍ່ສອດຄ່ອງກັບຜົນປະໂຫຍດຂອງທັງສອງຝ່າຍ. ສອງປະເທດເຖິງຈະມີຄວາມຂັດແຍ້ງກັນກໍ່ຕາມ, ແຕ່ກໍ່ມີຜົນປະໂຫຍດຮ່ວມກັນຢ່າງຫຼວງຫຼາຍ, ແລະຂົງເຂດການຮ່ວມມືກໍວ້າງຂວາງທີ່ສຸດ, ສະນັ້ນ ບໍ່ຄວນເຮັດໃຫ້ 2 ຝ່າຍຕົກຢູ່ໃນສະພາບທີ່ເປັນປໍລະປັກກັນຈົນກ້າວໄປເຖິງການເປັນສັດຕູກັນ, ແຕ່ຄວນຕ່າງຊ່ວຍຊູ້ຍູ້ໜູນກັນ, ພັດທະນາຮ່ວມກັນ.
ທ່ານທຣຳກ່າວເນັ້ນວ່າ, ທ່ານເອງບໍ່ມີເຈດຕະນາທີ່ບໍ່ດີຕໍ່ຈີນ, ຫວັງວ່າການພົວພັນລະຫວ່າງສອງປະເທດຈະນັບມື້ນັບດີຂຶ້ນ. ທ່ານຖະໜຸຖະໜອມການພົວພັນອັນດີງາມກັບທ່ານສີຈິ້ນຜິງ ແລະຍິນດີເພີ່ມທະວີການຮ່ວມມືກັບຈີນ.
ກ່ຽວກັບບັນຫາເສດຖະກິດການຄ້າ,ທ່ານສິຈິ້ນຜິງກ່າວເນັ້ນໜັກວ່າ, ທາດແທ້ແຫ່ງການຮ່ວມມືທາງເສດຖະກິດການຄ້າລະຫວ່າງຈີນກັບອາເມລິກາແມ່ນຕ່າງຝ່າຍຕ່າງມີຜົນປະໂຫຍດ, ສອງຝ່າຍມີຜົນປະໂຫຍດຮ່ວມກັນຢ່າງມະຫາສານ, ສອງຝ່າຍຄວນເປັນຄູ່ຮ່ວມທີ່ດີ.ຈີນມີຄວາມຈິງໃຈທີ່ຈະສືບຕໍ່ເຈລະຈາກັບອາເມລິກາ, ຄວບຄຸມຄວາມຂັດແຍ້ງກັນ, ແຕ່ການເຈລະຈາຕ້ອງຢູ່ບົນພື້ນຖານຄວາມເປັນສະເໝີພາບກັນ, ມີຄວາມເຄົາລົບເຊິ່ງກັນແລະກັນ, ແກ້ໄຂຄວາມກັງວົນຂອງແຕ່ລະຝ່າຍຢ່າງສົມເຫດສົມຜົນ.ໃນບັນຫາກ່ຽວກັບປະຊາທິປະໄຕແລະກຽດສັກສີຂອງຈີນ, ຈີນຕ້ອງປົກປັກຮັກສາຜົນປະໂຫຍດຕົ້ນຕໍຂອງຕົນ.ໃນຖານະເປັນສອງອົງກອນເສດຖະກິດໃຫຍ່ໃນໂລກ,ຄວາມຂັດແຍ້ງກັນລະຫວ່າງຈີນກັບອາເມລິກາໃນທີ່ສຸດຕ້ອງສົນທະນາປຶກສາຫາລືກັນ,
ຊອກຫາວິທີທີ່ສອງຝ່າຍຍອມຮັບ ຈຶ່ງຈະແກ້ໄຂໄດ້.
ທ່ານສີຈິ້ິ້ນຜິງເນັ້ນວ່າ, ຈີນຫວັງວ່າອາເມລິກາຈະປະຕິບັດຕໍ່ວິສາຫະກິດແລະນັກສຶກສາຂອງຈີນຢ່າງຍຸດຕິທຳ, ຮັບປະກັນໃຫ້ວິສາຫະກິດສອງປະເທດມີການຮ່ວມມືດ້ານເສດຖະກິດການລົງທຶນຢ່າງເປັນປົກກະຕິ, ແລະໃຫ້ປະຊາຊົນສອງປະເທດໄປມາຫາສູ່ກັນຢ່າງເປັນປົກກະຕິ.
