ມີຂ່າວແຈ້ງວ່າ: ທ່ານນາງ ຊ້າຍຢິ່ງເວີນ ຜູ້ນຳເຂດໄຕ້ຫວັນມີແຜນຈະເດີນທາງຜ່ານແດນອາເມຣິກາ. ຕໍ່ກັບຂ່າວນີ້, ທ່ານເກີງສວງ ໂຄສົກກະຊວງການຕ່າງປະເທດຈີນໃຫ້ຄຳຕອບຕໍ່ນັກຂ່າວວ່າ: ຈີນເຕືອນໃຫ້ອາເມຣິກາຈົ່ງເຄົາລົບແລະປະຕິບັດຕາມຫຼັກການຈີນດຽວ ແລະຂໍ້ກຳນົດໃນຖະແຫຼງການຮ່ວມສາມສະບັບລະຫວ່າງຈີນ-ອາເມຣິກາ ບໍ່ອະນຸຍາດໃຫ້ຊ້າຍຢິ່ງເວີນຜ່ານແດນປະເທດຕົນ.
ທ່ານເກີງສວງ ໂຄສົກກະຊວງການຕ່າງປະເທດຈີນ ກ່າວໃນກອງປະຊຸມຖະແຫຼງຂ່າວຂອງກະຊວງການຕ່າງປະເທດຈີນທີ່ຈັດຂຶ້ນໃນວັນທີ 1 ກໍລະກົດນີ້ວ່າ: “ຈີນຄັດຄ້ານຢ່າງເດັດດ່ຽວຕໍ່ການໄປມາຫາສູ່ກັນຢ່າງເປັນທາງການລະຫວ່າງອາເມຣິກາ-ໄຕ້ຫວັນມາໂດຍຕະຫຼອດ, ນີ້ຄືຫຼັກໝັ້ນທີ່ເດັດດ່ຽວໜຽວແໜ້ນແລະຈະແຈ້ງຂອງຈີນ.ຈີນເຕືອນໃຫ້ອາເມຣິກາຈົ່ງເຄົາລົບແລະປະຕິບັດຕາມຫຼັກການຈີນດຽວ ແລະຂໍ້ກຳນົດໃນຖະແຫຼງການຮ່ວມສາມສະບັບລະຫວ່າງຈີນ-ອາເມຣິກາ ບໍ່ອະນຸຍາດໃຫ້ຊ້າຍຢິ່ງເວີນຜ່ານແດນປະເທດຕົນ, ເອົາໃຈໃສ່ແກ້ໄຂບັນຫາກ່ຽວກັບໄຕ້ຫວັນຢ່າງລະມັດລະວັງ ເພື່ອຫຼີກເວັ້ນບໍ່ໃຫ້ເປັນການທຳລາຍສາຍພົວພັນຈີນ-ອາເມຣິກາກໍຄືສັນຕິພາບແລະສະຖຽນລະພາບຂອງຊ່ອງແຄບໄຕ້ຫວັນ. ຈີນໄດ້ສະແດງຄວາມກັງວົນຂອງຕົນກ່ຽວກັບບັນຫາກ່ຽວຂ້ອງໃຫ້ອາເມຣິກາໄດ້ຮັບຊາບ ແລະໄດ້ປະທ້ວງຢ່າງເຄັ່ງຂຶມແລ້ວ. ”