ໃນເວລາເຂົ້າຮ່ວມພິທີເປີດກອງປະຊຸມເວທີປຶກສາຫາລືດາວົສລະດູຮ້ອນ 2019 ຢູ່ນະຄອນຕ້າລຽນ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນກ່າວວ່າ: ລະດັບການເປີດປະຕູ, ຄວາມໂປ່ງໃສແລະລັກສະນະຄາດຄະເນໄດ້ ໃນການດຶງດູດການລົງທຶນຂອງຕ່າງປະເທດສູ່ຈີນ ຈະນັບມື້ນັບສູງຂຶ້ນ, ສະພາບແວດລ້ອມການລົງທຶນໂດຍລວມ ກໍຈະນັບມື້ນັບດີຂຶ້ນ.
ທ່ານ ຫຼີເຄີ້ສຽງ ກ່າວຕື່ມວ່າ: ຈີນຈະເດັດດ່ຽວຊຸກຍູ້ການເປີດປະຕູສູ່ພາຍນອກຢ່າງຮອບດ້ານ, ຈະລົງເລິກການເປີດປະຕູໃນຂະແໜງການຜະລິດ, ຈັດຕັ້ງປະຕິບັດມາດຕະການຕ່າງໆ ເຊັ່ນ: ຜ່ອນຄາຍການຈຳກັດອັດຕາຫຸ້ນສ່ວນຂອງທຶນຕ່າງປະເທດໃນຂົງເຂດລົດຍົນ ແລະອື່ນໆໃຫ້ດີ, ສະໜັບສະໜູນການລົງທຶນຂອງຕ່າງປະເທດເຂົ້າໃນຂົງເຂດການຜະລິດທີ່ກ້າວໜ້າ ເຊັ່ນ: ຂໍ້ມູນຂ່າວສານເອເລັກໂຕຣນິກ, ການຜະລິດອຸປະກອນ, ຢຸກຢາ, ວັດສະດຸໃໝ່ ແລະອື່ນໆ ທັງເຂົ້າໃນເຂດພາກກາງພາກຕາເວັນຕົກຂອງຈີນ, ຈະປະຕິບັດນະໂຍບາຍໃນບູລິມະສິດໃນດ້ານການນຳເຂົ້າອຸປະກອນເພື່ອໃຊ້ເອງ, ລວມທັງອາກອນລາຍໄດ້ຂອງວິສາຫະກິດ, ການສະໜອງທີ່ດິນ ແລະອື່ນໆ.
ທ່ານ ຫຼີເຄີ້ສຽງ ກ່າວອີກວ່າ: ຈີນຈະເປັນເຈົ້າການໃນການຫຼຸດລະດັບພາສີລວມໃຫ້ໜ້ອຍລົງຕື່ມອີກ, ພະຍາຍາມລົບລ້າງກຳແພງທີ່ບໍ່ເປັນພາສີ, ເອົາໃຈໃສ່ເປີດກວ້າງການນຳເຂົ້າສິນຄ້າແລະການບໍລິການ ທັງຍົກສູງລະດັບຄວາມສະດວກຂອງການນຳເຂົ້າ. ລະດັບການເປີດປະຕູ, ຄວາມໂປ່ງໃສແລະລັກສະນະທີ່ຄາດຄະເນໄດ້ ໃນການດຶງດູດການລົງທຶນຂອງຕ່າງປະເທດໃນຈີນ ຈະນັບມື້ນັບສູງຂຶ້ນ, ເຮັດໃຫ້ສະພາບແວດລ້ອມການລົງທຶນໂດຍລວມນັບມື້ນັບດີຂຶ້ນເຊັ່ນດຽວກັນ.