ທ່ານທຣຳກ່າວວ່າ, ອາເມລິກາຫວັງວ່າຜ່ານການປຶກສາຫາລືກັນ, ຈະສາມາດແກ້ໄຂຄວາມຂາດດຸນດ້ານການຄ້າລະຫວ່າງສອງປະເທດຢ່າງເໝາະສົມ, ຄວນປະຕິບັດຕໍ່ວິສາຫະກິດຂອງແຕ່ລະປະເທດຢ່າງທ່ຽງທຳ. ອາເມລິກາຈະບໍ່ເກັບພາສີຕື່ມອີກຕໍ່ຜະລິດຕະພັນທີ່ຈີນສົ່ງອອກສູ່ອາເມລິກາ. ຫວັງວ່າຈີນຈະເພີ່ມທະວີການນຳເຂົ້າສິນຄ້າຈາກອາເມລິກາ. ອາເມລິກາເຫັນດີຮ່ວມກັນກັບຈີນລົງນາໃນສັນຍາການຄ້າທີ່ສອງຝ່າຍຍອມຮັບໄດ້, ນີ້ຈະມີຄວາມໝາຍປະຫວັດສາດ.
ປະມຸກລັດທັງສອງເຫັນດີຈະຈັດການເຈລະຈາດ້ານເສດຖະກິດການຄ້າຄືນໃໝ່ບົນພື້ນຖານເຄົາລົບເຊິ່ງກັນແລະກັນແລະສະເໝີພາບກັນ.ອາເມຣິກາກ່າວວ່າຈະບໍ່ຂຶ້ນພາສີຄັ້ງໃໝ່ອີກຕໍ່ຜະລິດຕະພັນຈີນທີ່ສົ່ງອອກອາເມຣິກາ. ຄະນະເສດຖະກິດການຄ້າຂອງສອງປະເທດຈະປຶກສາຫາລືກ່ຽວກັບບັນຫາທີ່ລະອຽດ.
ທ່ານໂດໂນ ທຣຳກ່າວວ່າ, ຈີນມີນັກສຶກສາຜູ້ດີເດັ່ນເປັນຈຳນວນຫຼວງຫຼາຍ, ຍິນດີຕ້ອນຮັບນັກສຶກສາຈີນໄປຮຽນຢູ່ອາເມລິກາ.
ໃນການພົບປະ, ທ່ານ ສີຈິ້ນຜິງ ໄດ້ຊີ້ແຈງຫຼັກໝັ້ນແລະຫຼັກການຂອງຈີນໃນບັນຫາໄຕ້ຫວັນ. ທ່ານ ໂດໂນ ທຣຳ ກ່າວວ່າ: ຂ້າພະເຈົ້າໃຫ້ຄວາມສຳຄັນຢ່າງສູງຕໍ່ຄວາມກັງວົນຂອງຈີນໃນບັນຫາໄຕ້ຫວັນ,ອາເມຣິກາຈະສືບຕໍ່ປະຕິບັດຕາມນະໂຍບາຍປະເທດຈີນດຽວ.
ກ່ຽວກັບບັນຫາແຫຼມເກົາຫຼີ, ທ່ານ ສີຈິ້ນຜິງ ກ່າວວ່າ: ຈີນສະໜັບສະໜູນຜູ້ນຳອາເມຣິກາແລະສປປເກົາຫຼີຮັກສາການຕິດຕໍ່ພົວພັນໂດຍຜ່ານການສົນທະນາ,ຫວັງໃຫ້ອາເມຣິກາແລະສປປເກົາຫຼີມີຄວາມຈິງໃຈຕໍ່ກັນ,ຫັນໜ້າເຂົ້າຫາກັນ,ຈັດການສົນທະນາຄືນໃໝ່ໂດຍໄວ,ເພື່ອສະແຫວງຫາວິທີແກ້ໄຂບັນຫາທີ່ຄ້າງຄາຮ່ວມກັນ. ຈີນຍິນດີເສີມຂະຫຍາຍບົດບາດໃນທາງສ້າງສັນກ່ຽວກັບເລື່ອງນີ້. ທ່ານ ໂດໂນ ທຣຳ ກ່າວວ່າ:ອາເມຣິກາໃຫ້ຄວາມສຳຄັນຢ່າງສູງຕໍ່ບົດບາດສຳຄັນຂອງຈີນໃນບັນຫາແຫຼມເກົາຫຼີ,ຍິນດີຮັກສາການຕິດຕໍ່ພົວພັນແລະປະສານງານກັບຈີນ.