ກອງປະຊຸມໃຫຍ່ລົດຍົນທີ່ໃຊ້ພະລັງງານໃໝ່ໂລກ 2019 ໄດ້ໄຂຂຶ້ນຢູ່ເມືອງໂປອາວ ແຂວງໄຫຫຼຳ ສປ ຈີນໃນວັນທີ 2 ກໍລະກົດນີ້. ທ່ານສີຈິ້ນຜິງ ປະທານປະເທດຈີນໄດ້ສົ່ງສານ ເພື່ອສະແດງຄວາມຊົມເຊີຍຢ່າງອົບອຸ່ນຕໍ່ກອງປະຊຸມຄັ້ງນີ້.
ສານຊົມເຊີຍຂອງທ່ານສີຈິ້ນຜິງລະບຸວ່າ: ຂະແໜງການລົດຍົນທີ່ໃຊ້ພະລັງງານໃໝ່ກຳລັງກ້າວເຂົ້າສູ່ໄລຍະໃໝ່ທີ່ການພັດທະນາເລັ່ງລັດໄວຂຶ້ນ, ເຊິ່ງບໍ່ພຽງແຕ່ໄດ້ເພີ່ມພະລັງແຮງໃໝ່ທີ່ເຂັ້ມແຂງໃນການຂັບເຄື່ອນໃຫ້ເສດຖະກິດຂອງບັນດາປະເທດຂະຫຍາຍຕົວເທົ່ານັ້ນ, ຍັງໄດ້ຊ່ວຍຫຼຸດການລະບາຍອາຍພິດເຮືອນແກ້ວໃຫ້ໜ້ອຍລົງ, ທັງຊ່ວຍຮັບມືກັບສິ່ງທ້າທ້າຍຈາກການປ່ຽນແປງຂອງດິນຟ້າອາກາດ, ປັບປຸງສິ່ງແວດລ້ອມທຳມະຊາດຂອງໂລກໃຫ້ດີຂຶ້ນ.
ທ່ານສີຈິ້ນຜິງເນັ້ນໜັກໃນສານຊົມເຊີຍວ່າ: ຈີນຍຶດໝັ້ນເດີນຕາມເສັ້ນທາງພັດທະນາແບບສີຂຽວ,ກາກບອນຕ່ຳແລະຍືນຍົງ, ຈີນຍິນດີຮ່ວມກັບປະຊາຄົມໂລກເລັ່ງລັດການຊຸກຍູ້ການປະດິດສ້າງດ້ານວິທະຍາສາດເຕັກນິກດ້ານລົດຍົນທີ່ໃຊ້ພະລັງງານໃໝ່ພ້ອມດ້ວຍການພັດທະນາຂອງຂະແໜງການທີ່ກ່ຽວຂ້ອງ, ປະກອບສ່ວນຫຼາຍກວ່າເກົ່າເພື່ອສ້າງໂລກທີ່ສະອາດແລະສວຍງາມ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.